ਸਕਾਟਲੈਂਡ ਦੀਆਂ ਸੜਕਾਂ ਉੁਤੇ ਕਿਸਾਨਾਂ ਦੇ ਹੱਕ ’ਚ ਗੂੰਜੇ ਨਾਹਰੇ

ਗੋਰਿਆਂ ਦੀ ਧਰਤੀ ’ਤੇ ਖੇਤੀ ਕਾਨੂੰਨਾਂ ਵਿਰੁਧ 

ਗਲਾਸਗੋ, 8 ਨਵੰਬਰ: ਸਕਾਟਲੈਂਡ ਦੇ ਮੁੱਖ ਸ਼ਹਿਰ ਗਲਾਸਗੋ ਦੀਆਂ ਸੜਕਾਂ ’ਤੇ ਇਕ ਵਾਰ ਫਿਰ ਕਿਸਾਨਾਂ ਦੇ ਹੱਕ ਵਿਚ ਨਾਹਰੇ ਗੂੰਜੇ, ਜਿਥੇ ਭਾਰਤੀ ਮੂਲ ਦੇ ਲੋਕਾਂ ਸਮੇਤ ਗੋਰਿਆਂ ਨੇ ਵੀ ‘ਨੋ ਫ਼ਾਰਮਰ ਨੋ ਫ਼ੂਡ’ ਦੇ ਨਾਹਰੇ ਲਗਾਏ। ਦਰਅਸਲ ਸਕਾਟਲੈਂਡ ਚ ਖੇਤੀ ਕਾਨੂੰਨਾਂ ਵਿਰੁਧ ਵੱਡਾ ਪ੍ਰਦਰਸ਼ਨ ਹੋਇਆ ਜਿਸ ਵਿਚ ਵੱਧ ਚੜ੍ਹ ਕੇ ਲੋਕਾਂ ਨੇ ਭਾਰਤ ਸਰਕਾਰ ਵਿਰੁਧ ਨਾਹਰੇਬਾਜ਼ੀ ਕੀਤੀ ਅਤੇ ਖੇਤੀ ਕਾਨੂੰਨ ਵਾਪਸ ਲੈਣ ਦੀ ਮੰਗ ਕੀਤੀ।
ਗਲਾਸਗੋ ’ਚ ਜਲਵਾਯੂ ਸਬੰਧੀ 26 ਕਾਨਫ਼ਰੰਸ ਚਲ ਰਹੀ ਹੈ, ਜਿਥੇ ਦੁਨੀਆਂ ਭਰ ਦੇ ਲੀਡਰ ਵਾਤਾਵਰਣ ਨੂੰ ਬਚਾਉਣ ਲਈ ਲੰਮੇ ਲੰਮੇ ਭਾਸਣ ਦੇ ਰਹੇ ਹਨ। ਉਥੇ ਹੀ ਦੂਜੇ ਪਾਸੇ ਜਾਗਦੀਆਂ ਜਮੀਰਾਂ ਵਾਲੇ ਹਜ਼ਾਰਾਂ ਲੋਕਾਂ ਨੇ ਗਲਾਸਗੋ ਦੀਆਂ ਸੜਕਾਂ ’ਤੇ ਨਿਕਲੇ ਕੇ ਨੇਤਾਵਾਂ ਨੂੰ ਲਾਹਨਤਾਂ ਪਾਈਆਂ। ਇਸ ਵਿਸ਼ਾਲ ਮਾਰਚ ਵਿਚ ਵਿਸ਼ਵ ਭਰ ਤੋਂ 100 ਤੋਂ ਵੱਧ ਜਥੇਬੰਦੀਆਂ ਸ਼ਾਮਲ ਹੋਈਆਂ, ਜਿਨ੍ਹਾਂ ਦੇ 60, 000 ਤੋਂ ਵੱਧ ਲੋਕਾਂ ਦੇ ਸ਼ਾਮਲ ਹੋਣ ਦਾ ਅਨੁਮਾਨ ਹੈ। ਇਸ ਰੈਲੀ ਵਿਚ ਮੁੱਦਿਆਂ ਮੁਤਾਬਕ ਵੱਖ ਵੱਖ ਬਲਾਕ ਬਣਾਏ ਗਏ ਸਨ ਜਿਸ ਤਹਿਤ ‘ਕਿਸਾਨ ਮੋਰਚਾ ਸਪੋਰਟ ਗਰੁਪ ਸਕਾਟਲੈਂਡ’ ਨੂੰ ਫ਼ਾਰਮਰਜ਼ ਐਂਡ ਲੈਂਡ ਵਰਕਰਜ਼ ਬਲਾਕ ਵਿਚ ਖ਼ਾਸ ਸਥਾਨ ਮਿਲਿਆ। ਪ੍ਰਦਰਸ਼ਨ ਦੌਰਾਨ ਸਕਾਟਲੈਂਡ ਦੇ ਪੰਜਾਬੀ ਢੋਲ ਅਤੇ ਕਿਸਾਨ ਅੰਦੋਲਨ ਦੇ ਬੈਨਰਾਂ ਨਾਲ ਸ਼ਾਮਲ ਹੋਏ। ਢੋਲ ਦੇ ਨਾਲ ਕਿਸਾਨ ਅੰਦੋਲਨ ਨੂੰ ਸਮਰਥਨ ਵਾਲੇ ਬੈਨਰਾਂ, ਨਾਹਰਿਆਂ, ਜੈਕਾਰਿਆਂ, ਕਿਸਾਨੀ ਜਾਗੋ ਅਤੇ ਹੱਲਾ ਬੋਲ ਗੀਤ ਨੇ ਜਿਥੇ ਆਸਮਾਨ ਗੂੰਜਣ ਲਾਇਆ ਤਾਂ ਉੱਥੇ ਹੀ ਸੰਸਾਰ ਭਰ ਦੇ ਮੀਡੀਆ ਅਤੇ ਸਥਾਨਕ ਲੋਕਾਂ ਦਾ ਧਿਆਨ ਵੀ ਖਿੱਚਿਆ। 
ਪ੍ਰਦਰਸ਼ਨਕਾਰੀਆਂ ਨੇ ਭਾਰਤ ਚ ਚਲ ਰਹੇ ਕਿਸਾਨ ਅੰਦੋਲਨ, ਮੋਦੀ ਸਰਕਾਰ ਅਤੇ ਕਾਰਪੋਰੇਟ ਕੰਪਨੀਆਂ ਵਲੋਂ ਜਲ, ਜੰਗਲ ਅਤੇ ਜ਼ਮੀਨ ਦੇ ਉਜਾੜੇ ਕਰਦੀਆਂ ਨੀਤੀਆਂ ਦੇ ਪਰਦੇਫ਼ਾਸ਼ ਕੀਤੇ।