ਭਾਜਪਾ ਮੁੰਬਈ ਨੂੰ ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਉਣ ਦੀ ਰਚ ਰਹੀ ਹੈ ਸਾਜ਼ਸ਼ : ਰਾਊਤ

ਕਿਹਾ, ਇਸ ਲਈ ਬੈਠਕਾਂ ਹੋਈਆਂ ਅਤੇ ਫ਼ੰਡ ਇਕੱਠਾ ਕੀਤਾ ਜਾ ਰਿਹਾ ਹੈ

ਮੁੰਬਈ, 8 ਅਪ੍ਰੈਲ : ਸ਼ਿਵ ਸੈਨਾ ਨੇਤਾ ਸੰਜੇ ਰਾਊਤ ਨੇ ਭਾਜਪਾ 'ਤੇ ਮੁੰਬਈ ਨੂੰ  ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਉਣ ਦੀ ਸਾਜ਼ਸ਼ ਰਚਣ ਦਾ ਦੋਸ਼ ਲਗਾਉਂਦੇ ਹੋਏ ਸ਼ੁਕਰਵਾਰ ਨੂੰ  ਦਾਅਵਾ ਕੀਤਾ ਕਿ ਗ੍ਰਹਿ ਮੰਤਰਾਲਾ ਨੂੰ  ਇਸ ਮਾਮਲੇ ਸਬੰਧੀ ਇਕ ਪੇਸ਼ਕਾਰੀ ਦਿਤੀ ਗਈ ਹੈ | ਰਾਊਤ ਨੇ ਕਿਹਾ ਕਿ ਭਾਜਪਾ ਦੇ ਸਾਬਕਾ ਸੰਸਦ ਮੈਂਬਰ ਕਿਰੀਟ ਸੌਮਈਆ ਅਤੇ ਪਾਰਟੀ ਨੇਤਾਵਾਂ, ਬਿਲਡਰ, ਵਪਾਰੀਆਂ ਦਾ ਇਕ ਸਮੂਹ ਇਸ ਸਾਜ਼ਸ਼ ਦਾ ਹਿੱਸਾ ਹੈ |
ਉਨ੍ਹਾਂ ਕਿਹਾ,''ਮੁੰਬਈ ਨੂੰ  ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਉਣ ਸਬੰਧੀ ਪੇਸ਼ਕਾਰੀ (ਇਸ ਸਮੂਹ ਵਲੋਂ) ਗ੍ਰਹਿ ਮੰਤਰਾਲਾ ਨੂੰ  ਦਿਤੀ ਗਈ ਹੈ | ਬੈਠਕਾਂ ਹੋਈਆਂ ਹਨ ਅਤੇ ਇਸ ਕੰਮ ਲਈ ਫ਼ੰਡ ਇਕੱਠਾ ਕੀਤਾ ਜਾ ਰਿਹਾ ਹੈ | ਉਹ ਪਿਛਲੇ 2 ਮਹੀਨਿਆਂ ਤੋਂ ਚੱਲ ਰਿਹਾ ਹੈ ਅਤੇ ਮੈਂ ਪੂਰੀ ਜਵਾਬਦੇਹੀ ਨਾਲ ਇਹ ਗੱਲ ਕਰ ਰਿਹਾ ਹਾਂ | ਮੇਰੇ ਕੋਲ ਮੇਰੀ ਗੱਲ ਸਾਬਿਤ ਕਰਨ ਲਈ ਸਬੂਤ ਹੈ | ਮੁੱਖ ਮੰਤਰੀ (ਊਧਵ ਠਾਕਰੇ) ਨੂੰ  ਵੀ ਇਸ ਬਾਰੇ ਜਾਣਕਾਰੀ ਹੈ |''
ਸ਼ਿਵ ਸੈਨਾ ਸੰਸਦ ਮੈਂਬਰ ਨੇ ਦਾਅਵਾ ਕੀਤਾ ਕਿ ਇਸ ਗੱਲ ਦੀ ਸੰਭਾਵਨਾ ਹੈ ਕਿ ਸੌਮਈਆ ਦੀ ਅਗਵਾਈ ਵਾਲਾ ਸਮੂਹ ਅਗਲੇ ਕੁੱਝ ਮਹੀਨਿਆਂ 'ਚ ਅਦਾਲਤ ਜਾ ਕੇ ਕਹੇਗਾ ਕਿ ਮਹਾਰਾਸ਼ਟਰ ਦੀ ਰਾਜਧਾਨੀ ਮੁੰਬਈ 'ਚ ਮਰਾਠੀ ਲੋਕਾਂ ਦਾ ਫ਼ੀ ਸਦੀ ਬਹੁਤ ਘੱਟ ਹੋ ਗਿਆ ਹੈ ਅਤੇ ਇਸ ਲਈ ਸ਼ਹਿਰ ਨੂੰ  ਕੇਂਦਰ ਸਰਕਾਰ ਦੇ ਸ਼ਾਸਨ ਦੇ ਅਧੀਨ ਇਕ ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਇਆ ਜਾਣਾ ਚਾਹੀਦਾ ਹੈ | ਰਾਊਤ ਨੇ ਕਿਹਾ ਕਿ ਸੌਮਈਆ ਨੇ ਇਸ ਤੋਂ ਪਹਿਲਾਂ ਸਕੂਲਾਂ 'ਚ ਮਰਾਠੀ ਨੂੰ  ਜ਼ਰੂਰੀ ਭਾਸ਼ਾ ਬਣਾਉਣ ਦੇ ਰਾਜ ਸਰਕਾਰ ਦੇ ਫ਼ੈਸਲੇ ਨੂੰ  ਚੁਣੌਤੀ ਦਿਤੀ ਸੀ |    (ਏਜੰਸੀ)