ਮਹਾਰਾਣੀ ਪਰਨੀਤ ਦੇ ਹੱਕ ’ਚ ਪ੍ਰਚਾਰ ਕਰਨ ਪੁੱਜੇ ਕੈਪਟਨ ਅਮਰਿੰਦਰ ਨੇ ਅਕਾਲੀ-ਭਾਜਪਾ ’ਤੇ ਸਾਧੇ ਨਿਸ਼ਾਨੇ
ਸਮਾਣਾ: ਲੋਕ ਸਭਾ ਹਲਕਾ ਪਟਿਆਲਾ ਤੋਂ ਕਾਂਗਰਸ ਦੀ ਉਮੀਦਵਾਰ ਮਹਾਰਾਣੀ ਪਰਨੀਤ ਕੌਰ ਦੇ ਹੱਕ ਵਿਚ ਚੋਣ ਪ੍ਰਚਾਰ ਕਰਨ ਅੱਜ ਇੱਥੋਂ ਦੇ ਵਿਧਾਨ ਸਭਾ ਹਲਕਾ ਸਮਾਣਾ ਵਿਖੇ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਪਹੁੰਚੇ। ਇਸ ਮੌਕੇ ਜਨਸਭਾ ਨੂੰ ਸੰਬੋਧਨ ਕਰਦੇ ਹੋਏ ਕੈਪਟਨ ਨੇ ਕਿਹਾ ਕਿ ਹੁਣ ਫ਼ੈਸਲਾ ਤੁਹਾਡਾ ਹੈ ਤੇ ਤੁਹਾਨੂੰ ਸੋਚਣਾ ਪਵੇਗਾ ਕਿ ਜੋ 5 ਸਾਲ ਮੋਦੀ ਨੇ ਕੀਤਾ ਤੁਸੀਂ ਉਸ ਨਾਲ ਸਹਿਮਤ ਸੀ ਜਾਂ ਨਹੀਂ, ਜੋ ਮੋਦੀ ਸਰਕਾਰ ਨੇ ਵਾਅਦੇ ਕੀਤੇ ਸੀ ਉਹ ਪੂਰੇ ਕੀਤੇ ਜਾਂ ਨਹੀਂ।
Parneet Kaur
ਉਨ੍ਹਾਂ ਕਿਹਾ ਕਿ ਮੋਦੀ ਨੇ ਕਿਹਾ ਸੀ ਕਿ 15 ਲੱਖ ਹਰ ਇਕ ਭਾਰਤੀ ਦੀ ਜੇਬ੍ਹ ਵਿਚ ਪਾਵਾਂਗਾ ਤੇ ਹੁਣ ਕਿੱਥੇ ਗਿਆ 15 ਲੱਖ ਰੁਪਇਆ। ਜੀ.ਐਸ.ਟੀ. ਤੋਂ ਵਪਾਰੀ ਔਖਾ, ਕਾਰਖ਼ਾਨੇ ਵਾਲਾ ਔਖਾ ਤੇ ਨੋਟਬੰਦੀ ਤੋਂ ਸਾਰਾ ਦੇਸ਼ ਹੀ ਔਖਾ। ਉਨ੍ਹਾਂ ਕਿਹਾ ਕਿ ਮੋਦੀ ਨੇ ਦੇਸ਼ ਦਾ ਬੇੜਾ ਗਰਕ ਕਰ ਦਿਤਾ ਹੈ। ਮੋਦੀ ਕਹਿੰਦਾ ਸੀ ਕਿ ਨੋਟਬੰਦੀ ਨਾਲ ਦੇਸ਼ ਨੂੰ ਫ਼ਾਇਦਾ ਹੋਵੇਗਾ ਪਰ ਕੀ ਹੋਇਆ, ਸਗੋਂ ਦੇਸ਼ ਹੋਰ ਗਰੀਬ ਹੋ ਗਿਆ।
Rally Pic
ਉਨ੍ਹਾਂ ਕਿਹਾ ਕਿ ਫ਼ੌਜ ਹਮੇਸ਼ਾ ਦੇਸ਼ ਦੀ ਹੈ ਪਰ ਇਹ ਮੋਦੀ ਪੁਲਵਾਮਾ ਹਮਲੇ ਤੋਂ ਬਾਅਦ ਕਹਿੰਦਾ ਸੀ ‘ਮੋਦੀ ਕੀ ਸੈਨਾ’। ਫ਼ੌਜ ਹਮੇਸ਼ਾ ਅਪਣੇ ਮੁਲਕ ਦੀ ਹੈ ਤੇ ਹਰ ਫ਼ੌਜੀ ਅਪਣੇ ਦੇਸ਼ ਲਈ ਕੁਝ ਵੀ ਕਰ ਸਕਦਾ ਹੈ। ਕੈਪਟਨ ਨੇ ਦਾਅਵਾ ਕਰਦਿਆਂ ਕਿਹਾ ਕਿ ਪੰਜਾਬ ਦੇ ਵਿਚ 13 ਦੀਆਂ 13 ਸੀਟਾਂ ਅਸੀਂ ਜਿੱਤਾਂਗੇ ਤੇ ਮੋਦੀ ਨੂੰ ਇਕ ਵੀ ਸੀਟ ਨਹੀਂ ਦੇਵਾਂਗੇ। ਉਨ੍ਹਾਂ ਕਿਹਾ ਕਿ ਮੋਦੀ ਹੁਣ ਅਪਣੀ ਹਾਰ ਵੇਖ ਕੇ ਘਬਰਾ ਗਿਆ ਹੈ ਤੇ ਇਸ ਲਈ ਹੁਣ ਫ਼ਿਲਮੀ ਐਕਟਰਾਂ ਨੂੰ ਸਿਆਸਤ ਵਿਚ ਲੈ ਕੇ ਆ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਸੰਨੀ ਦਿਓਲ ਨੂੰ ਰਾਜਨੀਤੀ ਵਿਚ ਲਿਆਉਣ ਦਾ ਇਹਦਾ ਕੀ ਮਕਸਦ ਹੈ ਇਹ ਮੈਨੂੰ ਸਮਝ ਨਹੀਂ ਆਇਆ। ਸੰਨੀ ਦਿਓਲ ਨੂੰ ਇਹ ਨਹੀਂ ਪਤਾ ਕਿ ਪੁਲਵਾਮਾ ਹਮਲੇ ਦਾ ਬਾਲਾਕੋਟ ਨਾਲ ਕੀ ਸਬੰਧ ਹੈ।
Rally Pic
ਜਦੋਂ ਉਨ੍ਹਾਂ ਨੂੰ ਇਕ ਪੱਤਰਕਾਰ ਨੇ ਪੁੱਛਿਆ ਕਿ ਬਾਲਾਕੋਟ ਬਾਰੇ ਤੁਹਾਡੀ ਕੀ ਰਾਏ ਹੈ ਤਾਂ ਉਨ੍ਹਾਂ ਨੇ ਅੱਗਿਓਂ ਕਿਹਾ ਕਿ ਮੈਨੂੰ ਨਹੀਂ ਪਤਾ ਬਾਲਾਕੋਟ ਕੀ ਹੈ। ਪਾਰਲੀਮੈਂਟ ਕੋਈ ਐਕਟਰਾਂ ਦਾ ਘਰ ਨਹੀਂ ਹੈ। ਪਾਰਲੀਮੈਂਟ ਉਹ ਜਗ੍ਹਾ ਹੈ ਜਿੱਥੇ ਤੁਸੀਂ ਅਪਣੇ ਦਿਮਾਗ ਦਾ ਇਸਤੇਮਾਲ ਕਰਕੇ ਅਪਣੇ ਦੇਸ਼ ਵਾਸਤੇ ਅਪਣੇ ਲੋਕਾਂ ਵਾਸਤੇ ਕਾਨੂੰਨ ਬਣਾਉਂਦੇ ਹੋ। ਉਨ੍ਹਾਂ ਕਿਹਾ ਕਿ ਅਸੀਂ ਪੰਜਾਬ ਵਿਚ ਸਕੀਮਾਂ ਸ਼ੁਰੂ ਕੀਤੀਆਂ ਤੇ ਜਿੰਨ੍ਹਾਂ ਵੀ ਵਿਕਾਸ ਕੀਤਾ ਹੈ ਅਸੀਂ ਕੀਤਾ ਹੈ ਪਰ ਮੋਦੀ ਨੇ ਕੀ ਕੀਤਾ ਹੈ?
Rally Pic
ਉਨ੍ਹਾਂ ਕਿਹਾ ਕਿ ਅਸੀਂ ਕਿਸਾਨਾਂ ਦੇ ਕਰਜ਼ੇ ਮਾਫ਼ ਕੀਤੇ, ਨੌਕਰੀਆਂ ਦਿਤੀਆਂ ਤੇ ਇਹੀ ਸਰਕਾਰ ਦਾ ਫਰਜ਼ ਹੁੰਦਾ ਹੈ ਤੇ ਇਹੀ ਅਸੀਂ ਚਾਹੁੰਦੇ ਹਾਂ। ਉਨ੍ਹਾਂ ਕਿਹਾ ਕਿ ਮੋਦੀ ਸਰਕਾਰ ਨੇ ਕਿਸਾਨਾਂ ਨੂੰ ਤੰਗ ਕਰਕੇ ਸਾਜ਼ਿਸ਼ ਖੇਡੀ ਸੀ ਤਾਂ ਜੋ ਕਿਸਾਨ ਕਾਂਗਰਸ ਸਰਕਾਰ ਦੇ ਵਿਰੁਧ ਹੋ ਜਾਣ। ਮੋਦੀ ਨੇ ਜਾਣ ਬੁੱਝ ਕੇ ਬਾਰਦਾਨੇ ਦੀ ਕਮੀ ਪੈਦਾ ਕੀਤੀ ਸੀ ਤਾਂ ਜੋ ਲੋਕ ਮੰਡੀਆਂ ਵਿਚ ਔਖੇ ਹੋਣ। ਉਨ੍ਹਾਂ ਕਿਹਾ ਕਿ ਬਾਦਲਾਂ ਨੇ ਪੰਜਾਬ ਦਾ ਬੁਰਾ ਹਾਲ ਕਰ ਦਿਤਾ ਸੀ ਤੇ ਇਨ੍ਹਾਂ ਦੀ ਹੁਕੂਮਤ ਵੇਲੇ ਹੀ ਬਹਿਬਲ ਕਲਾਂ ਗੋਲੀਕਾਂਡ ਘਟਨਾ ਵਾਪਰੀ ਤੇ ਹੋਰ ਬੇਅਦਬੀ ਦੀਆਂ ਘਟਨਾਵਾਂ ਦੇ ਵੀ ਜ਼ਿੰਮੇਵਾਰ ਇਹੀ ਹਨ।
Captain Amarinder Singh
ਉਨ੍ਹਾਂ ਕਿਹਾ ਕਿ ਪ੍ਰਕਾਸ਼ ਸਿੰਘ ਬਾਦਲ ਹੁਣ ਕਹਿੰਦਾ ਹੈ ਕਿ ਮੈਨੂੰ ਨਹੀਂ ਪਤਾ ਕਿਸ ਨੇ ਗੋਲੀ ਚਲਾਈ ਸੀ ਪਰ ਇਹ ਉਦੋਂ ਮੁੱਖ ਮੰਤਰੀ ਸੀ ਤੇ ਜੇ ਇਸ ਨੂੰ ਨਹੀਂ ਪਤਾ ਤਾਂ ਫਿਰ ਕਿਸ ਨੂੰ ਪਤਾ ਹੋਵੇਗਾ। ਮਨਤਾਰ ਬਰਾੜ ਕੋਟਕਪੁਰਾ ਦਾ ਉਸ ਸਮੇਂ ਮੌਜੂਦਾ ਐਮ.ਐਲ.ਏ. ਸੀ ਤੇ ਇਸ ਨੇ ਉਸ ਗੋਲੀਕਾਂਡ ਵਾਲੀ ਰਾਤ 125 ਫ਼ੋਨ ਕੀਤੇ, ਸਭ ਕੁਝ ਇਨ੍ਹਾਂ ਨੂੰ ਪਤਾ ਸੀ ਕਿ ਇਹ ਸਭ ਕਿਵੇਂ ਹੋਇਆ ਹੈ।
Captain Amarinder Singh
ਉਨ੍ਹਾਂ ਕਿਹਾ ਕਿ ਅਸੀਂ ਇਨ੍ਹਾਂ ਘਟਨਾਵਾਂ ਦੀ ਜਾਂਚ ਲਈ ਐਸ.ਆਈ.ਟੀ. ਬਣਾਈ ਜੋ ਇਸ ਦੀ ਰਿਪੋਰਟ ਮੈਨੂੰ ਨਹੀਂ ਸਿੱਧਾ ਅਦਾਲਤ ਵਿਚ ਦੇਣਗੇ। ਪਰ ਇਨ੍ਹਾਂ ਨੇ ਭਾਜਪਾ ਨਾਲ ਰਲ ਕੇ ‘ਸਿੱਟ’ ਮੁਖੀ ਕੁੰਵਰ ਵਿਜੇ ਪ੍ਰਤਾਪ ਦੀ ਬਦਲੀ ਕਰਵਾ ਦਿਤੀ। ਉਨ੍ਹਾਂ ਕਿਹਾ ਕਿ ਸਿਰਫ਼ 2 ਹਫ਼ਤੇ ਰਹਿ ਗਏ ਹਨ, ਜਦੋਂ ਚੋਣਾਂ ਖ਼ਤਮ ਹੋ ਗਈਆਂ ਤਾਂ ਉਦੋਂ ਹੀ ਸਿੱਟ ਮੁਖੀ ਵਾਪਸ ਆਵੇਗਾ ਤੇ ਜਾਂਚ ਸ਼ੁਰੂ ਹੋਵੇਗੀ ਤੇ ਫਿਰ ਮੈਂ ਵੇਖਾਂਗਾ ਕਿ ਦੋਸ਼ੀ ਕਿੱਥੇ ਭੱਜਦੇ ਨੇ। ਬਹੁਤ ਨੁਕਸਾਨ ਹੋ ਚੁੱਕਿਆ ਹੈ ਸਾਡੇ ਪੰਜਾਬ ਦੇ ਵਿਚ, ਹੁਣ ਹੋਰ ਨਹੀਂ ਹੋਣ ਦੇਵਾਂਗਾ।
