ਨਵਾਂਸ਼ਹਿਰ 'ਚ ਐਨ.ਆਰ.ਆਈ ਦੇ ਘਰੋਂ ਹੈਂਡ ਗ੍ਰਨੇਡ ਮਿਲਿਆ, ਕੀਤਾ ਨਕਾਰਾ
ਨਵਾਂਸ਼ਹਿਰ/ਔੜ, 5 ਜੁਲਾਈ (ਦੀਦਾਰ ਸਿੰਘ ਸ਼ੇਤਰਾ, ਮਨਦੀਪ ਦੁੱਗਲ): ਪਿੰਡ ਮੀਰਪੁਰ ਲੱਖਾ ਦੇ ਐਨਆਰਆਈ ਗੁਰਦੇਵ ਸਿੰਘ ਦੇ ਘਰੋਂ 36 ਏ ਹੈਂਡ ਗ੍ਰਨੇਡ ਮਿਲਣ 'ਤੇ ਇਲਾਕੇ ਵਿਚ ਸਨਸਨੀ ਫੈਲ ਗਈ ਹੈ | ਜ਼ਿਕਰਯੋਗ ਹੈ ਕਿ ਐਨਆਰਆਈ ਗੁਰਦੇਵ ਸਿੰਘ ਪ੍ਰਵਾਰ ਸਣੇ ਕਾਫ਼ੀ ਲੰਮੇ ਸਮੇਂ ਤੋਂ ਵਿਦੇਸ਼ ਵਿਚ ਰਹਿੰਦੇ ਹਨ ਜਦਕਿ ਪਿੰਡ ਵਿਚ ਉਨ੍ਹਾਂ ਦੇ ਘਰ ਦੀ ਦੇਖਭਾਲ ਕਰ ਰਹੀ ਇਕ ਮਹਿਲਾ ਜਦੋਂ ਘਰ ਵਿਚ ਸਾਫ਼ ਸਫ਼ਾਈ ਕਰ ਰਹੀ ਸੀ ਤਾਂ ਉਸ ਨੂੰ ਘਰ 'ਚ ਬੰਬਨੁਮਾ ਚੀਜ਼ ਦਿਖੀ ਜੋ ਕਿ ਪੁਰਾਣੀ ਅਤੇ ਮਿੱਟੀ ਨਾਲ ਲਥਪਥ ਸੀ | ਮਹਿਲਾ ਵਲੋਂ ਇਹ ਜਾਣਕਾਰੀ ਪਿੰਡ ਦੇ ਸਰਪੰਚ ਹਰਪ੍ਰੀਤ ਸਿੰਘ ਨੂੰ ਦੇਣ 'ਤੇ ਉਨ੍ਹਾਂ ਪੁਲਿਸ ਥਾਣਾ ਔੜ ਦੇ ਐਸਐਚਓ ਰਘਬੀਰ ਸਿੰਘ ਨੂੰ ਇਹ ਸੂਚਨਾ ਦਿਤੀ | ਮੌਕੇ 'ਤੇ ਪੁੱਜੇ ਐਸਐਚਓ ਨੇ ਸਮੇਤ ਪੁਲਿਸ ਪਾਰਟੀ ਬੰਬਨੁਮਾ ਚੀਜ਼ ਨੂੰ ਕਬਜ਼ੇ ਵਿਚ ਲੈ ਕੇ ਉੱਚ ਅਧਿਕਾਰੀਆਂ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਸੰਪਰਕ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿਤੀ ਹੈ | ਇਹ ਬੰਬਨੁਮਾ ਚੀਜ਼ 36 ਏ ਹੈਂਡ ਗ੍ਰਨੇਡ ਹੈ ਜੋ ਕਿ ਚਲਣੋ ਬਚ ਗਿਆ ਜਿਸ ਨਾਲ ਕੋਈ ਜਾਨੀ ਜਾਂ ਮਾਲੀ ਨੁਕਸਾਨ ਹੋਣ ਤੋਂ ਬਚਾਅ ਹੋ ਗਿਆ | ਇਸ ਮੌਕੇ ਥਾਣਾ ਔੜ ਦੀ ਪੁਲਿਸ ਵਲੋਂ 36 ਏ ਹੈਂਡ ਗ੍ਰਨੇਡ ਨੂੰ ਮੱਲਪੁਰ ਦੇ ਪੁਰਾਣੇ ਬੰਦ ਪਏ ਭੱਠੇ ਕੋਲ ਜਾ ਕੇ ਬੰਬ ਡਿਫ਼ੂਜ਼ ਕਰਨ ਵਾਲੀ ਟੀਮ ਨਾਲ ਮਿਲ ਕੇ ਇਸ 36 ਏ ਹੈਂਡ ਗ੍ਰੇਨਡ ਨੂੰ ਖ਼ਤਮ ਕੀਤਾ ਅਤੇ ਇਲਾਕੇ ਦੇ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ |
