ਸਰਦੂਲਗੜ੍ਹ ਦੇ ਕ੍ਰਿਕਟਰ ਮਨਜਿੰਦਰ ਸਿੰਘ ਦੀ ਦਿੱਲੀ ਕੈਪੀਟਲਜ਼ ਲਈ ਚੋਣ
ਸਰਦੂਲਗੜ੍ਹ, 5 ਮਈ (ਵਿਨੋਦ ਜੈਨ) : ਇੰਡੀਅਨ ਪ੍ਰੀਮੀਅਰ ਲੀਗ ਦੀ ਟੀਮ ਲਈ ਖਿਡਾਰੀ ਮਨਜਿੰਦਰ ਸਿੰਘ ਦੀ ਚੋਣ ਹੋਣ ’ਤੇ ਸ਼ਹਿਰ ਵਾਸੀਆਂ ਨੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਹੈ। ਇਸ ਸਬੰਧੀ ਮਨਜਿੰਦਰ ਸਿੰਘ ਨੇ ਦਸਿਆ ਕਿ ਉਨ੍ਹਾਂ ਦੀ ਚੋਣ ਦਿੱਲੀ ਕੈਪੀਟਲਜ਼ ਟੀਮ ’ਚ ਪ੍ਰੈਕਟਿਸ ਗੇਂਦਬਾਜ਼ ਵਜੋਂ ਹੋਈ ਹੈ। ਅਗਲੇਰੇ ਆਈ.ਪੀ.ਐੱਲ. ਵਿਚ ਫਾਸਟ ਬਾਲਰ ਵਜੋਂ ਟੀਮ ਵਿਚ ਖੇਡਣ ਦੀ ਉਮੀਦ ਹੈ। ਉਨ੍ਹਾਂ ਦੀ ਕੋਚਿੰਗ ਮਲੇਨੀਅਮ ਸਕੂਲ ਮੋਹਾਲੀ ਤੋਂ ਹੋਈ ਹੈ, ਇਸ ਤੋਂ ਪਹਿਲਾਂ ਉਨ੍ਹਾਂ ਨੂੰ ਜ਼ਿਲ੍ਹਾ ਸਟੇਟ ਅਤੇ ਨੈਸ਼ਨਲ ਪੱਧਰ ਦੀਆਂ ਵੱਖ ਵੱਖ ਟੀਮਾਂ ਵਿਚ ਦੇਸ਼ ਅਤੇ ਵਿਦੇਸ਼ ਦੀ ਧਰਤੀ ਤੇ ਖੇਡਣ ਦਾ ਮੌਕਾ ਮਿਲਿਆ। ਉਨ੍ਹਾਂ ਕਿਹਾ ਕਿ ਇਸ ਕਾਮਯਾਬੀ ਵਿਚ ਉਨ੍ਹਾਂ ਦੇ ਪਿਤਾ ਸੁਰਜੀਤ ਸਿੰਘ, ਮਾਤਾ ਅਰਸ਼ਪ੍ਰੀਤ ਕੌਰ ਅਤੇ ਕੋਚ ਸੁਖਦੇਵ ਸਿੰਘ ਦਾ ਵੱਡਾ ਯੋਗਦਾਨ ਹੈ। ਸ਼ਹਿਰ ਦੇ ਵੱਖ ਵੱਖ ਧਾਰਮਿਕ, ਸਮਾਜਸੇਵੀ ਸੰਸਥਾਵਾਂ ਦੇ ਨੁਮਾਇੰਦਿਆਂ ਨੇ ਭਗਰੱਥ ਪਰਵਾਰ ਨੂੰ ਵਧਾਈਆਂ ਦਿਤੀਆਂ ਅਤੇ ਮਨਜਿੰਦਰ ਸਿੰਘ ਦੀ ਦਿਨ ਦੁੱਗਣੀ ਰਾਤ ਚੌਗੁਣੀ ਤਰੱਕੀ ਦੀ ਕਾਮਨਾ ਕੀਤੀ।
Mansa_5_M1Y_6_1_1
