ਸਥਾਨਕ ਤਹਿਸੀਲ ਅੰਦਰ ਰਜਿਸਟਰੀਆਂ ਦਰਜ ਕਰਵਾਉਣ ਆਏ ਲੋਕਾਂ ਨੇ ਤਹਿਸੀਲਦਾਰ ਵਲੋਂ ਰਜਿਸਟਰੀਆਂ ਕਰਨ ਸਮੇਂ ਮੀਟਿੰਗ ਦਾ ਬਹਾਨਾ ਲਾ ਕੇ ਜਾਣ ਤੋਂ...........
ਤਪਾ ਮੰਡੀ : ਸਥਾਨਕ ਤਹਿਸੀਲ ਅੰਦਰ ਰਜਿਸਟਰੀਆਂ ਦਰਜ ਕਰਵਾਉਣ ਆਏ ਲੋਕਾਂ ਨੇ ਤਹਿਸੀਲਦਾਰ ਵਲੋਂ ਰਜਿਸਟਰੀਆਂ ਕਰਨ ਸਮੇਂ ਮੀਟਿੰਗ ਦਾ ਬਹਾਨਾ ਲਾ ਕੇ ਜਾਣ ਤੋਂ ਬਾਅਦ ਵੱਡੀ ਪੱਧਰ ਉਪਰ ਰੋਸ ਜਤਾਉਣ ਦੇ ਨਾਲ ਤਹਿਸੀਲਦਾਰ ਦਾ ਘਿਰਾਉ ਕਰਨ ਦੀ ਵੀ ਅਸਫ਼ਲ ਕੋਸ਼ਿਸ਼ ਕੀਤੀ। ਭਾਕਿਯੂ ਏਕਤਾ ਉਗਰਾਹਾਂ ਦੇ ਬਲਵਿੰਦਰ ਸਿੰਘ ਧੋਲਾ ਦੀ ਅਗਵਾਈ ਵਿਚ ਇਕਠੇ ਹੋਏ ਜੋਗਿੰਦਰ ਸਿੰਘ, ਜਲ ਕੌਰ, ਜਸਵੀਰ ਕੌਰ, ਹਰਬੰਸ ਸਿੰਘ, ਜੱਸਾ ਸਿੰਘ, ਸੁਖਦੇਵ ਸਿੰਘ, ਬਲਦੇਵ ਸਿੰਘ, ਹਰਪਾਲ ਧੌਲਾ, ਇੰਦਰਪਾਲ ਸਿੰਘ ਨੇ ਵੱਡੀ ਗਿਣਤੀ ਵਿਚ ਤਹਿਸੀਲਦਾਰ ਗੁਰਮੁੱਖ ਸਿੰਘ ਵਿਰੁਧ ਜ਼ੋਰਦਾਰ ਨਾਹਰੇਬਾਜ਼ੀ ਕਰਦਿਆਂ ਕਿਹਾ ਕਿ ਸਰਕਾਰ ਤੇ
ਪ੍ਰਸ਼ਾਸਨ ਵਲੋਂ ਬੇਸ਼ੱਕ ਆਨਲਾਇਨ ਰਜਿਸਟਰੀਆਂ ਕਰਨ ਦਾ ਡਰਾਮਾ ਕੀਤਾ ਜਾ ਰਿਹਾ ਹੈ ਪਰ ਲੋਕਾਂ ਦੀ ਖੱਜਲ ਖੁਆਰੀ ਪਹਿਲਾ ਨਾਲੋਂ ਕਿਤੇ ਜ਼ਿਆਦਾ ਹੋ ਰਹੀ ਹੈ। ਮੁਜ਼ਾਹਰਾਕਾਰੀਆਂ ਨੇ ਦਸਿਆ ਕਿ ਤਹਿਸੀਲ ਅੰਦਰ ਸਵੇਰ ਤੋਂ ਅਪਣੀਆਂ ਰਜਿਸਟਰੀਆਂ ਦਰਜ ਕਰਵਾਉਣ ਲਈ ਆਨਲਾਇਨ ਅਪਲਾਈ ਕਰਨ ਉਪਰੰਤ ਮਿਲੀ ਅੱਜ ਦੀ ਤਾਰੀਖ ਕਾਰਨ ਤਹਿਸੀਲ ਕੰਪਲੈਕਸ ਅੰਦਰ ਪੁੱਜੇ ਜਦਕਿ ਦੋ ਵਜੇ ਤਕ ਤਾਂ ਰਜਿਸਟਰੀਆਂ ਦਰਜ ਕਰਨ ਦਾ ਕੰਮ ਇਸ ਲਈ ਰੁਕਿਆ ਰਿਹਾ ਕਿ ਤਹਿਸੀਲਦਾਰ ਅਪਣੀ ਸੀਟ ਉਪਰ ਹੀ ਨਹੀਂ ਪੁੱਜੇ ਸਨ ਜਦਕਿ ਉਸ ਤੋਂ ਬਾਅਦ ਤਹਿਸੀਲਦਾਰ ਗੁਰਮੱਖ ਸਿੰਘ ਵਲੋਂ ਕੁਝ ਕੁ ਰਜਿਸਟਰੀਆਂ ਉਪਰ ਦਸਤਖਤ
ਕਰਨ ਉਪਰੰਤ ਬਾਕੀ ਰਹਿੰਦੀਆਂ ਰਜਿਸਟਰੀਆਂ ਨੂੰ ਮੁੜ ਸੋਮਵਾਰ ਦਾ ਸਮਾਂ ਦੇਣ ਲਈ ਅਪਣੇ ਕਲਰਕ ਨੂੰ ਕਹਿ ਕੇ ਅਪਣੀ ਸੀਟ ਤੋ ਉਠ ਖੜ੍ਹੇ ਹੋ ਕੇ ਮੀਟਿੰਗ ਦਾ ਬਹਾਨਾ ਲਾ ਕੇ ਬਰਨਾਲਾ ਵੱਲ ਨੂੰ ਰਵਾਨਾ ਹੋਣਾ ਸ਼ੁਰੂ ਹੋਏ। ਲੋਕਾਂ ਨੇ ਇਹ ਵੀ ਕਿਹਾ ਕਿ ਤਹਿਸੀਲਦਾਰ ਇਹ ਵੀ ਕਹਿ ਰਹੇ ਹਨ ਕਿ ਉਨ੍ਹਾਂ ਨੇ ਇਥੋ ਅਪਣਾ ਤਬਾਦਲਾ ਕਰਵਾਉਦਾ ਹੇ ਜੇਕਰ ਤੁਸੀ ਮੇਰੀ ਸ਼ਿਕਾਇਤ ਕਰ ਦੇਵੋ ਤਦ ਤਬਾਦਲੇ ਵਿਚ ਅਸਾਨੀ ਹੋ ਜਾਵੇਗੀ। ਲੋਕਾਂ ਵਲੋਂ ਤਹਿਸੀਲਦਾਰ ਦੇ ਅੱਧ ਵੱਟੇ ਕੰਮ ਛੱਡਣ ਦੀ ਵਿਰੋਧਤਾ ਵੀ ਕੀਤੀ ਗਈ। ਮੁਜ਼ਾਹਰੇਕਾਰੀਆਂ ਨੇ ਇਹ ਵੀ ਦਸਿਆ ਕਿ ਮਾਮਲੇ ਸਬੰਧੀ ਡਿਪਟੀ ਕਮਿਸ਼ਨਰ ਬਰਨਾਲਾ ਧਰਮਪਾਲ ਗੁਪਤਾ ਨਾਲ ਵੀ ਸਪੰਰਕ
ਕਰਕੇ ਮੀਟਿੰਗ ਸਬੰਧੀ ਪੁੱਛਣ ਦੇ ਨਾਲ ਉਨ੍ਹਾਂ ਨੂੰ ਤਪਾ ਤਹਿਸੀਲ ਅੰਦਰਲੀ ਸਰਕਾਰੀ ਕੰਮਕਾਜ ਲਈ ਜੁੜੀ ਲੋਕਾਂ ਦੀ ਭੀੜ ਤੋਂ ਵੀ ਜਾਣੂ ਕਰਵਾਇਆ ਗਿਆ ਪਰ ਡੀ.ਸੀ ਬਰਨਾਲਾ ਨੇ ਸਪੱਸ਼ਟ ਕੀਤਾ ਕਿ ਬਰਨਾਲਾ ਦਫ਼ਤਰ ਵਿਖੇ ਤਹਿਸੀਲਦਾਰ ਨਾਲ ਕੋਈ ਮੀਟਿੰਗ ਨਹੀ ਹੈ। ਲੋਕਾਂ ਨੇ ਸਰਕਾਰ ਅਤੇ ਉਚ ਅਧਿਕਾਰੀਆਂ ਤੋਂ ਅਜਿਹੇ ਡਿਊਟੀ ਵਿਚ ਕੁਤਾਹੀ ਵਰਤਣ ਵਾਲੇ ਅਧਿਕਾਰੀ ਵਿਰੁਧ ਵਿਭਾਗੀ ਕਾਰਵਾਈ ਦੀ ਮੰਗ ਕੀਤੀ ਹੈ। ਉਧਰ ਡੀ.ਸੀ ਬਰਨਾਲਾ ਸ੍ਰੀ ਗੁਪਤਾ ਨੇ ਕਿਹਾ ਕਿ ਉਹ ਤਹਿਸੀਲਦਾਰ ਨੂੰ ਇਸ ਮਾਮਲੇ ਸਬੰਧੀ ਜਵਾਬਦੇਹ ਬਣਾਉਣਗੇ ਜਦਕਿ ਲੋਕਾਂ ਦੀ ਖੱਜਲ ਖੁਆਰੀ ਸਹਿਣ ਨਹੀਂ ਕੀਤੀ ਜਾਵੇਗੀ।
