ਬੱਚਿਆਂ ਲਈ ਮਾਂ ਸਭ ਤੋਂ ਬਿਹਤਰ ਸਰਪ੍ਰਸਤ ਹੁੰਦੀ ਹੈ, ਉਸ ਤੋਂ ਬਿਹਤਰ ਪਰਵਰਿਸ਼ ਕੋਈ...
ਚੰਡੀਗੜ੍ਹ : ਬੱਚਿਆਂ ਲਈ ਮਾਂ ਸਭ ਤੋਂ ਬਿਹਤਰ ਸਰਪ੍ਰਸਤ ਹੁੰਦੀ ਹੈ, ਉਸ ਤੋਂ ਬਿਹਤਰ ਪਰਵਰਿਸ਼ ਕੋਈ ਰਿਸ਼ਤੇਦਾਰ ਨਹੀਂ ਦੇ ਸਕਦੇ ਹੈ। ਹਾਈਕੋਰਟ ਦਾ ਬੱਚਿਆਂ ਦੇ ਫੁੱਫੜ ਨੂੰ ਨਿਰਦੇਸ਼ ਜਾਰੀ। ਪੰਜਾਬ-ਹਰਿਆਣਾ ਹਾਈਕੋਰਟ ਨੇ ਇਹ ਟਿੱਪਣੀ ਕਰਦੇ ਹੋਏ ਦੋ ਬੱਚਿਆਂ ਦੀ ਕਸਟਡੀ ਭੂਆ-ਫੁੱਫੜ ਤੋਂ ਲੈ ਕੇ ਬੱਚਿਆਂ ਨੂੰ ਵਾਪਸ ਮਾਂ ਨੂੰ ਸੌਂਪਣ ਦੇ ਹੁਕਮ ਦਿਤੇ ਹਨ। ਕਪੂਰਥਲਾ ਨਿਵਾਸੀ ਬੱਚਿਆਂ ਦੀ ਮਾਂ ਨੇ ਮੰਗ ਦਾਇਰ ਕਰਦੇ ਹੋਏ ਕਿਹਾ ਸੀ ਕਿ ਉਸ ਦਾ ਵਿਆਹ 2007 ਵਿਚ ਹੋਇਆ ਸੀ।
ਉਸ ਦੇ ਪਤੀ ਇਟਲੀ ਵਿਚ ਰਹਿ ਰਹੇ ਸਨ ਅਤੇ ਨਾ ਤਾਂ ਉਹ ਉਸ ਨੂੰ ਅਤੇ ਨਾ ਹੀ ਬੱਚਿਆਂ ਲਈ ਕਿਸੇ ਤਰ੍ਹਾਂ ਦੀ ਕੋਈ ਮਦਦ ਭੇਜਦੇ ਸਨ। ਇਹ ਸਭ ਵੇਖਦੇ ਹੋਏ ਪਟੀਸ਼ਨਰ ਬੱਚਿਆਂ ਦੇ ਨਾਲ ਅਪਣੇ ਭਰਾ ਦੇ ਕੋਲ ਮਲੇਸ਼ੀਆ ਚਲੀ ਗਈ। ਪਟੀਸ਼ਨਰ ਦਾ ਪਤੀ ਭਾਰਤ ਪਰਤਿਆ ਤਾਂ ਉਸ ਨੇ ਪਤਨੀ ਦੇ ਖਿਲਾਫ਼ ਸੋਨਾ ਚੋਰੀ ਕਰਨ ਦੀ ਐਫ਼ਆਈਆਰ ਦਰਜ ਕਰਵਾ ਦਿਤੀ। ਜਦੋਂ ਔਰਤ ਭਾਰਤ ਵਾਪਸ ਆਈ ਤਾਂ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਇਸ ਸਮੇਂ ਦੌਰਾਨ ਮਾਂ ਦੇ ਜੇਲ੍ਹ ਵਿਚ ਹੋਣ ਦੇ ਚਲਦੇ ਬੱਚਿਆਂ ਦੀ ਕਸਟਡੀ ਉਸ ਦੇ ਪਿਤਾ ਨੂੰ ਸੌਂਪ ਦਿਤੀ ਗਈ। ਪਿਤਾ ਬੱਚਿਆਂ ਨੂੰ ਅਪਣੇ ਭੈਣ-ਭਣੌਈਆ ਦੇ ਹਵਾਲੇ ਕਰ ਕੇ ਇਟਲੀ ਚਲਾ ਗਿਆ। ਮਾਂ ਨੇ ਜ਼ਮਾਨਤ ਉਤੇ ਬਾਹਰ ਆਉਣ ਤੋਂ ਬਾਅਦ ਹਾਈਕੋਰਟ ਵਿਚ ਮੰਗ ਦਾਇਰ ਕਰਦੇ ਹੋਏ ਬੱਚਿਆਂ ਦੀ ਕਸਟਡੀ ਸੌਂਪਣ ਦੀ ਅਪੀਲ ਕੀਤੀ। ਮੰਗ ਉਤੇ ਸੁਣਵਾਈ ਦੇ ਦੌਰਾਨ ਪਟੀਸ਼ਨਰ ਨੇ ਦੱਸਿਆ ਕਿ ਉਹ ਸਕੂਲ ਵਿਚ ਬੱਚੀਆਂ ਨੂੰ ਮਿਲੀ ਸੀ ਅਤੇ ਬੱਚੇ ਉੱਥੇ ਬਿਹਤਰ ਮਹਿਸੂਸ ਨਹੀਂ ਕਰ ਰਹੇ ਹਨ।
ਨਾਲ ਹੀ ਪਟੀਸ਼ਨਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਬਿਹਤਰ ਸਿੱਖਿਆ ਅਤੇ ਸੁਵਿਧਾਵਾਂ ਵੀ ਉਪਲੱਬਧ ਨਹੀਂ ਕਰਵਾਈਆਂ ਜਾ ਰਹੀਆਂ ਹਨ। ਇਸ ਉਤੇ ਬੱਚਿਆਂ ਦੇ ਫੁੱਫੜ ਅਤੇ ਭੂਆ ਨੇ ਜਵਾਬ ਦਰਜ ਕਰਦੇ ਹੋਏ ਕਿਹਾ ਕਿ ਬੱਚਿਆਂ ਨੂੰ ਸਿੱਖਿਆ ਅਤੇ ਸੁਵਿਧਾਵਾਂ ਉਪਲੱਬਧ ਕਰਵਾਈਆਂ ਜਾ ਰਹੀਆਂ ਹਨ ਜਿਸ ਦਾ ਖ਼ਰਚ ਬੱਚਿਆਂ ਦੇ ਪਿਤਾ ਤੇ ਭੈਣ ਕਰ ਰਹੇ ਹਨ। ਹਾਈਕੋਰਟ ਨੇ ਦੋਵਾਂ ਪੱਖਾਂ ਨੂੰ ਸੁਣਨ ਤੋਂ ਬਾਅਦ ਅਪਣੇ ਹੁਕਮ ਵਿਚ ਕਿਹਾ ਕਿ ਭੂਆ ਅਤੇ ਫੁੱਫੜ ਮਾਂ ਦੀ ਪਰਵਰਿਸ਼ ਦਾ ਸਥਾਨ ਨਹੀਂ ਲੈ ਸਕਦੇ ਹਨ।
ਮਾਂ ਦੀ ਪੁਲਿਸ ਹਿਰਾਸਤ ਦੇ ਕਾਰਨ ਅਸਥਾਈ ਕਸਟਡੀ ਪਿਤਾ ਨੂੰ ਦਿਤੀ ਗਈ ਸੀ। ਹੁਣ ਜਦੋਂ ਮਾਂ ਜੇਲ੍ਹ ਤੋਂ ਬਾਹਰ ਹੈ ਤਾਂ ਉਸ ਤੋਂ ਬਿਹਤਰ ਪਰਵਰਿਸ਼ ਬੱਚਿਆਂ ਨੂੰ ਕੋਈ ਹੋਰ ਰਿਸ਼ਤੇਦਾਰ ਨਹੀਂ ਦੇ ਸਕਦਾ। ਹਾਲਾਂਕਿ ਕੋਰਟ ਨੇ ਕਸਟਡੀ ਮਾਂ ਨੂੰ ਸੌਂਪਦੇ ਹੋਏ ਇਹ ਹੁਕਮ ਦਿਤਾ ਕਿ ਇਹ ਹੁਕਮ ਕੇਵਲ ਪਿਤਾ ਦੇ ਵਿਦੇਸ਼ ਰਹਿੰਦੇ ਹੀ ਹੈ। ਐਸਐਸਪੀ ਕਪੂਰਥਲਾ ਨੂੰ ਇਕ ਹਫ਼ਤੇ ਦੇ ਅੰਦਰ ਬੱਚਿਆਂ ਦੀ ਕਸਟਡੀ ਮਾਂ ਨੂੰ ਸੌਂਪਣ ਦੇ ਹੁਕਮ ਦਾ ਪਾਲਣ ਕਰਨ ਨੂੰ ਕਿਹਾ ਗਿਆ ਹੈ।
