7 ਨਵੰਬਰ ਨੂੰ ਹੋਵੇਗੀ ਪਹਿਲੀ ਨਿਲਾਮੀ
ਚੰਡੀਗੜ੍ਹ: ਹਾਰਸ ਸ਼ੋਅ ਇਸ ਵਾਰ ਚੰਡੀਗੜ੍ਹ ’ਚ ਘੋੜੇ ਦੇ ਸ਼ੌਕੀਨ ਲੋਕਾਂ ਲਈ ਨਵਾਂ ਕੁੱਝ ਲੈ ਕੇ ਆਇਆ ਹੈ। ਇਸ ਸ਼ੋਅ ਦੌਰਾਨ ਘੋੜਿਆਂ ਦੀ ਖੁੱਲ੍ਹੀ ਨਿਲਾਮੀ ਕੀਤੀ ਜਾਵੇਗੀ। ਇਹ ਗੱਲ ਪ੍ਰੈੱਸ ਕਾਨਫਰੰਸ ਦੌਰਾਨ ਬੱਬੀ ਬਾਦਲ ਫਾਊਂਡੇਸ਼ਨ ਦੇ ਸੰਸਥਾਪਕ ਹਰਸੁਖਇੰਦਰ ਸਿੰਘ ਬੱਬੀ ਬਾਦਲ ਨੇ ਕਹੀ। ਹਾਰਸ ਸ਼ੋਅ ਦੌਰਾਨ ਲੋਕ ਘੋੜਿਆਂ ਨੂੰ ਖ਼ਰੀਦ ਅਤੇ ਵੇਚ ਸਕਦੇ ਹਨ। ਬੱਬੀ ਨੇ ਦੱਸਿਆ ਕਿ ਨਿਲਾਮੀ ’ਚ ਗਰਮ ਬਲੱਡ, ਅਰੇਬੀਅਨ, ਜਿਪਸੀਜ਼, ਮਾਰਵਾੜੀ, ਮਿਨੀਏਚਰ ਪੋਨੀਜ਼ ਆਦਿ ਨਸਲ ਦੇ ਘੋੜੇ ਸ਼ਾਮਲ ਹੋਣ ਲਈ ਆਉਣਗੇ। ਇਸ ਦੇ ਨਾਲ ਹੀ 7 ਨਵੰਬਰ ਨੂੰ ਆਲ ਇੰਡੀਆ ਪੱਧਰ ’ਤੇ ਖੇਡਾਂ ਅਤੇ ਦੁਰਲੱਭ ਨਸਲਾਂ ਦੇ ਘੋੜਿਆਂ ਦੀ ਪਹਿਲੀ ਨਿਲਾਮੀ ਹੋਵੇਗੀ।
ਇਹ ਸਾਰਿਆਂ ਲਈ ਇਕ ਖੁੱਲ੍ਹੀ ਨਿਲਾਮੀ ਹੋਵੇਗੀ, ਜਿਸ 'ਚ ਕੋਈ ਵੀ ਹਿੱਸਾ ਲੈ ਸਕਦਾ ਹੈ। ਨਿਲਾਮੀ ਸਵੇਰੇ 11 ਵਜੇ ਸ਼ੁਰੂ ਹੋਵੇਗੀ, ਬੋਲੀ ਲਈ ਕੋਈ ਵੀ ਪ੍ਰਾਈਜ਼ ਰਿਜ਼ਰਵ ਨਹੀਂ ਕੀਤਾ ਗਿਆ ਹੈ। ਇਹ ਪ੍ਰਾਈਜ਼ ਆਨ ਸਪੌਟ ਹੀ ਡਿਸਾਈਡ ਕੀਤਾ ਜਾਵੇਗਾ।
ਇਸ ਦੇ ਨਾਲ ਹੀ ਦੀਪਇੰਦਰ ਸਿੰਘ ਬਰਾੜ ਨੇ ਦੱਸਿਆ ਕਿ ਹੋਮਲੈਂਡ ਚੰਡੀਗੜ੍ਹ ਹਾਰਸ ਸ਼ੋਅ ਖੇਤਰ ਦਾ ਇਕ ਪ੍ਰਮੁੱਖ ਘੋੜਸਵਾਰੀ ਉਤਸਵ ਹੈ, ਜੋ ਜਨਤਾ ਲਈ ਕਾਰਨੀਵਾਲ ਤਜੁਰਬੇ ਨਾਲ ਜੋੜਿਆ ਜਾਵੇਗਾ। ਇਸ ਮੌਕੇ ਰਣਜੀਤ ਬਰਾੜ ਵੀ ਮੌਜੂਦ ਸਨ। ਉਨ੍ਹਾਂ ਦੱਸਿਆ ਕਿ ਬੱਚਿਆਂ ਲਈ ਮਿਨੀਏਚਰ ਪੋਨੀਜ਼ ਹਾਰਸ ਵੀ ਆਉਣਗੇ, ਜੋ ਕਿ ਬੱਚਿਆਂ ਲਈ ਖਿੱਚ ਦਾ ਕੇਂਦਰ ਹੋਣਗੇ।
