ਪਟਨਾ,
30 ਅਗੱਸਤ : 13 ਸਾਲ ਪਹਿਲਾਂ ਯਾਨੀ ਸਾਲ 2004 ਵਿਚ ਬਿਹਾਰ ਦੇ ਸੀਵਾਨ ਜ਼ਿਲ੍ਹੇ ਵਿਚ
ਚੰਦਰਸ਼ੇਖ਼ਰ ਪ੍ਰਸਾਦ ਉਰਫ਼ ਚੰਦਾ ਬਾਬੂ ਦੇ ਦੋ ਬੇਟਿਆਂ ਨੂੰ ਅਗੱਸਤ 2004 ਦੇ ਦਿਨ ਤੇਜ਼ਾਬ
ਪਾ ਕੇ ਮਾਰ ਦਿਤਾ ਗਿਆ ਸੀ। ਉਹ ਤੜਫ਼ਦੇ ਤੜਫ਼ਦੇ ਰਹਿਮ ਦੀ ਭੀਖ ਮੰਗ ਰਹੇ ਸਨ ਪਰ ਦੋਸ਼ੀ
ਸ਼ਹਾਬੂਦੀਨ ਨੇ ਅਪਣੀਆਂ ਅੱਖਾਂ ਸਾਹਮਣੇ ਉਨ੍ਹਾਂ ਨੂੰ ਤੇਜ਼ਾਬ ਨਾਲ ਨੁਹਾ ਕੇ ਮਾਰ ਦਿਤਾ
ਸੀ।
ਇਸ ਕਾਂਡ ਵਿਚ ਅੱਜ ਪਟਨਾ ਹਾਈ ਕੋਰਟ ਨੇ ਅਪਣਾ ਫ਼ੈਸਲਾ ਸੁਣਾਉਂਦਿਆਂ ਮੁਹੰਮਦ
ਸ਼ਹਾਬੂਦੀਨ ਦੀ ਪਟੀਸ਼ਨ ਰੱਦ ਕਰ ਦਿਤੀ। ਅਦਾਲਤ ਨੇ ਕਿਹਾ ਕਿ ਸਿਵਾਨ ਕੋਰਟ ਦੁਆਰਾ ਸੁਣਾਈ
ਸਜ਼ਾ ਇਸ ਮਾਮਲੇ ਵਿਚ ਬਰਕਰਾਰ ਰਹੇਗੀ। ਇਸ ਮਾਮਲੇ ਵਿਚ ਬਾਹੂਬਲੀ ਅਤੇ ਆਰਜੇਡੀ ਦਾ ਸਾਬਕਾ
ਸੰਸਦ ਮੈਂਬਰ ਸ਼ਹਾਬੂਦੀਨ ਫ਼ਿਲਹਾਲ ਦਿੱਲੀ ਦੀ ਤਿਹਾੜ ਜੇਲ ਵਿਚ ਬੰਦ ਹੈ ਅਤੇ ਹੁਣ ਉਸ ਦੀ
ਉਮਰ ਕੈਦ ਦੀ ਸਜ਼ਾ ਬਰਕਰਾਰ ਰਹੇਗੀ। ਉਸ ਨੂੰ ਹੇਠਲੀ ਅਦਾਲਤ ਦੁਆਰਾ ਸਜ਼ਾ ਸੁਣਾਈ ਗਈ ਸੀ।
ਸਜ਼ਾ ਦੇ ਫ਼ੈਸਲੇ ਨੂੰ ਚੁਨੌਤੀ ਦਿੰਦਿਆਂ ਸ਼ਹਾਬੂਦੀਨ ਦੇ ਵਕੀਲ ਨੇ ਪਟੀਸ਼ਨ ਦਾਖ਼ਲ ਕੀਤੀ ਸੀ।
ਹਾਈ ਕੋਰਟ ਨੇ ਮਾਮਲੇ ਦੀ ਸੁਣਵਾਈ ਕਰਦਿਆਂ 30 ਜੂਨ 2017 ਨੂੰ ਹੀ ਸਜ਼ਾ 'ਤੇ ਫ਼ੈਸਲਾ
ਸੁਰੱਖਿਅਤ ਰੱਖ ਲਿਆ ਸੀ। ਤੇਜ਼ਾਬ ਹਤਿਆ ਕਾਂਡ ਵਿਚ ਰਾਜਕੁਮਾਰ ਸ਼ਾਹ, ਮੀਆਂ ਅਤੇ ਸ਼ੇਖ਼ ਅਸਲਮ
ਨੂੰ ਵੀ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਅੱਜ ਦੇ ਫ਼ੈਸਲੇ ਤੋਂ ਬਾਅਦ ਚੰਦਾ ਬਾਬੂ ਨੇ
ਕਿਹਾ ਕਿ ਸ਼ਹਾਬੂਦੀਨ ਨੂੰ ਫਾਂਸੀ ਦੀ ਸਜ਼ਾ ਮਿਲਣੀ ਚਾਹੀਦੀ ਹੈ। (ਏਜੰਸੀ)
