ਮੁੰਬਈ, 11 ਸਤੰਬਰ :
ਬਲਾਤਕਾਰ ਪੀੜਤਾ 13 ਸਾਲਾ ਕੁੜੀ ਦੇ ਨਵਜਨਮੇ ਬੱਚੇ ਦੀ ਮਹਿਜ਼ 48 ਘੰਟਿਆਂ ਮਗਰੋਂ ਸਰਕਾਰੀ
ਹਸਪਤਾਲ ਵਿਚ ਮੌਤ ਹੋ ਗਈ। ਹਾਈ ਕੋਰਟ ਨੇ ਕੁੜੀ ਨੂੰ 32 ਹਫ਼ਤਿਆਂ ਦਾ ਗਰਭ ਡੇਗਣ ਦੀ
ਇਜਾਜ਼ਤ ਦੇ ਦਿਤੀ ਸੀ।
ਡਾਕਟਰਾਂ ਨੇ ਪਹਿਲਾਂ ਦਸਿਆ ਸੀ ਕਿ ਸ਼ੁਕਰਵਾਰ ਨੂੰ ਆਪਰੇਸ਼ਨ ਤੋਂ
ਬਾਅਦ ਪੀੜਤਾ ਨੇ ਬੱਚੇ ਨੂੰ ਜਨਮ ਦਿਤਾ ਜਿਸ ਦਾ ਵਜ਼ਨ 1.8 ਕਿਲੋ ਸੀ। ਕਲ ਸਵੇਰੇ ਲਗਭਗ
ਸਾਢੇ 10 ਵਜੇ ਬੱਚੇ ਦੀ ਮੌਤ ਹੋ ਗਈ। ਹਸਪਤਾਲ ਦੇ ਸੂਤਰਾਂ ਨੇ ਦਸਿਆ ਕਿ ਬੱਚੇ ਦੇ ਅੰਗ
ਪੂਰੀ ਤਰ੍ਹਾਂ ਵਿਕਸਤ ਨਹੀਂ ਹੋਏ ਸਨ। ਪੀੜਤਾ ਸਤਵੀਂ ਜਮਾਤ ਦੀ ਵਿਦਿਆਰਥਣ ਹੈ ਅਤੇ ਮੁੰਬਈ
ਦੀ ਰਹਿਣ ਵਾਲੀ ਹੈ। ਕਾਨੂੰਨਨ 20 ਹਫ਼ਤਿਆਂ ਤੋਂ ਵੱਧ ਸਮੇਂ ਦਾ ਗਰਭ ਡੇਗਣ 'ਤੇ ਰੋਕ ਹੈ,
ਇਸ ਲਈ ਪੀੜਤਾ ਨੂੰ ਇਜਾਜ਼ਤ ਵਾਸਤੇ ਅਦਾਲਤ ਜਾਣਾ ਪਿਆ। ਜੱਜ ਨੇ ਜੋਖਮ ਦੇ ਕਾਰਨਾਂ ਨੂੰ
ਸਮਝਦਿਆਂ ਹਸਪਤਾਲ ਨੂੰ ਕਿਹਾ ਸੀ ਕਿ ਉਹ ਗਰਭਪਾਤ ਤੋਂ ਇਕ ਦਿਨ ਪਹਿਲਾਂ ਹੀ ਕੁੜੀ ਨੂੰ
ਭਰਤੀ ਕਰ ਲੈਣ। ਡਾਕਟਰਾਂ ਨੇ ਕਿਹਾ ਕਿ ਕੁੜੀ ਦੇ ਮਾਪੇ ਪਹਿਲਾਂ ਤਾਂ ਗਰਭਪਾਤ ਲਈ ਤਿਆਰ
ਸਨ ਪਰ ਬਾਅਦ ਵਿਚ ਬੱਚੇ ਨੂੰ ਰੱਖਣ ਬਾਰੇ ਸੋਚਣ ਲੱਗ ਪਏ। ਕੁੜੀ ਨਾਲ ਕਥਿਤ ਤੌਰ 'ਤੇ ਉਸ
ਦੇ ਪਿਤਾ ਦੇ ਦੋਸਤ ਨੇ ਬਲਾਤਕਾਰ ਕੀਤਾ ਸੀ। ਪਰਵਾਰ ਨੂੰ ਪਿਛਲੇ ਮਹੀਨੇ ਹੀ ਪਤਾ ਲੱਗਾ ਸੀ
ਕਿ ਕੁੜੀ ਗਰਭਵਤੀ ਹੈ। (ਏਜੰਸੀ)
