ਦਰਅਸਲ, ਵੇਟਰ ਦੀ ਗਲਤੀ ਸਿਰਫ ਇਹ ਸੀ ਕਿ ਉਸਨੇ ਯਾਤਰੀ ਨੂੰ ਵੈਜ ਦੀ ਬਜਾਏ ਨਾਨ-ਵੈਜ ਖਾਣਾ ਦੇ ਦਿੱਤਾ ਸੀ
Vande Bharat Express : ਵੰਦੇ ਭਾਰਤ ਐਕਸਪ੍ਰੈਸ ਟਰੇਨ ਵਿੱਚ ਇੱਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਵੈਸੇ ਤਾਂ ਖਾਣੇ ਨੂੰ ਲੈ ਕੇ ਵੰਦੇ ਭਾਰਤ ਐਕਸਪ੍ਰੈਸ ਵਿੱਚ ਅਕਸਰ ਹੰਗਾਮਾ ਹੁੰਦਾ ਰਹਿੰਦਾ ਹੈ। ਇਸ ਵਾਰ ਵੈਜ ਦੀ ਬਜਾਏ ਨਾਨ-ਵੈਜ ਖਾਣਾ ਮਿਲਣ 'ਤੇ ਇਕ ਯਾਤਰੀ ਨੇ ਵੇਟਰ 'ਤੇ ਹੱਥ ਉਠਾ ਦਿੱਤਾ। ਯਾਤਰੀ ਨੇ ਗੁੱਸੇ ਵਿੱਚ ਆ ਕੇ ਵੇਟਰ ਨੂੰ ਥੱਪੜ ਮਾਰ ਦਿੱਤਾ।
ਦਰਅਸਲ, ਵੇਟਰ ਦੀ ਗਲਤੀ ਸਿਰਫ ਇਹ ਸੀ ਕਿ ਉਸਨੇ ਯਾਤਰੀ ਨੂੰ ਵੈਜ ਦੀ ਬਜਾਏ ਨਾਨ-ਵੈਜ ਖਾਣਾ ਦੇ ਦਿੱਤਾ ਸੀ। ਵੇਟਰ ਤੋਂ ਨਾਰਾਜ਼ ਯਾਤਰੀ ਨੇ ਟਰੇਨ 'ਚ ਹੀ ਹੰਗਾਮਾ ਕਰ ਦਿੱਤਾ। ਇਹ ਘਟਨਾ ਹਾਵੜਾ ਅਤੇ ਰਾਂਚੀ ਵਿਚਕਾਰ ਵਾਪਰੀ। ਸਫ਼ਰ ਦੌਰਾਨ ਵੇਟਰ ਯਾਤਰੀ ਕੋਲ ਖਾਣਾ ਲੈ ਕੇ ਪਹੁੰਚ ਗਿਆ। ਯਾਤਰੀ ਨੇ ਡੱਬੇ 'ਤੇ ਦਿੱਤੀਆਂ ਹਦਾਇਤਾਂ ਨੂੰ ਪੜ੍ਹੇ ਬਿਨਾਂ ਖਾਣਾ ਸ਼ੁਰੂ ਕਰ ਦਿੱਤਾ। ਇਸ ਤੋਂ ਬਾਅਦ ਉਸ ਨੇ ਵੇਟਰ ਨੂੰ ਬੁਲਾਇਆ ਅਤੇ ਟਰੇਨ 'ਚ ਹੰਗਾਮਾ ਕਰਨਾ ਸ਼ੁਰੂ ਕਰ ਦਿੱਤਾ।
ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ
ਟਰੇਨ 'ਚ ਸਫਰ ਕਰ ਰਹੇ ਇਕ ਹੋਰ ਯਾਤਰੀ ਨੇ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਸ਼ੇਅਰ ਕੀਤੀ ਹੈ। ਇਸ ਵੀਡੀਓ ਦੇ ਕੈਪਸ਼ਨ 'ਚ ਉਸ ਨੇ ਲਿਖਿਆ, "ਇਹ ਸਕਸ਼ ਸ਼ਾਕਾਹਾਰੀ ਹੈ ਅਤੇ ਉਸ ਨੂੰ ਮਾਸਾਹਾਰੀ ਪਰੋਸਿਆ ਗਿਆ। ਇਸ ਨਾਲ ਉਹ ਗੁੱਸੇ 'ਚ ਆ ਗਿਆ ਅਤੇ ਵੇਟਰ ਨੂੰ ਥੱਪੜ ਮਾਰ ਦਿੱਤਾ।" ਵੀਡੀਓ 'ਚ ਨਜ਼ਰ ਆ ਰਿਹਾ ਯਾਤਰੀ ਕਾਫੀ ਗੁੱਸੇ 'ਚ ਸੀ ਅਤੇ ਵਾਰ-ਵਾਰ ਵੇਟਰ ਨੂੰ ਮੁਆਫੀ ਮੰਗਣ ਲਈ ਕਹਿ ਰਿਹਾ ਸੀ।
ਹਾਲਾਂਕਿ ਵੇਟਰ ਇਸ ਗਲਤੀ ਲਈ ਯਾਤਰੀ ਤੋਂ ਮੁਆਫੀ ਮੰਗਦਾ ਦੇਖਿਆ ਗਿਆ। ਟਰੇਨ ਵਿੱਚ ਮੌਜੂਦ ਹੋਰ ਯਾਤਰੀਆਂ ਨੇ ਵੇਟਰ ਦਾ ਪੱਖ ਲਿਆ। ਇੱਕ ਵਿਅਕਤੀ ਨੇ ਉਸ ਯਾਤਰੀ ਦੀ ਪਿੱਠ 'ਤੇ ਮਾਰਿਆ ਅਤੇ ਉਸਨੂੰ ਵੇਟਰ ਤੋਂ ਮੁਆਫੀ ਮੰਗਣ ਲਈ ਕਿਹਾ। ਉਸ ਵਿਅਕਤੀ ਨੇ ਯਾਤਰੀ ਨੂੰ ਕਿਹਾ ਕਿ ਪੈਕੇਟ 'ਤੇ ਲਿਖਿਆ ਹੁੰਦਾ ਹੈ ਕਿ ਖਾਣਾ ਸ਼ਾਕਾਹਾਰੀ ਹੈ ਜਾਂ ਨਹੀਂ। ਇਸ ਘਟਨਾ ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਯੂਜ਼ਰਸ ਆਪਣੀ ਵੱਖ-ਵੱਖ ਰਾਏ ਦੇ ਰਹੇ ਹਨ। ਇਕ ਯੂਜ਼ਰ ਨੇ ਕਿਹਾ ਕਿ ਵੇਟਰ ਤੁਹਾਡੇ ਨਾਲੋਂ ਗਰੀਬ ਹੈ ਅਤੇ ਤੁਹਾਡੇ ਨਾਲ ਲੜ ਨਹੀਂ ਸਕਦਾ, ਇਸ ਲਈ ਤੁਸੀਂ ਉਸ 'ਤੇ ਆਪਣਾ ਗੁੱਸਾ ਨਹੀਂ ਕੱਢ ਸਕਦੇ।
