ਇੱਕ ਵਿਦਿਆਰਥਣ ਨੇ ਸਵਾਲ ਪੁੱਛਿਆ ਸੀ ਕਿ ਸਰਕਾਰ ਸੈਨੀਟੇਰੀ ਪੈਡ ਕਿਉਂ ਨਹੀਂ ਮੁਹੱਈਆ ਕਰਵਾ ਸਕਦੀ
ਨਵੀਂ ਦਿੱਲੀ - ਕੌਮੀ ਮਹਿਲਾ ਕਮਿਸ਼ਨ (NCW) ਨੇ ਸਸਤੇ ਸੈਨੀਟੇਰੀ ਨੈਪਕਿਨ ਬਾਰੇ ਪੁੱਛਣ ਵਾਲੀ ਵਿਦਿਆਰਥਣ 'ਤੇ ਕੀਤੀ ਗਈ 'ਅਣਉਚਿਤ ਅਤੇ ਬੇਹੱਦ ਇਤਰਾਜ਼ਯੋਗ' ਟਿੱਪਣੀ ਨੂੰ ਲੈ ਕੇ ਸੀਨੀਅਰ ਆਈ.ਏ.ਐਸ. ਅਧਿਕਾਰੀ ਤੋਂ ਸਪੱਸ਼ਟੀਕਰਨ ਮੰਗਿਆ ਹੈ।
ਦਰਅਸਲ ਇਹ ਮਾਮਲਾ ਬਿਹਾਰ ਦਾ ਹੈ, ਜਿੱਥੇ ਇੱਕ ਵਿਦਿਆਰਥਣ ਨੇ ਸਵਾਲ ਪੁੱਛਿਆ ਸੀ ਕਿ ਸਰਕਾਰ ਸੈਨੀਟੇਰੀ ਪੈਡ ਕਿਉਂ ਨਹੀਂ ਮੁਹੱਈਆ ਕਰਵਾ ਸਕਦੀ, ਤਾਂ ਮਹਿਲਾ ਆਈ.ਏ.ਐਸ. ਅਧਿਕਾਰੀ ਹਰਜੋਤ ਕੌਰ ਭਮਰਾ ਨੇ ਜਵਾਬ ਦਿੱਤਾ ਸੀ, “ਕੱਲ੍ਹ ਨੂੰ ਤੁਸੀਂ ਪਰਿਵਾਰ ਨਿਯੋਜਨ ਦੀ ਉਮਰ 'ਚ ਪਹੁੰਚ ਜਾਓਗੇ, ਤਾਂ ਤੁਸੀਂ ਉਮੀਦ ਕਰੋਗੇ ਕਿ ਸਰਕਾਰ ‘ਨਿਰੋਧ’ (ਕੰਡੋਮ) ਵੀ ਪ੍ਰਦਾਨ ਕਰੇਗੀ।"
ਮਹਿਲਾ ਕਮਿਸ਼ਨ ਦਾ ਕਹਿਣਾ ਹੈ ਕਿ ਉਸ ਨੇ ਪਾਇਆ ਹੈ ਕਿ ਇੱਕ ਜ਼ਿੰਮੇਵਾਰ ਅਹੁਦੇ 'ਤੇ ਬੈਠੇ ਵਿਅਕਤੀ ਵੱਲੋਂ ਅਜਿਹਾ 'ਸੰਵੇਦਨਹੀਣ ਰਵੱਈਆ' ਨਿੰਦਣਯੋਗ ਅਤੇ ਬੇਹੱਦ ਸ਼ਰਮਨਾਕ ਹੈ। ਮਹਿਲਾ ਕਮਿਸ਼ਨ ਨੇ ਇਕ ਬਿਆਨ 'ਚ ਕਿਹਾ, ''ਐੱਨ.ਸੀ.ਡਬਲਿਊ. ਨੇ ਇਸ ਮਾਮਲੇ ਦਾ ਨੋਟਿਸ ਲਿਆ ਹੈ। ਪ੍ਰਧਾਨ ਰੇਖਾ ਸ਼ਰਮਾ ਨੇ ਆਈਏਐਸ ਹਰਜੋਤ ਕੌਰ ਭਮਰਾ ਨੂੰ ਪੱਤਰ ਲਿਖ ਕੇ ਉਨ੍ਹਾਂ ਦੀ ਅਣਉਚਿਤ ਅਤੇ ਅਤਿ-ਇਤਰਾਜ਼ਯੋਗ ਟਿੱਪਣੀ ਲਈ ਸਪੱਸ਼ਟੀਕਰਨ ਮੰਗਿਆ ਹੈ।
