ਮੇਰੇ ਪਿਤਾ ਨੇ ਸਾਰੇ ਮਹਾਦੀਪਾਂ ਦੇ ਦਿਲਾਂ ਨੂੰ ਛੂਹ ਲਿਆ: ਈਸ਼ਾ ਦਿਓਲ
ਮੁੰਬਈ: ਬ੍ਰਿਟਿਸ਼ ਅਕੈਡਮੀ ਫਿਲਮ ਅਵਾਰਡਜ਼ (ਬਾਫਟਾ) ਦੇ 79ਵੇਂ ਐਡੀਸ਼ਨ ’ਚ ਬਾਲੀਵੁੱਡ ਅਦਾਕਾਰ ਮਰਹੂਮ ਧਰਮਿੰਦਰ ਨੂੰ ਸ਼ਰਧਾਂਜਲੀ ਦਿਤੀ ਗਈ। ਸਨਮਾਨਿਤ ਕੀਤੇ ਜਾਣ ਤੋਂ ਬਾਅਦ ਅਪਣੇ ਮਰਹੂਮ ਪਿਤਾ ਅਤੇ ਹਿੰਦੀ ਸਿਨੇਮਾ ਦੇ ਮਹਾਨ ਅਦਾਕਾਰ ਧਰਮਿੰਦਰ ਬਾਰੇ ਉਨ੍ਹਾਂ ਦੀ ਧੀ ਈਸ਼ਾ ਦਿਓਲ ਨੇ ਕਿਹਾ, ਉਨ੍ਹਾਂ ਨੇ ਦੁਨੀਆਂ ਭਰ ਦੇ ਦਰਸ਼ਕਾਂ ਨੂੰ ਮੋਹ ਲਿਆ।’
ਲੰਡਨ ’ਚ ਐਤਵਾਰ ਨੂੰ ਬਾਫਟਾ ਐਵਾਰਡ ਸਮਾਰੋਹ ਵੰਡੇ ਗਏ, ਜਿਸ ’ਚ ਮਰਹੂਮ ਧਰਮਿੰਦਰ ਨੂੰ ਪਿਛਲੇ ਇਕ ਸਾਲ ਦੌਰਾਨ ਗੁਆਚੇ ਸਿਨੇਮਾ ਦੇ ਮਹਾਨ ਖਿਡਾਰੀਆਂ ਨੂੰ ਸ਼ਰਧਾਂਜਲੀ ਦੇਣ ਲਈ ਇਕਲੌਤੇ ਭਾਰਤੀ ਪ੍ਰਤੀਨਿਧੀ ਵਜੋਂ ਸ਼ਾਮਲ ਕੀਤਾ ਗਿਆ। ਉਸ ਦੀ ਤਸਵੀਰ ਫਰਾਂਸੀਸੀ ਅਦਾਕਾਰ-ਗਾਇਕਾ ਬ੍ਰਿਗੇਟ ਬਾਰਡੋਟ ਅਤੇ ਜਰਮਨ ਅਦਾਕਾਰ ਉਡੋ ਕੀਅਰ ਦੇ ਨਾਲ ਪਰਦੇ ਉਤੇ ਵਿਖਾਈ ਦਿਤੀ।
ਰੌਬਰਟ ਡੁਵਾਲ, ਕੈਥਰੀਨ ਓ‘ਹਾਰਾ, ਵਾਲ ਕਿਲਮਰ, ਰੌਬ ਰੇਨਰ ਅਤੇ ਟੌਮ ਸਟੋਪਾਰਡ ਵਰਗੇ ਗਲੋਬਲ ਦਿੱਗਜਾਂ ਨੂੰ ਵੀ ਸਿਨੇਮਾ ਵਿਚ ਉਨ੍ਹਾਂ ਦੇ ਯੋਗਦਾਨ ਲਈ ਬਾਫਟਾ ਵਿਖੇ ਯਾਦ ਕੀਤਾ ਗਿਆ। ਧਰਮਿੰਦਰ ਦਾ ਪਿਛਲੇ ਸਾਲ 24 ਨਵੰਬਰ ਨੂੰ 89 ਸਾਲ ਦੀ ਉਮਰ ਵਿਚ ਲੰਬੀ ਬਿਮਾਰੀ ਕਾਰਨ ਮੁੰਬਈ ਵਿਚ ਅਪਣੀ ਰਿਹਾਇਸ਼ ਉਤੇ ਦਿਹਾਂਤ ਹੋ ਗਿਆ ਸੀ।
ਈਸ਼ਾ ਦਿਓਲ ਨੇ ਇਕ ਸੋਸ਼ਲ ਮੀਡੀਆ ਸੰਦੇਸ਼ ’ਚ ਕਿਹਾ, ‘‘ਇਹ ਮੇਰਾ ਪਾਪਾ ਹੈ, ਉਨ੍ਹਾਂ ਦਾ ਜਾਦੂ, ਇਕ ਸ਼ੁੱਧ ਦਿਲ, ਸੱਭ ਤੋਂ ਸ਼ੁੱਧ ਆਤਮਾ ਜਿਸ ਨੇ ਮਹਾਂਦੀਪਾਂ ਦੇ ਲੱਖਾਂ ਦਿਲਾਂ ਨੂੰ ਛੂਹਿਆ... ਸਿਰਫ ਇਕ ਅਦਾਕਾਰ ਦੇ ਤੌਰ ਉਤੇ ਹੀ ਨਹੀਂ, ਸਗੋਂ ਇਕ ਨਿਮਰ ਇਨਸਾਨ ਦੇ ਤੌਰ ਉਤੇ।’’
ਇਸ ਤੋਂ ਪਹਿਲਾਂ ਇਰਫਾਨ ਖਾਨ, ਰਿਸ਼ੀ ਕਪੂਰ ਅਤੇ ਦਿਲੀਪ ਕੁਮਾਰ ਅਤੇ ਪਲੇਬੈਕ ਗਾਇਕਾ ਲਤਾ ਮੰਗੇਸ਼ਕਰ ਵਰਗੇ ਅਦਾਕਾਰਾਂ ਨੂੰ ਵੀ ਬਾਫਟਾ ਵਿਖੇ ਸਨਮਾਨਿਤ ਕੀਤਾ ਗਿਆ ਸੀ।
ਮਨੀਪੁਰੀ ਫ਼ਿਲਮ ‘ਬੂੰਗ’ ਨੇ ਜਿੱਤਿਆ ਬਿਹਤਰੀਨ ਬਾਲ ਫਿਲਮ ਦਾ ਪੁਰਸਕਾਰ
ਇਹ ਸ਼ਾਮ ਬਾਫ਼ਟਾ ਪੁਰਸਕਾਰਾਂ ’ਚ ਮਨੀਪੁਰੀ ਫ਼ਿਲਮ ‘ਬੂੰਗ’ ਨੂੰ ਪੁਰਸਕਾਰ ਦਿਤੇ ਜਾਣ ਕਾਰਨ ਵੀ ਯਾਦਗਾਰ ਬਣੀ। ਫਰਹਾਨ ਅਖਤਰ ਅਤੇ ਰਿਤੇਸ਼ ਸਿਧਵਾਨੀ ਦੀ ਐਕਸਲ ਐਂਟਰਟੇਨਮੈਂਟ ਵਲੋਂ ਨਿਰਮਿਤ, ਇਸ ਫਿਲਮ ਨੇ ਬਿਹਤਰੀਨ ਬਾਲ ਅਤੇ ਪਰਵਾਰਕ ਫਿਲਮ ਦਾ ਪੁਰਸਕਾਰ ਜਿੱਤਿਆ। ਇਸ ਦਾ ਨਿਰਦੇਸ਼ਨ ਲਕਸ਼ਮੀਪ੍ਰਿਆ ਦੇਵੀ ਨੇ ਕੀਤਾ ਹੈ।
