ਰੇਲਵੇ ਨੂੰ ਹੁਣ ਤੱਕ 2022-23 ਵਿਚ ਸਾਲਾਨਾ ਆਧਾਰ 'ਤੇ 41,000 ਕਰੋੜ ਰੁਪਏ ਦੀ ਵਾਧੂ ਆਮਦਨ ਪ੍ਰਾਪਤ ਹੋਈ ਹੈ
ਨਵੀਂ ਦਿੱਲੀ : ਬਜਟ ਤੋਂ ਪਹਿਲਾਂ ਭਾਰਤੀ ਰੇਲਵੇ ਨੇ ਖੁਸ਼ਖਬਰੀ ਦਿੱਤੀ ਹੈ। ਭਾਰਤੀ ਰੇਲਵੇ ਦੀ ਕਮਾਈ ਵਿਚ ਬੰਪਰ ਵਾਧਾ ਹੋਇਆ ਹੈ ਜੋ ਕਿ 28 ਫ਼ੀਸਦੀ ਹੈ। ਯਾਤਰੀਆਂ ਨੇ ਰੇਲਵੇ ਦਾ ਖਜ਼ਾਨਾ ਭਰ ਦਿੱਤਾ ਹੈ। ਰੇਲਵੇ ਦਾ ਮਾਲੀਆ 1.9 ਲੱਖ ਕਰੋੜ ਰੁਪਏ ਨੂੰ ਪਾਰ ਕਰ ਗਿਆ ਹੈ। ਰੇਲਵੇ ਦੇ ਖਜ਼ਾਨੇ 'ਚ ਇਸ ਬੰਪਰ ਕਮਾਈ ਤੋਂ ਬਾਅਦ ਲੋਕਾਂ ਦੀਆਂ ਉਮੀਦਾਂ ਵਧ ਗਈਆਂ ਹਨ ਕਿ ਕੀ ਉਨ੍ਹਾਂ ਨੂੰ ਦੁਬਾਰਾ ਤੋਂ ਕਿਰਾਏ ਦੀ ਛੋਟ ਮਿਲੇਗੀ? ਕੀ ਸੀਨੀਅਰ ਸਿਟੀਜ਼ਨਾਂ ਨੂੰ ਫਿਰ ਤੋਂ ਟਿਕਟ ਕਿਰਾਏ 'ਚ ਰਿਆਇਤ ਮਿਲੇਗੀ?
18 ਜਨਵਰੀ ਤੱਕ ਰੇਲਵੇ ਦੀ ਕਮਾਈ ਵਧ ਕੇ 1.9 ਲੱਖ ਕਰੋੜ ਹੋ ਗਈ ਹੈ। ਜੋ ਪਿਛਲੇ ਸਾਲ ਦੀ ਕਮਾਈ ਨਾਲੋਂ 28 ਫ਼ੀਸਦੀ ਵੱਧ ਹੈ। ਰੇਲਵੇ ਨੂੰ ਹੁਣ ਤੱਕ 2022-23 ਵਿਚ ਸਾਲਾਨਾ ਆਧਾਰ 'ਤੇ 41,000 ਕਰੋੜ ਰੁਪਏ ਦੀ ਵਾਧੂ ਆਮਦਨ ਪ੍ਰਾਪਤ ਹੋਈ ਹੈ। ਰੇਲਵੇ ਨੇ ਬੀਤੇ ਦਿਨ ਕਿਹਾ ਕਿ ਚਾਲੂ ਵਿੱਤੀ ਸਾਲ 'ਚ ਹੁਣ ਤੱਕ 1,91,162 ਕਰੋੜ ਰੁਪਏ ਦਾ ਮਾਲੀਆ ਪ੍ਰਾਪਤ ਹੋਇਆ ਹੈ। ਇਕ ਸਾਲ ਪਹਿਲਾਂ ਦੀ ਇਸੇ ਮਿਆਦ 'ਚ ਇਹ 1,48,970 ਕਰੋੜ ਰੁਪਏ ਸੀ।
Railways
ਅੰਕੜਿਆਂ ਅਨੁਸਾਰ ਰੇਲਵੇ ਨੇ ਚਾਲੂ ਵਿੱਤੀ ਸਾਲ ਵਿਚ ਹੁਣ ਤੱਕ 1185 ਮਿਲੀਅਨ ਟਨ ਮਾਲ ਦੀ ਢੋਆ-ਢੁਆਈ ਕੀਤੀ ਹੈ। ਰੇਲਵੇ ਨੂੰ 2022-23 ਵਿਚ ਕੁੱਲ 2,35,000 ਕਰੋੜ ਰੁਪਏ ਦੀ ਆਮਦਨ ਹੋਣ ਦੀ ਉਮੀਦ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਰੇਲਵੇ ਅਗਲੇ ਇੱਕ ਹਫ਼ਤੇ ਯਾਨੀ ਬਜਟ ਤੋਂ ਪਹਿਲਾਂ ਤੱਕ ਇਸ ਅੰਕੜੇ ਨੂੰ ਛੂਹ ਲਵੇਗਾ। ਯਾਤਰੀ ਸਮੀਖਿਆ 52 ਹਜ਼ਾਰ ਕਰੋੜ ਤੱਕ ਪਹੁੰਚ ਗਈ ਹੈ। ਸਾਲ 2028-19 'ਚ ਇਹ ਕਮਾਈ 51 ਹਜ਼ਾਰ ਕਰੋੜ ਰੁਪਏ ਸੀ।
18 ਜਨਵਰੀ ਤੱਕ ਦੇ ਉਪਲੱਬਧ ਅੰਕੜਿਆਂ ਅਨੁਸਾਰ ਭਾੜੇ ਦੀ ਕਮਾਈ ਵਿਚ 15.6% ਦਾ ਵਾਧਾ ਹੋਇਆ ਹੈ ਅਤੇ ਇਹ ਵਧ ਕੇ 1.3 ਲੱਖ ਕਰੋੜ ਰੁਪਏ ਹੋ ਗਿਆ ਹੈ। ਇਹ ਜਾਣ ਕੇ ਹੈਰਾਨੀ ਹੋਵੇਗੀ ਪਰ ਰੇਲਵੇ ਨੇ ਨਾ ਸਿਰਫ਼ ਕਿਰਾਏ 'ਤੇ ਸਗੋਂ ਕਬਾੜ ਵੇਚ ਕੇ ਵੀ ਕਾਫੀ ਪੈਸਾ ਕਮਾਇਆ ਹੈ। ਰੇਲਵੇ ਨੇ ਕਬਾੜ ਵੇਚ ਕੇ 483 ਕਰੋੜ ਰੁਪਏ ਕਮਾਏ ਹਨ।
ਇਹ ਵੀ ਪੜ੍ਹੋ: ਅੱਤਿਆਚਾਰ ਤੋਂ ਪੀੜਤ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇਣ ਲਈ 7.65 ਕਰੋੜ ਰੁਪਏ ਦੀ ਰਾਸ਼ੀ ਜਾਰੀ
ਜ਼ਿਕਰਯੋਗ ਹੈ ਕਿ ਸਾਲ 2020 'ਚ ਕੋਰੋਨਾ ਮਹਾਮਾਰੀ ਅਤੇ ਲਾਕਡਾਊਨ ਤੋਂ ਬਾਅਦ ਰੇਲਵੇ ਨੇ ਟਿਕਟ ਕਿਰਾਏ 'ਚ ਛੋਟ ਖ਼ਤਮ ਕਰ ਦਿੱਤੀ ਸੀ। ਇਸ ਤੋਂ ਪਹਿਲਾਂ ਰੇਲਵੇ ਸੀਨੀਅਰ ਨਾਗਰਿਕਾਂ ਨੂੰ ਟਿਕਟਾਂ 'ਤੇ ਕਾਫੀ ਛੋਟ ਦਿੰਦਾ ਸੀ। 60 ਸਾਲ ਤੱਕ ਦੇ ਸੀਨੀਅਰ ਨਾਗਰਿਕਾਂ ਨੂੰ ਟਿਕਟ ਦੇ ਕਿਰਾਏ ਵਿਚ 50 ਫ਼ੀਸਦੀ ਦੀ ਛੋਟ ਮਿਲਦੀ ਸੀ। ਇਸ ਦੇ ਨਾਲ ਹੀ 55 ਸਾਲ ਦੀ ਉਮਰ ਦੀਆਂ ਮਹਿਲਾ ਸੀਨੀਅਰ ਸਿਟੀਜ਼ਨਾਂ ਨੂੰ ਟਿਕਟ ਕਿਰਾਏ ਵਿਚ ਛੋਟ ਮਿਲਦੀ ਸੀ
ਪਰ ਕੋਰੋਨਾ ਤੋਂ ਬਾਅਦ ਇਸ ਨੂੰ ਖ਼ਤਮ ਕਰ ਦਿੱਤਾ ਗਿਆ। ਲੰਬੇ ਸਮੇਂ ਤੋਂ ਇਸ ਛੋਟ ਨੂੰ ਬਹਾਲ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ। ਰੇਲਵੇ ਦੀ ਕਮਾਈ ਵਿਚ ਵਾਧਾ ਹੋਇਆ ਹੈ। ਅਜਿਹੀ ਸਥਿਤੀ ਵਿਚ ਉਮੀਦ ਕੀਤੀ ਜਾ ਰਹੀ ਹੈ ਕਿ ਰੇਲ ਜ਼ਰੀਏ ਯਾਤਰਾ ਕਰਨ ਵਾਲਿਆਂ ਨੂੰ ਮਿਲਣ ਵਾਲੀਆਂ ਸਹੂਲਤਾਂ ਵਿਚ ਵਾਧਾ ਹੋ ਸਕਦਾ ਹੈ।
