ਮਹਿਲਾ ਪੱਤਰਕਾਰ ਦੀ ਗੱਲ੍ਹ ਨੂੰ ਥਪਥਪਾਉਣ ਲਈ ਆਲੋਚਨਾਵਾਂ ਦੇ ਕੇਂਦਰ 'ਚ ਆਏ ਤਾਮਿਲਨਾਡੂ ਦੇ ਰਾਜਪਾਲ

ਚੇਨਈ, 18 ਅਪ੍ਰੈਲ: ਇਕ ਔਰਤ ਪੱਤਰਕਾਰ ਦੇ ਗੱਲ੍ਹਾਂ ਨੂੰ ਥਪਥਪਾਉਣ ਲਈ ਆਲੋਚਨਾਵਾਂ ਦੇ ਘੇਰੇ 'ਚ ਆਏ ਤਾਮਿਲਨਾਡੂ ਦੇ ਰਾਜਪਾਲ ਬਨਵਾਰੀ ਲਾਲ ਪੁਰੋਹਿਤ ਨੇ ਅੱਜ ਉਸ ਪੱਤਰਕਾਰ ਤੋਂ ਮਾਫ਼ੀ ਮੰਗ ਲਈ ਹੈ। 78 ਸਾਲਾਂ ਦੇ ਪੁਰੋਹਿਤ ਨੇ ਪ੍ਰੈੱਸ ਕਾਨਫ਼ਰੰਸ ਤੋਂ ਬਾਹਰ ਆਉਂਦਿਆਂ ਇਕ ਅੰਗਰੇਜ਼ੀ ਹਫ਼ਤਾਵਾਰ ਨਾਲ ਜੁੜੀ ਪੱਤਰਕਾਰ ਲਕਸ਼ਮੀ ਸੁਬਰਾਮਨੀਅਮ ਦੇ ਗੱਲ੍ਹਾਂ ਨੂੰ ਥਪਥਪਾਇਆ ਸੀ। ਇਸ ਪੱਤਰਕਾਰ ਨੇ ਉਨ੍ਹਾਂ ਤੋਂ ਜਿਨਸੀ ਅਪਰਾਧਾਂ ਬਾਰੇ ਸਵਾਲ ਪੁਛਿਆ ਸੀ। ਇਸ ਨੂੰ ਲੈ ਕੇ ਮੀਡੀਆ ਅਤੇ ਡੀ.ਐਮ.ਕੇ. ਸਮੇਤ ਵਿਰੋਧੀ ਪਾਰਟੀਆਂ ਨੇ ਪੁਰਹਿਤ ਦੀ ਕਰੜੀ ਆਲੋਚਨਾ ਕੀਤੀ। ਲਕਸ਼ਮੀ ਨੂੰ ਲਿਖੀ ਚਿੱਠੀ 'ਚ ਰਾਜਪਾਲ ਨੇ ਕਿਹਾ ਕਿ ਉਨ੍ਹਾਂ 'ਪਿਆਰ ਨਾਲ' ਅਤੇ ਹਿਕ ਪੱਤਰਕਾਰ ਵਜੋਂ ਲਕਸ਼ਮੀ ਦੇ ਕੰਮ ਦੀ ਤਾਰੀਫ਼ ਕਰਦਿਆਂ ਉਨ੍ਹਾਂ ਦੇ ਗੱਲ੍ਹ ਥਪਥਪਾਏ ਸਨ। ਹਾਲਾਂਕਿ ਪੱਤਰਕਾਰ ਨੇ ਜਵਾਬ 'ਚ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਲਗਦਾ ਕਿ ਰਾਜਪਾਲ ਨੇ ਸਿਰਫ਼ ਤਾਰੀਫ਼ ਕਰਨ ਲਈ ਉਨ੍ਹਾਂ ਦੀਆਂ ਗੱਲ੍ਹਾਂ ਨੂੰ ਥਪਥਪਾਇਆ ਸੀ। 

Rajpal banwari

ਉਨ੍ਹਾਂ ਪੱਤਰਕਾਰਾਂ ਨੂੰ ਮਾਫ਼ੀ ਮੰਗਣ ਲਈ ਚਿੱਠੀ 'ਚ ਕਿਹਾ, ''ਮੈਂ ਇਸ ਅਹਿਸਾਸ ਨਾਲ ਤੁਹਾਡੇ ਗੱਲ੍ਹ ਥਪਥਪਾਏ ਸਨ ਕਿ ਤੁਸੀਂ ਮੇਰੀ ਪੋਤੀ ਵਾਂਗ ਹੋ। ਮੈਂ ਪਿਆਰ ਨਾਲ ਅਤੇ ਇਕ ਪੱਤਰਕਾਰ ਵਜੀ ਤੁਹਾਡੇ ਕੰਮ ਦੀ ਤਾਰੀਫ ਕਰਦਿਆਂ ਅਜਿਹਾ ਕੀਤਾ ਸੀ।''ਪੱਤਰਕਾਰ ਵਲੋਂ ਭੇਜੀ ਚਿੱਠੀ ਦਾ ਹਵਾਲਾ ਦਿੰਦਿਆਂ ਪੁਰੋਹਿਤ ਨੇ ਕਿਹਾ, ''ਤੁਹਾਡੀ ਚਿੱਠੀ ਤੋਂ ਮੈਂ ਸਮਝ ਗਿਆ ਕਿ ਤੁਸੀਂ ਘਟਨਾ ਨੂੰ ਲੈ ਕੇ ਦੁਖੀ ਮਹਿਸੂਸ ਕਰ ਰਹੇ ਹੋ। ਮੈਂ ਇਸ ਲਈ ਮਾਫ਼ੀ ਮੰਗਦਾ ਹਾਂ ਕਿਉਂਕਿ ਤੁਹਾਡੀਆਂ ਭਾਵਨਾਵਾਂ ਨੂੰ ਢਾਹ ਲੱਗੀ ਹੈ।''  (ਏਜੰਸੀਆਂ)