ਫ਼ਿਲਮਾਂ ਤੋਂ ਇਲਾਵਾ ਟੀਵੀ ਸ਼ੋਆਂ 'ਤੇ ਦੀ ਸ਼ੂਟਿੰਗਾਂ ਵੀ ਹੋਈਆਂ ਕੈਂਸਲ
ਨਵੀਂ ਦਿੱਲੀ : ਚੀਨ ਤੋਂ ਸ਼ੁਰੂ ਹੋਇਆ ਕੋਰੋਨਾਵਾਇਰਸ ਹੁਣ ਦੁਨੀਆਂ ਦੇ ਕੋਨੇ-ਕੋਨੇ 'ਚ ਦਸਤਕ ਚੁੱਕਾ ਹੈ। ਹਾਲਤ ਅਜਿਹੀ ਬਣਦੀ ਜਾ ਰਹੀ ਹੈ ਕਿ ਜਿਹੜੇ ਖਿੱਤੇ ਇਸ ਦੀ ਪਹੁੰਚ ਤੋਂ ਅਜੇ ਦੂਰ ਹਨ, ਉਥੇ ਵੀ ਇਸ ਦੀ ਖੌਫ਼ ਦਾ ਸ਼ਾਇਆ ਪਹੁੰਚ ਚੁੱਕਾ ਹੈ। ਸੂਚਨਾ ਤਕਨਾਲੋਜੀ ਦੀ ਕ੍ਰਾਂਤੀ ਨੇ ਇਸ ਖੌਫ਼ ਨੂੰ ਹੋਰ ਵੀ ਵਿਆਪਕ ਰੂਪ ਦੇ ਦਿਤਾ ਹੈ। ਇਹੀ ਕਾਰਨ ਹੈ ਕਿ ਹੁਣ ਇਸ ਦਾ ਅਸਰ ਲੋਕਾਂ ਦੀਆਂ ਖਾਣ-ਪੀਣ ਅਤੇ ਰਹਿਣ-ਸਹਿਣ ਦੀਆਂ ਆਦਤਾਂ 'ਤੇ ਵੀ ਪ੍ਰਤੱਖ ਦਿਖਾਈ ਦੇ ਰਿਹਾ ਹੈ।
Photo
ਇਸ ਦਾ ਅਸਰ ਹੁਣ ਫ਼ਿਕਰਾ ਮਾਰੀ ਲੋਕਾਈ ਨੂੰ ਬੇਫਿਕਰੀ ਦਾ ਅਹਿਸਾਸ ਕਰਵਾਉਣ ਵਾਲੇ ਮਨੋਰੰਜਨ ਦੇ ਸਾਧਨਾਂ 'ਤੇ ਵੀ ਪੈਣਾ ਸ਼ੁਰੂ ਹੋ ਗਿਆ ਹੈ। ਵੈਸੇ ਤਾਂ ਕਿਸੇ ਮੁਸੀਬਤ ਦੇ ਖੌਫ਼ ਵਿਚ ਹਾਸਾ ਆਉਣਾ ਮੁਸ਼ਕਲ ਹੈ ਪਰ ਕਪਿਲ ਸ਼ਰਮਾ ਦੇ ਸ਼ੋਅ ਵਰਗੇ ਕੁੱਝ ਸਰੋਤ ਹਨ ਜੋ ਰੌਂਦੇ ਨੂੰ ਵੀ ਹਸਾਉਣ ਦਾ ਮਾਦਾ ਰੱਖਦੇ ਹਨ। ਪਰ ਹੁਣ ਅਜਿਹੇ ਸਾਧਨਾਂ 'ਤੇ ਵੀ ਕਰੋਨਾ ਦਾ ਸਾਇਆ ਪੈਣਾ ਸ਼ੁਰੂ ਹੋ ਗਿਆ ਹੈ।
Photo
ਕੁੱਝ ਮੀਡੀਆ ਰਿਪੋਰਟਾਂ ਮੁਤਾਬਕ ਕੋਰੋਨਾਵਾਇਰਸ ਦੇ ਖੌਫ਼ ਕਾਰਨ ਕਪਿਲ ਸ਼ਰਮਾ ਨੂੰ ਵੀ ਅਪਣੇ ਸ਼ੋਅ ਦੀ ਸ਼ੂਟਿੰਗ ਨੂੰ ਹਾਲ ਦੀ ਘੜੀ ਰੋਕਣਾ ਪਿਆ ਹੈ। ਰਿਪੋਰਟ ਮੁਤਾਬਕ ਕਪਿਲ ਸ਼ਰਮਾ ਦੇ ਸ਼ੋਅ ਦੇ ਐਪੀਸੋਡ ਦੀ ਸ਼ੂਟਿੰਗ 18 ਮਾਰਚ ਨੂੰ ਹੋਣੀ ਤੈਅ ਸੀ, ਪਰ ਹੁਣ ਇਸ ਨੂੰ ਅਣਮਿੱਥੇ ਸਮੇਂ ਲਈ ਟਾਲਣਾ ਪਿਆ ਹੈ। ਸਟਾਰ ਕਾਸਟ ਤੋਂ ਲੈ ਕੇ ਕਰੂ ਤਕ ਸਾਰੇ ਲੋਕਾਂ ਨੂੰ ਘਰ ਅੰਦਰ ਰਹਿਣ ਦੀਆਂ ਹਦਾਇਤਾਂ ਦਿਤੀਆਂ ਗਈਆਂ ਹਨ।
Photo
ਰਿਪੋਰਟ ਮੁਤਾਬਕ ਸ਼ੋਅ 'ਚ ਚੰਦੂ ਚਾਹ ਵਾਲੇ ਦਾ ਰੋਲ ਕਰਨ ਵਾਲੇ ਚੰਦਰ ਪ੍ਰਭਾਕਰ ਨੂੰ ਜਦੋਂ ਸ਼ੂਟਿੰਗ ਸਬੰਧੀ ਪੁਛਿਆ ਗਿਆ ਤਾਂ ਉਸ ਨੇ ਕਿਹਾ ਕਿ ਅਸੀਂ ਬੁੱਧਵਾਰ ਨੂੰ ਇਕ ਐਪੀਸੋਡ ਸ਼ੂਟ ਕਰਨਾ ਸੀ, ਪਰ ਹੁਣ ਸਾਨੂੰ ਅਗਲੀ ਸੂਚਨਾ ਤਕ ਸ਼ੂਟ ਦੇ ਕੈਂਸਲ ਹੋਣ ਦੀ ਜਾਣਕਾਰੀ ਦਿਤੀ ਗਈ ਹੈ।
Photo
ਕਾਬਲੇਗੌਰ ਹੈ ਕਿ ਕੋਰੋਨਾਵਾਇਰਸ ਦਾ ਅਸਰ ਫ਼ਿਲਮਾਂ ਤੋਂ ਲੈ ਕੇ ਦੂਜੇ ਪ੍ਰਸਿੱਧ ਟੀਵੀ ਸ਼ੋਆਂ ਦੀ ਸ਼ੂਟਿੰਗ 'ਤੇ ਵੀ ਪੈਣਾ ਸ਼ੁਰੂ ਹੋ ਗਿਆ ਹੈ। ਇਸੇ ਤਰ੍ਹਾਂ ਟੀਵੀ ਸ਼ੋਅ ਤਾਰਿਕ ਮਹਿਤਾ ਦਾ ਉਲਟਾ ਚਸਮਾ ਦੇ ਪ੍ਰੋਡਿਊਸਰ ਨੇ ਵੀ ਟਵਿੱਟਰ ਜ਼ਰੀਏ ਜਾਣਕਾਰੀ ਦਿਤੀ ਹੈ ਕਿ ਸਾਨੂੰ ਫਿਲਮਸਿਟੀ ਦੇ ਸੈੱਟ 'ਤੇ ਸ਼ੂਟਿੰਗ ਕਰਨ ਦੀ ਆਗਿਆ ਨਹੀਂ ਮਿਲੀ।
Photo
ਪ੍ਰੋਡਿਊਸਰ ਨੇ ਟਵੀਟ ਕੀਤਾ ਕਿ ਸਾਨੂੰ ਇਸ ਸਰਕੂਲਰ ਬਾਰੇ ਕੋਈ ਸਪੱਸ਼ਟਤਾ ਨਹੀਂ ਮਿਲ ਰਹੀ। ਅਚਾਨਕ ਫ਼ਿਲਮਸਿਟੀ ਸਾਨੂੰ ਸ਼ੂਟਿੰਗ ਨਹੀਂ ਕਰਨ ਦੇ ਰਹੀ। ਅਸੀਂ ਸੈੱਟ 'ਤੇ ਹਰ ਇਕ ਆਦੇਸ਼ ਦਾ ਪਾਲਣ ਕਰ ਰਹੇ ਹਾਂ।
