ਪੁੱਛ-ਪੜਤਾਲ ਦੌਰਾਨ ਹੁਬਲਾਲ ਨੇ ਪ੍ਰਗਟਾਵਾ ਕੀਤਾ ਕਿ ਅਤੀਕ ਨੇ 2015 ਵਿਚ ਉਸ ਨੂੰ ਧਮਕੀ ਦਿਤੀ ਸੀ ਅਤੇ ਜ਼ਮੀਨ ਆਪਣੇ ਨਾਮ ’ਤੇ ਰਜਿਸਟਰ ਕਰਵਾ ਲਈ ਸੀ
UP News : ਗੈਂਗਸਟਰ ਅਤੀਕ ਅਹਿਮਦ ਵਲੋਂ ਜੁਰਮ ਤੋਂ ਕਮਾਈ ਗਈ ਕਰੀਬ 50 ਕਰੋੜ ਰੁਪਏ ਦੀ ਬੇਨਾਮੀ ਜਾਇਦਾਦ ਸੂਬਾ ਸਰਕਾਰ ਦੇ ਹੱਕ ’ਚ ਕਰ ਦਿਤੀ ਗਈ ਹੈ। ਜ਼ਿਲ੍ਹਾ ਸਰਕਾਰੀ ਐਡਵੋਕੇਟ (ਅਪਰਾਧਕ) ਗੁਲਾਬ ਚੰਦਰ ਅਗਰਹਰੀ ਨੇ ਦੱਸਿਆ ਕਿ ਇਹ ਜਾਇਦਾਦ ਲਾਲਾਪੁਰ ਮਿਸਤਰੀ ਹੁਬਲਾਲ ਦੇ ਨਾਮ ’ਤੇ ਅਪਰਾਧ ਦੀ ਕਮਾਈ ਤੋਂ ਖਰੀਦੀ ਗਈ ਸੀ।
ਉਸ ਸਮੇਂ ਲਗਭਗ 2.377 ਹੈਕਟੇਅਰ ਜ਼ਮੀਨ ਦੀ ਕੀਮਤ 12.42 ਕਰੋੜ ਰੁਪਏ ਪ੍ਰਤੀ ਹੈਕਟੇਅਰ ਸੀ। ਉਨ੍ਹਾਂ ਕਿਹਾ ਕਿ ਹੁਬਲਾਲ ਦੇ ਨਾਂ ’ਤੇ ਜ਼ਮੀਨ ਦਾ ਬੈਨਾਮਾ ਬਣਾਉਂਦੇ ਸਮੇਂ ਅਤੀਕ ਅਹਿਮਦ ਨੇ ਕਿਹਾ ਸੀ ਕਿ ਜੇਕਰ ਲੋੜ ਪਈ ਤਾਂ ਉਹ ਇਸ ਜ਼ਮੀਨ ਦਾ ਡੀਡ ਅਪਣੇ ਨਾਂ ਕਰਵਾ ਲਵੇਗਾ।
ਪੁਲਿਸ ਮੁਤਾਬਕ ਗੈਂਗਸਟਰ ਐਕਟ ਤਹਿਤ ਅਤੀਕ ਵਿਰੁਧ ਦਰਜ ਮਾਮਲੇ ਦੀ ਜਾਂਚ ਦੌਰਾਨ ਪਤਾ ਲੱਗਾ ਕਿ ਏਅਰਪੋਰਟ ਥਾਣਾ ਖੇਤਰ ’ਚ ਅਤੀਕ ਦੀ ਜਾਇਦਾਦ ਹੁਬਲਾਲ ਦੇ ਨਾਂ ’ਤੇ ਹੈ। ਪੁੱਛ-ਪੜਤਾਲ ਦੌਰਾਨ ਹੁਬਲਾਲ ਨੇ ਪ੍ਰਗਟਾਵਾ ਕੀਤਾ ਕਿ ਅਤੀਕ ਨੇ 2015 ਵਿਚ ਉਸ ਨੂੰ ਧਮਕੀ ਦਿਤੀ ਸੀ ਅਤੇ ਜ਼ਮੀਨ ਆਪਣੇ ਨਾਮ ’ਤੇ ਰਜਿਸਟਰ ਕਰਵਾ ਲਈ ਸੀ। ਪੁਲਿਸ ਨੇ ਨਵੰਬਰ 2023 ’ਚ ਇਸ ਜ਼ਮੀਨ ਨੂੰ ਕੁਰਕ ਕੀਤਾ ਸੀ।
ਉਮੇਸ਼ ਪਾਲ ਕਤਲ ਕੇਸ ਸਮੇਤ 100 ਤੋਂ ਵੱਧ ਅਪਰਾਧਕ ਮਾਮਲਿਆਂ ’ਚ ਨਾਮਜ਼ਦ ਅਤੀਕ ਅਹਿਮਦ ਅਤੇ ਉਸ ਦੇ ਭਰਾ ਅਸ਼ਰਫ ਦੀ ਪਿਛਲੇ ਸਾਲ 15 ਅਪ੍ਰੈਲ ਨੂੰ ਪ੍ਰਯਾਗਰਾਜ ਦੇ ਕੈਲਵਿਨ ਹਸਪਤਾਲ ’ਚ ਗੋਲੀ ਮਾਰ ਕੇ ਹੱਤਿਆ ਕਰ ਦਿਤੀ ਗਈ ਸੀ। ਅਤੀਕ ਦੀ ਪਤਨੀ ਸ਼ਾਇਸਤਾ ਪਰਵੀਨ, ਗੁੱਡੂ ਮੁਸਲਿਮ ਅਸ਼ਰਫ ਦੀ ਪਤਨੀ ਜ਼ੈਨਬ ਸਮੇਤ ਕਈ ਦੋਸ਼ੀ ਅਜੇ ਵੀ ਫਰਾਰ ਹਨ।
