ਸੂਚਨਾ ਦਾ ਅਧਿਕਾਰ ਕਾਨੂੰਨ ਤਹਿਤ ਸਾਹਮਣੇ ਆਈ ਜਾਣਕਾਰੀ
ਨਵੀਂ ਦਿੱਲੀ : ਸੁਪਰੀਮ ਕੋਰਟ ਦੇ ਹੁਕਮਾਂ ਤੋਂ ਚਾਰ ਸਾਲ ਬਾਅਦ ਆਖਰਕਾਰ ਭਾਰਤੀਯ ਰਿਜ਼ਰਵ ਬੈਂਕ ਨੇ ਉਨ੍ਹਾਂ ਵੱਡੇ ਡਿਫਾਲਟਰਾਂ ਦੀ ਸੂਚੀ ਜਾਰੀ ਕਰ ਦਿਤੀ ਹੈ, ਜਿਨ੍ਹਾਂ ਨੇ ਬੈਂਕਾਂ ਦਾ ਕਰਜ਼ ਮੋੜਨ ਤੋਂ ਜਾਣਬੁਝ ਕੇ ਘੇਸ ਵੱਟੀ ਹੋਈ ਸੀ। ਇਨ੍ਹਾਂ ਵਿਚੋਂ ਕੁੱਝ ਕੁ ਨੂੰ ਛੱਡ ਕੇ ਬਾਕੀ ਸਭ ਇਸ ਵਕਤ ਫ਼ਰਾਰ ਹੋ ਚੁੱਕੇ ਹਨ। ਆਰਬੀਆਈ ਨੇ ਇਕ ਸੰਸਥਾ ਵਲੋਂ ਸੂਚਨਾ ਦਾ ਅਧਿਕਾਰ ਕਾਨੂੰਨ ਤਹਿਤ ਮੰਗੀ ਗਈ ਜਣਕਾਰੀ ਦੇ ਇਵਜ਼ 'ਚ 30 ਵੱਡੇ ਬੈਂਕ ਡਿਫਾਲਟਰਾਂ ਸਬੰਧੀ ਵੇਰਵੇ ਦਿਤੇ ਹਨ।
Photo
ਸੂਚਨਾ ਦਾ ਅਧਿਕਾਰ ਤਹਿਤ ਸਾਲ 2019 ਵਿਚ ਮੰਗੀ ਗਈ ਇਸ ਜਾਣਕਾਰੀ ਦੇ ਜਵਾਬ ਵਿਚ ਰਿਜ਼ਰਵ ਬੈਂਕ ਨੇ 30 ਅਪ੍ਰੈਲ ਤਕ ਵੱਡੇ ਡਿਫਾਲਟਰਾਂ ਬਾਰੇ ਵੇਰਵੇ ਜਾਹਰ ਕੀਤੇ ਗਏ ਹਨ। ਇਹ 30 ਕੰਪਨੀਆਂ ਬੈਂਕਾਂ ਦੇ 50,000 ਕਰੋੜ ਤੋਂ ਵਧੇਰੇ ਦੀਆਂ ਦੇਣਦਾਰ ਹਨ। ਇਨ੍ਹਾਂ ਵਿਚ ਹੀਰਾ ਕਾਰੋਬਾਰੀ ਮੇਹੁਲ ਚੌਕਸੀ ਅਤੇ ਨੀਰਵ ਮੋਦੀ ਦੀਆਂ ਕੰਪਨੀਆਂ ਵੀ ਸ਼ਾਮਲ ਹਨ। ਦਿਤੇ ਗਏ ਵੇਰਵਿਆਂ ਮੁਤਾਬਕ ਦਸੰਬਰ 2018 ਤਕ 11,000 ਕੰਪਨੀਆਂ ਵੱਲ 1.61 ਲੱਖ ਕਰੋੜ ਤੋਂ ਵਧੇਰੇ ਰਕਮ ਬਕਾਇਆ ਹੈ।
Photo
ਆਰਬੀਆਈ ਵਲੋਂ ਜਾਰੀ ਕੀਤਾ ਗਿਆ ਇਹ ਡਾਟਾ ਕੇਂਦਰੀ ਬੈਂਕਿੰਗ ਪ੍ਰਣਾਲੀ ਦੇ ਸਰੋਤਾਂ ਤੋਂ ਆਉਂਦਾ ਹੈ। ਇਸ ਨੂੰ ਸੈਂਟਰਲ ਰਿਪਾਜਿਟਰੀ ਆਫ਼ ਕਨਫਰਮੇਸ਼ਨ ਆਫ਼ ਲਾਰਜ਼ ਕ੍ਰੈਡਿਟਸ (ਸੀਆਰਆਈਐਲਸੀ) ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ। ਇਹ ਪੰਜ ਕਰੋੜ ਤੋਂ ਉਪਰ ਉਧਾਰ ਦੇਣ ਵਾਲੇ ਸਾਰੇ ਕਰਜ਼ਦਾਰਾਂ ਦੀ ਕ੍ਰੈਡਿਟ ਜਾਣਕਾਰੀ ਇਕੱਤਰ ਕਰਨ ਵਾਲਾ ਅਦਾਰਾ ਹੈ।
Photo
ਰਿਜ਼ਰਵ ਬੈਂਕ ਨੇ ਡਿਫਾਲਟਰ ਕੰਪਨੀਆਂ ਦੀ ਸੂਚੀ ਅਤੇ ਉਨ੍ਹਾਂ ਸਿਰ ਬਕਾਇਆ ਰਾਸ਼ੀ ਬਾਰੇ ਜਾਣਕਾਰੀ ਮੁਹੱਈਆ ਕਰਵਾਈ ਗਈ ਹੈ। ਪਰ ਇਹ ਨਹੀਂ ਦਸਿਆ ਗਿਆ ਕਿ ਉਨ੍ਹਾਂ ਦੀ ਕਿੰਨੀ ਰਕਮ ਬੈਡ ਲੋਨ ਹੈ। ਆਰਬੀਆਈ ਵਲੋਂ ਦਿਤੀ ਗਈ ਲਿਸਟ 'ਚ ਗੀਤਾਂਜਲੀ ਜੇਮਸ ਦਾ ਨਾਮ ਸਭ ਤੋਂ ਉਪਰ ਹੈ, ਜਿਸ ਸਿਰ 5044 ਕਰੋੜ ਦੀ ਰਕਮ ਹੈ। ਜਦਕਿ ਡਾਇਮੰਡ ਪਾਵਰ ਇਨਫਰਾਟਕਚਰ ਸਿਰ 869 ਕਰੋੜ ਰੁਪਏ ਹਨ ਜੋ ਇਸ ਲਿਸਟ 'ਚ ਸਭ ਤੋਂ ਹੇਠਲੇ ਸਥਾਨ 'ਤੇ ਆਉਂਦੀ ਹੈ।
Photo
ਗੀਤਾਂਜਲੀ ਜੇਮਸ ਤੋਂ ਇਲਾਵਾ ਇਸ ਲਿਸਟ ਵਿਚ ਰੋਟੋਮੈਕ ਗਲੋਬਲ, ਯੂਮ ਡਿਵੈਲਪਰਸ, ਡੈਂਕਨ ਕ੍ਰਾਂਨਿਕਲ ਹੋਡਿੰਗਸ, ਵਿਨਸਮ ਡਾਇਮੰਡ, ਆਰਈਆਈ ਐਗਰੋ, ਸਿੰਧੀ ਵਿਨਾਇਕ ਲਾਜਿਸਿਟਕਸ ਅਤੇ ਕੂਡੋਸ ਕੇਮੀ ਜਿਹੇ ਅਦਾਰਿਆਂ ਦਾ ਨਾਮ ਵੀ ਸ਼ਾਮਲ ਹੈ। ਇਹ ਸਾਰੀਆਂ ਕਪਨੀਆਂ ਜਾਂ ਉਨ੍ਹਾਂ ਦੇ ਮਾਲਕਾਂ 'ਤੇ ਪਿਛਲੇ ਪੰਜ ਸਾਲਾਂ ਤੋਂ ਸੀਬੀਆਈ ਜਾਂ ਈਡੀ ਵਲੋਂ ਵੀ ਸਿਕੰਜਾ ਕੱਸਿਆ ਜਾ ਰਿਹਾ ਹੈ।
