ਸਾਈਬਰ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਹਿਸਾਰ: ਹਰਿਆਣਾ ਦੇ ਹਾਂਸੀ 'ਚ ਠੱਗਾਂ ਨੇ ਇਕ ਬੀਐਸਐਫ ਜਵਾਨ ਨੂੰ ਹਾਈ ਪ੍ਰੋਫਾਈਲ ਕੁੜੀਆਂ ਨਾਲ ਦੋਸਤੀ ਦੇ ਨਾਂ 'ਤੇ 59 ਹਜ਼ਾਰ ਦੀ ਠੱਗੀ ਦਾ ਸ਼ਿਕਾਰ ਬਣਾਇਆ ਹੈ। ਬਦਮਾਸ਼ਾਂ ਨੇ ਜਵਾਨ ਨੂੰ ਦੱਸਿਆ ਕਿ ਕੰਪਨੀ ਦਾ ਮੈਂਬਰ ਬਣਨ ਤੋਂ ਬਾਅਦ ਉਹ ਕੁੜੀਆਂ ਨਾਲ ਚਾਰ ਮੀਟਿੰਗਾਂ ਕਰ ਸਕੇਗਾ। ਨੌਜਵਾਨ ਨੂੰ ਲੜਕੀ ਨਾਲ ਮਿਲਾਉਣ ਦੇ ਨਾਂ 'ਤੇ ਫਾਰਮ ਭਰਨ, ਸਕਿਓਰਿਟੀ ਫੀਸ, ਹੋਟਲ ਦੇ ਕਮਰੇ ਦੀ ਫੀਸ ਦੇ ਨਾਂ ’ਤੇ ਪੈਸੇ ਮੰਗੇ ਗਏ। ਸਾਈਬਰ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਬੀਐਸਐਫ ਜਵਾਨ ਨੇ ਦੱਸਿਆ ਕਿ ਉਹ ਛੁੱਟੀ ’ਤੇ ਘਰ ਆਇਆ ਸੀ। ਇਕ ਮਹੀਨਾ ਪਹਿਲਾਂ ਉਸ ਨੂੰ ਇਕ ਨੰਬਰ ਤੋਂ ਫ਼ੋਨ ਆਇਆ। ਵਿਅਕਤੀ ਨੇ ਉਸ ਨੂੰ ਦੱਸਿਆ ਕਿ ਉਹ ਸਟਾਰ ਮੀਟਿੰਗ ਕੰਪਨੀ ਤੋਂ ਬੋਲ ਰਿਹਾ ਹੈ ਅਤੇ ਪੈਸੇ ਕਮਾਉਣ ਦੀ ਸਲਾਹ ਦੇ ਸਕਦਾ ਹੈ। ਉਸ ਨੇ ਜਵਾਨ ਨੂੰ ਕਿਹਾ ਕਿ ਉਹ ਹਾਈ ਪ੍ਰੋਫਾਈਲ ਲੜਕੀ ਨਾਲ ਉਸ ਦੀ ਮੁਲਾਕਾਤ ਦਾ ਪ੍ਰਬੰਧ ਕਰੇਗਾ। ਜਦੋਂ ਉਹ ਜਵਾਨ ਨੂੰ ਮਿਲੇਗੀ ਤਾਂ ਉਸ ਨੂੰ ਪੈਸੇ ਦੇਵੇਗੀ।
ਜਵਾਨ ਨੇ ਦੱਸਿਆ ਕਿ ਉਸ ਦੇ ਹਾਂ ਕਹਿਣ 'ਤੇ ਬਦਮਾਸ਼ਾਂ ਨੇ ਪਹਿਲਾਂ ਫਾਰਮ ਭਰਨ ਦੀ 1550 ਰੁਪਏ ਫੀਸ ਦੱਸੀ ਅਤੇ ਕਿਹਾ ਕਿ ਇਸ ਨਾਲ ਤੁਸੀਂ ਇਸ ਕੰਪਨੀ ਦੇ ਮੈਂਬਰ ਬਣ ਜਾਓਗੇ। ਇਸ ਨਾਲ ਕੰਪਨੀ ਦਾ ਕਾਰਡ ਵੀ ਬਣੇਗਾ ਅਤੇ ਫਿਰ ਤੁਸੀਂ ਇਸ ਕਾਰਡ ਜ਼ਰੀਏ ਲੜਕੀਆਂ ਨਾਲ 4 ਮੀਟਿੰਗਾਂ ਵਿਚ ਸ਼ਾਮਲ ਹੋ ਸਕਦੇ ਹੋ। ਫਿਰ ਉਸ ਨੇ ਆਪਣੇ ਫੋਨ ਪੇਅ ਤੋਂ 1550 ਰੁਪਏ ਟ੍ਰਾਂਸਫਰ ਕਰ ਦਿੱਤੇ।
ਫਿਰ ਉਸ ਨੇ ਮੁਲਾਕਾਤ ਲਈ ਸਕਿਓਰਿਟੀ ਫੀਸ ਵਜੋਂ 2000 ਰੁਪਏ ਹੋਰ ਮੰਗੇ। ਫਿਰ ਗੱਲਾਂ ਵਿਚ ਪਾ ਕੇ 1700 ਰੁਪਏ ਹੋਰ ਲੈ ਲਏ। ਉਹਨਾਂ ਦੇ ਖਾਤਿਆਂ ਵਿਚ ਕੁੱਲ 5250 ਰੁਪਏ ਜਮ੍ਹਾਂ ਕਰਵਾਏ ਗਏ। ਉਸ ਨੂੰ ਉਸੇ ਨੰਬਰ ਤੋਂ ਦੁਬਾਰਾ ਫੋਨ ਆਇਆ ਅਤੇ ਕਿਹਾ ਕਿ ਮੀਟਿੰਗ ਲਈ ਹੋਟਲ ਬੁੱਕ ਹੋ ਗਿਆ ਹੈ। ਤੁਹਾਨੂੰ ਇਸ ਦੇ ਲਈ 4,300 ਰੁਪਏ ਅਦਾ ਕਰਨੇ ਪੈਣਗੇ। ਫਿਰ ਲਾਲਚ ਦੇ ਕੇ ਖਾਤੇ ਵਿਚ ਕੁੱਲ 54,400 ਰੁਪਏ ਜਮ੍ਹਾਂ ਕਰਵਾ ਲਏ।
ਜਵਾਨ ਨੇ ਦੱਸਿਆ ਕਿ ਉਸ ਨੇ ਗੱਲਾਂ ਵਿਚ ਆ ਕੇ 2 ਦਿਨ ਵਿਚ ਕੁੱਲ 59,650 ਰੁਪਏ ਟ੍ਰਾਂਸਫਰ ਕੀਤੇ। ਫਿਰ ਉਸ ਨੇ ਕਿਹਾ ਕਿ ਉਹ ਜਲਦੀ ਮੁਲਾਕਾਤ ਦਾ ਪ੍ਰਬੰਧ ਕਰੇਗਾ। ਜਦੋਂ ਦੁਬਾਰਾ ਫੋਨ ਕੀਤਾ ਤਾਂ ਉਸ ਨੇ ਜਵਾਨ ਦਾ ਫੋਨ ਚੁੱਕਣਾ ਬੰਦ ਕਰ ਦਿੱਤਾ। ਬਾਅਦ ਵਿਚ ਉਸ ਨੇ ਆਪਣਾ ਫੋਨ ਬੰਦ ਕਰ ਦਿੱਤਾ। ਬਾਅਦ ਵਿਚ ਉਸ ਨੂੰ ਪਤਾ ਲੱਗਿਆ ਕਿ ਉਸ ਨਾਲ ਸਾਈਬਰ ਧੋਖਾਧੜੀ ਹੋਈ ਹੈ, ਇਸ ਲਈ ਉਸ ਨੇ 1930 'ਤੇ ਕਾਲ ਕੀਤੀ। ਸਾਈਬਰ ਪੁਲਿਸ ਨੇ ਅਣਪਛਾਤੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
