ਰਿਲਾਇੰਸ ਇੰਡਸਟਰੀਜ਼ ਦੇ ਸਟਾਕਸ ਦਾ ਸ਼ਾਨਦਾਰ ਪ੍ਰਦਰਸ਼ਨ
ਮੁੰਬਈ : ਭਾਰਤੀ ਬਾਜ਼ਾਰਾਂ ਦਾ ਵੀਰਵਾਰ ਨੂੰ ਸ਼ਾਨਦਾਰ ਦਿਨ ਰਿਹਾ। ਬੀ. ਐੱਸ. ਈ. ਦਾ ਸੈਂਸੈਕਸ 646.40 ਅੰਕ ਦੀ ਤੇਜ਼ੀ ਨਾਲ 38,840.32 ਦੇ ਪੱਧਰ 'ਤੇ ਬੰਦ ਹੋਇਆ। ਰਿਲਾਇੰਸ ਇੰਡਸਟਰੀਜ਼ ਦੇ ਸਟਾਕਸ ਦਾ ਪ੍ਰਦਰਸ਼ਨ ਸਭ ਤੋਂ ਸ਼ਾਨਦਾਰ ਰਿਹਾ।
Stock Market
ਉੱਥੇ ਹੀ, ਨਿਫਟੀ 171.25 ਦੀ ਛਲਾਂਗ ਲਗਾ ਕੇ 11,449.25 ਦੇ ਪੱਧਰ 'ਤੇ ਬੰਦ ਹੋਇਆ। ਇਸ ਤੋਂ ਪਹਿਲਾਂ ਸਵੇਰੇ ਬੀ. ਐੱਸ. ਈ. ਸੈਂਸੈਕਸ 322.96 ਅੰਕ ਉਪਰ 38,516.88 'ਤੇ ਅਤੇ ਨਿਫਟੀ 85.3 ਅੰਕ ਉਪਰ 11,363.30 ਦੇ ਪੱਧਰ 'ਤੇ ਖੁੱਲ੍ਹਾ ਸੀ।
Stock Market
ਰਿਲਾਇੰਸ ਇੰਡਸਟਰੀਜ਼ ਨੇ 15 ਲੱਖ ਕਰੋੜ ਰੁਪਏ ਦੇ ਪੂੰਜੀਕਰਨ ਨੂੰ ਪਾਰ ਕਰ ਕੇ ਸੂਚਕ ਅੰਕਾਂ 'ਚ ਅਪਣਾ ਦਬਦਬਾ ਕਾਇਮ ਕੀਤਾ। ਰਿਲਾਇੰਸ ਦੇ ਰਿਟੇਲ ਕਾਰੋਬਾਰ 'ਚ ਨਿਵੇਸ਼ ਦੀਆਂ ਖ਼ਬਰਾਂ ਨਾਲ ਇਸ ਦੇ ਸਟਾਕਸ ਨੇ ਜ਼ਬਰਦਸਤ ਤੇਜ਼ੀ ਦਰਜ ਕੀਤੀ, ਜੋ ਆਖ਼ੀਰ 'ਚ 7.1 ਫ਼ੀ ਸਦੀ ਦੇ ਜ਼ੋਰਦਾਰ ਉਛਾਲ ਨਾਲ 2,314.65 ਦੇ ਪੱਧਰ 'ਤੇ ਬੰਦ ਹੋਏ। ਦਿਨ ਦੇ ਕਾਰੋਬਾਰ ਦੌਰਾਨ ਇਸ ਨੇ 2,343.90 ਤਕ ਦਾ ਉੱਚਾ ਪੱਧਰ ਵੀ ਦਰਜ ਕੀਤਾ।
India's stock market
ਇਸ ਤੋਂ ਇਲਾਵਾ ਬੈਂਕ ਅਤੇ ਆਈ. ਟੀ. ਸਟਾਕਸ 'ਚ ਤੇਜ਼ੀ ਨੇ ਵੀ ਬਾਜ਼ਾਰ ਨੂੰ ਬੂਸਟ ਕੀਤਾ। ਬੀ. ਐੱਸ. ਈ. ਮਿਡ ਕੈਪ 0.9 ਫ਼ੀ ਸਦੀ ਉਪਰ, ਜਦੋਂ ਕਿ ਸਮਾਲ ਕੈਪ 1.3 ਫ਼ੀ ਸਦੀ ਵੱਧ ਕੇ ਬੰਦ ਹੋਇਆ। ਨਿਫਟੀ 'ਚ ਆਰ. ਆਈ. ਐੱਲ., ਬੀ. ਪੀ. ਸੀ. ਐੱਲ., ਏਸ਼ੀਅਨ ਪੇਂਟਸ, ਆਈ. ਓ. ਸੀ. ਅਤੇ ਐਕਸਿਸ ਬੈਂਕ ਸਭ ਤੋਂ ਖਰ੍ਹਾ ਪ੍ਰਦਰਸ਼ਨ ਕਰਨ ਵਾਲੇ ਰਹੇ, ਜਦੋਂ ਕਿ ਭਾਰਤੀ ਇੰਫਰਾਟੈੱਲ, ਹਿੰਡਾਲਕੋ, ਟਾਟਾ ਸਟੀਲ, ਭਾਰਤੀ ਏਅਰਟੈੱਲ ਅਤੇ ਡਾ. ਰੈਡੀਜ਼ ਨੇ ਗਿਰਾਵਟ ਦਰਜ ਕੀਤੀ।
