ਪ੍ਰਧਾਨ ਮੰਤਰੀ ਮੋਦੀ 11 ਨਵੰਬਰ ਨੂੰ ਕਰਨਗੇ ਉਦਘਾਟਨ
ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 11 ਨਵੰਬਰ ਨੂੰ ਕਰਨਾਟਕ ਦੀ ਰਾਜਧਾਨੀ ਬੈਂਗਲੁਰੂ ਵਿੱਚ ਕੇਮਪੇਗੌੜਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਗ੍ਰੈਂਡ ਟਰਮੀਨਲ-2 ਦਾ ਉਦਘਾਟਨ ਕਰਨਗੇ। ਇਸ ਦਾ ਨਿਰਮਾਣ 5000 ਕਰੋੜ ਰੁਪਏ ਦੀ ਲਾਗਤ ਨਾਲ ਕੀਤਾ ਗਿਆ ਹੈ। ਕੇਮਪੇਗੌੜਾ ਹਵਾਈ ਅੱਡੇ ਦੇ ਦੂਜੇ ਟਰਮੀਨਲ 2 ਦੇ ਸ਼ੁਰੂ ਹੋਣ ਤੋਂ ਬਾਅਦ ਚੈੱਕ-ਇਨ ਅਤੇ ਇਮੀਗ੍ਰੇਸ਼ਨ ਕਾਊਂਟਰਾਂ ਦੀ ਗਿਣਤੀ ਦੁੱਗਣੀ ਹੋ ਜਾਵੇਗੀ।
ਇਸ ਨਾਲ ਹਵਾਈ ਅੱਡੇ ਦੀ ਯਾਤਰੀ ਹੈਂਡਲਿੰਗ ਸਮਰੱਥਾ ਮੌਜੂਦਾ 2.5 ਕਰੋੜ ਤੋਂ ਵਧ ਕੇ 5-6 ਕਰੋੜ ਹੋ ਜਾਵੇਗੀ। ਨਵਾਂ ਟਰਮੀਨਲ ਦੇਸ਼ ਦੀ ਸਿਲੀਕਾਨ ਵੈਲੀ ਵਜੋਂ ਜਾਣੇ ਜਾਂਦੇ ਬੈਂਗਲੁਰੂ ਦੀਆਂ ਹਵਾਈ ਸਹੂਲਤਾਂ ਵਿੱਚ ਮਹੱਤਵਪੂਰਨ ਵਾਧਾ ਕਰੇਗਾ। ਨਵੇਂ ਟਰਮੀਨਲ ਦਾ ਨਿਰਮਾਣ 5000 ਕਰੋੜ ਰੁਪਏ ਦੀ ਲਾਗਤ ਨਾਲ ਕੀਤਾ ਗਿਆ ਹੈ। ਟਰਮੀਨਲ-2 ਨੂੰ 'ਗਾਰਡਨ ਸਿਟੀ ਆਫ ਬੈਂਗਲੁਰੂ' ਦੀ ਯਾਦ 'ਚ ਡਿਜ਼ਾਈਨ ਕੀਤਾ ਗਿਆ ਹੈ। ਇੱਥੇ ਪਹੁੰਚਣ 'ਤੇ, ਯਾਤਰੀਆਂ ਨੂੰ ਬਾਗ ਵਿੱਚ ਸੈਰ ਕਰਨ ਵਰਗਾ ਅਨੁਭਵ ਮਿਲੇਗਾ।
ਯਾਤਰੀ 10,000 ਵਰਗ ਮੀਟਰ ਤੋਂ ਵੱਧ ਹਰੀਆਂ ਕੰਧਾਂ, ਲਟਕਦੇ ਬਾਗਾਂ ਅਤੇ ਬਾਹਰੀ ਬਗੀਚਿਆਂ ਵਿੱਚੋਂ ਲੰਘਣਗੇ। ਇਹ ਬਾਗ ਭਾਰਤ ਵਿੱਚ ਦੇਸੀ ਤਕਨੀਕ ਦੀ ਵਰਤੋਂ ਕਰਕੇ ਤਿਆਰ ਕੀਤੇ ਗਏ ਹਨ। ਬੈਂਗਲੁਰੂ ਹਵਾਈ ਅੱਡਾ ਪਹਿਲਾਂ ਹੀ ਪੂਰੇ ਕੈਂਪਸ ਵਿੱਚ 100% ਨਵਿਆਉਣਯੋਗ ਊਰਜਾ ਦੀ ਵਰਤੋਂ ਇਸ ਮਾਮਲੇ ਵਿੱਚ ਇੱਕ ਮਿਸਾਲ ਕਾਇਮ ਕੀਤੀ ਹੈ। ਟਰਮੀਨਲ 2 ਨੂੰ ਵੀ ਇਸੇ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ।
