ਹਰਸ਼ਿਤਾ ਕੇਜਰੀਵਾਲ ਨਾਲ ਹੋਈ 34,000 ਰੁਪਏ ਦੀ ਠੱਗੀ
ਨਵੀਂ ਦਿੱਲੀ: ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੀ ਬੇਟੀ ਹਰਸ਼ਿਤਾ ਨਾਲ ਇਕ ਵਿਅਕਤੀ ਨੇ 34,000 ਰੁਪਏ ਦੀ ਠੱਗੀ ਕੀਤੀ ਹੈ। ਦਰਅਸਲ ਹਰਸ਼ਿਤਾ ਨੇ ਇਕ ਈ-ਕਾਮਰਸ ਪਲੇਟਫਾਰਮ ‘ਤੇ ਸੋਫੇ ਦੀ ਵਿਕਰੀ ਲਈ ਸੂਚਨਾ ਦਿੱਤੀ ਸੀ। ਇਕ ਵਿਅਕਤੀ ਨੇ ਖੁਦ ਨੂੰ ਖਰੀਦਦਾਰ ਦੱਸ ਕੇ ਹਰਸ਼ਿਤਾ ਨਾਲ ਠੱਗੀ ਕੀਤੀ।
Arvind Kejriwal
ਪੁਲਿਸ ਨੇ ਦੱਸਿਆ ਕਿ ਇਸ ਸਬੰਧੀ ਸੂਚਨਾ ਮਿਲਣ ‘ਤੇ ਆਈਪੀਸੀ ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਪੁਲਿਸ ਮੁਤਾਬਕ ਹਰਸ਼ਿਤਾ ਨੇ ਸੋਫੇ ਦੀ ਆਨਲਾਈਨ ਵਿਕਰੀ ਲਈ ਈ-ਕਾਮਰਸ ਸਾਈਟ ‘ਤੇ ਸੂਚਨਾ ਦਿੱਤੀ ਸੀ। ਵਿਅਕਤੀ ਨੇ ਖਰੀਦਦਾਰੀ ਕਰਨ ਦੀ ਇੱਛਾ ਜ਼ਾਹਿਰ ਕੀਤੀ ਅਤੇ ਹਰਸ਼ਿਤਾ ਨਾਲ ਸੰਪਰਕ ਕੀਤਾ।
Harshita Kejriwal
ਵਿਅਕਤੀ ਨੇ ਆਨਲਾਈਨ ਭੁਗਤਾਨ ਕਰਨ ਲਈ ਹਰਸ਼ਿਤਾ ਨੂੰ ਕਿਊਆਰ ਕੋਡ ਭੇਜਿਆ ਅਤੇ ਉਸ ਨੂੰ ਸਕੈਨ ਕਰਨ ਲਈ ਕਿਹਾ ਤਾਂ ਜੋ ਰਕਮ ਹਰਸ਼ਿਤਾ ਦੇ ਖਾਤੇ ਵਿਚ ਟ੍ਰਾਂਸਫਰ ਕੀਤੀ ਜਾ ਸਕੇ ਪਰ ਅਜਿਹਾ ਕਰਨ ‘ਤੇ ਹਰਸ਼ਿਤਾ ਦੇ ਖਾਤੇ ਵਿਚੋਂ 20,000 ਰੁਪਏ ਕੱਟ ਹੋ ਗਏ।
Harshita Kejriwal
ਇਸ ਤੋਂ ਬਾਅਦ ਜਦੋਂ ਹਰਸ਼ਿਤਾ ਨੇ ਵਿਅਕਤੀ ਨੂੰ ਪੁੱਛਿਆ ਤਾਂ ਉਸ ਨੇ ਕਿਹਾ ਕਿ ਗਲਤੀ ਨਾਲ ਅਜਿਹਾ ਹੋਇਆ ਹੈ। ਦੁਬਾਰਾ ਇਹੀ ਪ੍ਰਕਿਰਿਆ ਕਰਨ ‘ਤੇ ਹਰਸ਼ਿਤਾ ਦੇ ਖਾਤੇ ਵਿਚੋਂ 14,000 ਰੁਪਏ ਕੱਟ ਗਏ। ਪੁਲਿਸ ਦਾ ਕਹਿਣਾ ਹੈ ਕਿ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ ਤੇ ਜਲਦ ਹੀ ਦੋਸ਼ੀ ਦਾ ਪਤਾ ਲਗਾ ਲਿਆ ਜਾਵੇਗਾ।
