ਨਾਰਾਇਣਨ 26 ਸਾਲ ਸੇਵਾ ਨਿਭਾਉਣ ਤੋਂ ਬਾਅਦ 31 ਜੁਲਾਈ, 2025 ਨੂੰ ਨੈਸਲੇ ਇੰਡੀਆ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਰਦੇਸ਼ਕ ਦੇ ਅਹੁਦੇ ਤੋਂ ਸੇਵਾਮੁਕਤ ਹੋਣਗੇ
Manish Tiwari : ਰੋਜ਼ਾਨਾ ਪ੍ਰਯੋਗ ਵਾਲੀਆਂ ਵਸਤਾਂ ਬਣਾਉਣ ਵਾਲੀ (ਐਫ.ਐਮ.ਸੀ.ਜੀ.) ਕੰਪਨੀ ਨੇਸਲੇ ਇੰਡੀਆ ਨੇ ਸੋਮਵਾਰ ਨੂੰ ਮਨੀਸ਼ ਤਿਵਾੜੀ ਨੂੰ ਪ੍ਰਬੰਧ ਨਿਰਦੇਸ਼ਕ ਨਿਯੁਕਤ ਕਰਨ ਦਾ ਐਲਾਨ ਕੀਤਾ। ਮੌਜੂਦਾ ਮੈਨੇਜਿੰਗ ਡਾਇਰੈਕਟਰ ਸੁਰੇਸ਼ ਨਾਰਾਇਣਨ ਅਗਲੇ ਸਾਲ ਜੁਲਾਈ ’ਚ ਸੇਵਾਮੁਕਤ ਹੋ ਰਹੇ ਹਨ।
ਨੈਸਲੇ ਨੇ ਸ਼ੇਅਰ ਬਾਜ਼ਾਰ ਨੂੰ ਦਿਤੀ ਸੂਚਨਾ ’ਚ ਕਿਹਾ ਕਿ ਤਿਵਾੜੀ ਨੂੰ 1 ਅਗੱਸਤ 2025 ਤੋਂ ਨੈਸਲੇ ਇੰਡੀਆ ਦਾ ਪ੍ਰਬੰਧ ਨਿਰਦੇਸ਼ਕ ਨਿਯੁਕਤ ਕੀਤਾ ਗਿਆ ਹੈ। ਨਾਰਾਇਣਨ 26 ਸਾਲ ਸੇਵਾ ਨਿਭਾਉਣ ਤੋਂ ਬਾਅਦ 31 ਜੁਲਾਈ, 2025 ਨੂੰ ਨੈਸਲੇ ਇੰਡੀਆ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਰਦੇਸ਼ਕ ਦੇ ਅਹੁਦੇ ਤੋਂ ਸੇਵਾਮੁਕਤ ਹੋਣਗੇ।
ਬਿਆਨ ’ਚ ਕਿਹਾ ਗਿਆ ਹੈ ਤਿਵਾੜੀ ਐਮਾਜ਼ਾਨ ਡਿਜੀਟਲ ਸਰਵਿਸਿਜ਼ ਅਤੇ ਮੋਰ ਕੰਜ਼ਿਊਮਰ ਬ੍ਰਾਂਡਜ਼ ਦੇ ਡਾਇਰੈਕਟਰ ਹਨ। ਉਹ 30 ਅਕਤੂਬਰ 2024 ਨੂੰ ਅਪਣੇ ਨਿਰਦੇਸ਼ਕ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦੇਣਗੇ।
ਆਈ.ਆਈ.ਐਮ. ਬੰਗਲੌਰ ਦੇ ਸਾਬਕਾ ਵਿਦਿਆਰਥੀ ਤਿਵਾੜੀ ਕੋਲ ਈ-ਕਾਮਰਸ ਅਤੇ ਖਪਤਕਾਰ ਵਸਤੂਆਂ ਦੇ ਖੇਤਰ ’ਚ ਸੰਚਾਲਨ ਅਤੇ ਰਣਨੀਤਕ ਪਹਿਲਕਦਮੀਆਂ ਦੀ ਅਗਵਾਈ ਕਰਨ ਦਾ ਲਗਭਗ ਤਿੰਨ ਦਹਾਕਿਆਂ ਦਾ ਤਜਰਬਾ ਹੈ। ਉਹ ਐਫ.ਐਮ.ਸੀ.ਜੀ. ਪ੍ਰਮੁੱਖ ਯੂਨੀਲੀਵਰ ਨਾਲ 20 ਸਾਲਾਂ ਬਾਅਦ 2016 ’ਚ ਐਮਾਜ਼ਾਨ ’ਚ ਸ਼ਾਮਲ ਹੋਏ ਸਨ।
