ਫਾਸਟ ਟਰੈਕ ਅਦਾਲਤ 'ਚ ਵੀ ਸੁਣਵਾਈ ਦੀ ਮੰਗ ਕੀਤੀ
Pune Porsche crash: ਨਵੀਂ ਦਿੱਲੀ - ਜੁਵੇਨਾਈਲ ਜਸਟਿਸ ਬੋਰਡ (ਜੇਜੇਬੀ) ਨੇ ਪੁਣੇ ਪੋਰਸ਼ ਮਾਮਲੇ ਵਿਚ ਇੱਕ ਨਾਬਾਲਗ ਦੋਸ਼ੀ ਦੀ ਨਿਗਰਾਨੀ ਹੋਮ ਰਿਮਾਂਡ ਵਧਾ ਦਿੱਤੀ ਹੈ। ਉਹ 12 ਜੂਨ ਤੱਕ ਨਿਗਰਾਨੀ ਘਰ ਵਿਚ ਰਹੇਗਾ। ਪੁਲਿਸ ਨੇ ਬੋਰਡ ਤੋਂ ਨਾਬਾਲਗ ਦੇ ਰਿਮਾਂਡ ਨੂੰ 14 ਦਿਨਾਂ ਲਈ ਵਧਾਉਣ ਦੀ ਮੰਗ ਕੀਤੀ ਸੀ, ਪਰ ਬੋਰਡ ਨੇ ਇਸ ਨੂੰ 7 ਦਿਨਾਂ ਲਈ ਵਧਾ ਦਿੱਤਾ।
ਦੂਜੇ ਪਾਸੇ ਬੁੱਧਵਾਰ (5 ਜੂਨ) ਨੂੰ ਫੋਰੈਂਸਿਕ ਰਿਪੋਰਟ ਵੀ ਆਈ ਹੈ, ਜਿਸ 'ਚ ਪੁਸ਼ਟੀ ਹੋਈ ਹੈ ਕਿ ਦੋਸ਼ੀ ਦੇ ਖੂਨ ਦਾ ਨਮੂਨਾ ਉਸ ਦੀ ਮਾਂ ਨਾਲ ਹੀ ਬਦਲਿਆ ਗਿਆ ਸੀ। ਪੁਲਿਸ ਨੇ ਅਦਾਲਤ ਨੂੰ ਦੱਸਿਆ ਕਿ ਮਾਂ ਨੇ ਨਾਬਾਲਗ ਦੇ ਨਸ਼ੇ ਵਿਚ ਹੋਣ ਦਾ ਤੱਥ ਲੁਕਾਉਣ ਲਈ ਪਿਤਾ ਦੀ ਮੌਜੂਦਗੀ ਵਿਚ ਆਪਣਾ ਖੂਨ ਦਿੱਤਾ ਸੀ।
ਜ਼ਿਲ੍ਹਾ ਅਦਾਲਤ ਨੇ ਮਾਂ ਸ਼ਿਵਾਨੀ ਅਗਰਵਾਲ ਅਤੇ ਪਿਤਾ ਵਿਸ਼ਾਲ ਅਗਰਵਾਲ ਨੂੰ ਖੂਨ ਦੇ ਨਮੂਨੇ ਬਦਲਣ ਲਈ 10 ਜੂਨ ਤੱਕ ਪੁਲਿਸ ਹਿਰਾਸਤ ਵਿਚ ਭੇਜ ਦਿੱਤਾ ਹੈ। ਨਮੂਨੇ ਬਦਲਣ ਵਾਲੇ ਡਾਕਟਰ ਅਜੈ ਤਾਵਰੇ ਅਤੇ ਡਾਕਟਰ ਸ਼੍ਰੀਹਰੀ ਹੈਲੇਨੋਰ ਨੂੰ 7 ਜੂਨ ਤੱਕ ਪੁਲਿਸ ਹਿਰਾਸਤ ਵਿਚ ਭੇਜ ਦਿੱਤਾ ਗਿਆ ਹੈ।
ਪੁਲਿਸ ਨੇ ਰਾਜ ਸਰਕਾਰ ਨੂੰ ਇਸ ਮਾਮਲੇ ਦੀ ਸੁਣਵਾਈ ਫਾਸਟ ਟਰੈਕ ਅਦਾਲਤ ਵਿੱਚ ਕਰਵਾਉਣ ਲਈ ਕਿਹਾ ਹੈ। ਰਿਪੋਰਟਾਂ ਮੁਤਾਬਕ ਇਸ ਮਹੀਨੇ ਦੇ ਅੰਤ ਤੱਕ ਪੁਲਿਸ ਸਾਰੇ ਮੁਲਜ਼ਮਾਂ ਖਿਲਾਫ਼ ਚਾਰਜਸ਼ੀਟ ਵੀ ਦਾਇਰ ਕਰੇਗੀ। ਪੁਣੇ ਦੇ ਕਲਿਆਣੀ ਨਗਰ ਇਲਾਕੇ 'ਚ 18-19 ਮਈ ਦੀ ਰਾਤ ਨੂੰ ਇਕ 17 ਸਾਲਾ 8 ਮਹੀਨੇ ਦੇ ਨਾਬਾਲਗ ਲੜਕੇ ਨੇ ਆਈਟੀ ਸੈਕਟਰ 'ਚ ਕੰਮ ਕਰਨ ਵਾਲੇ ਬਾਈਕ ਸਵਾਰ ਨੌਜਵਾਨ ਅਤੇ ਔਰਤ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਨਾਲ ਦੋਵਾਂ ਦੀ ਮੌਤ ਹੋ ਗਈ।
ਘਟਨਾ ਦੇ ਸਮੇਂ ਦੋਸ਼ੀ ਸ਼ਰਾਬੀ ਸੀ। ਉਹ 200 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਕਾਰ ਚਲਾ ਰਿਹਾ ਸੀ। ਪੁਣੇ ਪੁਲਿਸ ਨੇ ਕੱਲ੍ਹ ਮ੍ਰਿਤਕ ਨੌਜਵਾਨ ਦੇ ਪਰਿਵਾਰਕ ਮੈਂਬਰਾਂ ਨਾਲ ਮੁਲਾਕਾਤ ਕੀਤੀ।
