ਸ਼ਰਦ ਪਵਾਰ ਨੂੰ ਅਪਣੀ ਪਾਰਟੀ ਦਾ ਨਵਾਂ ਨਾਂ ਅਤੇ ਚੋਣ ਨਿਸ਼ਾਨ ਰੱਖਣ ਲਈ ਕਿਹਾ ਗਿਆ
ਨਵੀਂ ਦਿੱਲੀ : ਚੋਣ ਕਮਿਸ਼ਨ ਨੇ ਮੰਗਲਵਾਰ ਨੂੰ ਐਲਾਨ ਕੀਤਾ ਕਿ ਅਜੀਤ ਪਵਾਰ ਧੜਾ ਅਸਲੀ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਐਨ.ਸੀ.ਪੀ.) ਹੈ। ਇਸ ਦੇ ਨਾਲ ਹੀ ਅਜੀਤ ਪਵਾਰ ਅਤੇ ਐਨ.ਸੀ.ਪੀ. ਦੇ ਸੰਸਥਾਪਕ ਸ਼ਰਦ ਪਵਾਰ ਧੜਿਆਂ ਵਿਚਾਲੇ ਪਾਰਟੀ ਦੇ ਦਾਅਵੇ ਨੂੰ ਲੈ ਕੇ ਕਈ ਮਹੀਨਿਆਂ ਤੋਂ ਚੱਲ ਰਹੀ ਲੜਾਈ ਖਤਮ ਹੋ ਗਈ ਹੈ। ਸ਼ਰਦ ਪਵਾਰ ਧੜੇ ਨੇ ਚੋਣ ਕਮਿਸ਼ਨ ਦੇ ਫੈਸਲੇ ਨੂੰ ਲੋਕਤੰਤਰ ਦਾ ਕਤਲ ਕਰਾਰ ਦਿਤਾ ਹੈ।
ਚੋਣ ਕਮਿਸ਼ਨ ਨੇ ਇਕ ਹੁਕਮ ’ਚ ਐਨ.ਸੀ.ਪੀ. ਦਾ ਚੋਣ ਨਿਸ਼ਾਨ ‘ਕੰਧ ਘੜੀ’ ਅਜੀਤ ਪਵਾਰ ਦੀ ਅਗਵਾਈ ਵਾਲੇ ਸਮੂਹ ਨੂੰ ਅਲਾਟ ਕਰ ਦਿਤਾ ਹੈ। ਕਮਿਸ਼ਨ ਨੇ ਕਿਹਾ ਕਿ ਇਹ ਫੈਸਲਾ ਅਜਿਹੀ ਪਟੀਸ਼ਨ ਦੀ ਵਿਚਾਰਯੋਗਤਾ ਦੇ ਨਿਰਧਾਰਤ ਪਹਿਲੂਆਂ ਦੀ ਪਾਲਣਾ ਕਰਦਾ ਹੈ, ਜਿਸ ’ਚ ਪਾਰਟੀ ਸੰਵਿਧਾਨ ਦੇ ਉਦੇਸ਼ਾਂ ਦੀ ਪਰਖ, ਪਾਰਟੀ ਸੰਵਿਧਾਨ ਦੀ ਪਰਖ ਅਤੇ ਸੰਗਠਨਾਤਮਕ ਅਤੇ ਵਿਧਾਨਕ ਦੋਹਾਂ ਕਾਰਜਕਾਲਾਂ ’ਚ ਬਹੁਮਤ ਦੀ ਪਰਖ ਸ਼ਾਮਲ ਹੈ।
ਆਗਾਮੀ ਰਾਜ ਸਭਾ ਚੋਣਾਂ ਦੇ ਮੱਦੇਨਜ਼ਰ ਵਿਸ਼ੇਸ਼ ਛੋਟ ਦਿੰਦੇ ਹੋਏ ਕਮਿਸ਼ਨ ਨੇ ਸ਼ਰਦ ਪਵਾਰ ਦੀ ਅਗਵਾਈ ਵਾਲੇ ਧੜੇ ਨੂੰ ਅਪਣੀ ਸਿਆਸੀ ਪਾਰਟੀ ਲਈ ਨਾਮ ਦਾ ਦਾਅਵਾ ਕਰਨ ਅਤੇ ਤਿੰਨ ਤਰਜੀਹਾਂ ਦੇਣ ਲਈ ਬੁਧਵਾਰ ਦੁਪਹਿਰ ਤਕ ਦਾ ਸਮਾਂ ਦਿਤਾ ਹੈ। ਅਜੀਤ ਪਵਾਰ ਪਿਛਲੇ ਸਾਲ ਜੁਲਾਈ ’ਚ ਐਨ.ਸੀ.ਪੀ. ਦੇ ਬਹੁਗਿਣਤੀ ਵਿਧਾਇਕਾਂ ਨਾਲ ਮਹਾਰਾਸ਼ਟਰ ਸਰਕਾਰ ’ਚ ਸ਼ਾਮਲ ਹੋਏ ਸਨ ਅਤੇ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਾਲੀ ਭਾਜਪਾ-ਸ਼ਿਵ ਫ਼ੌਜ ਸਰਕਾਰ ਦਾ ਸਮਰਥਨ ਕੀਤਾ ਸੀ।
