38900 ਕਰੋੜ ਰੁਪਏ ਦੇ ਲੜਾਕੂ ਜਹਾਜ਼ਾਂ ਤੇ ਮਿਜ਼ਾਈਲਾਂ ਦੀ ਖ਼ਰੀਦ ਨੂੰ ਪ੍ਰਵਾਨਗੀ
ਨਵੀਂ ਦਿੱਲੀ, 2 ਜੁਲਾਈ : ਚੀਨ ਨਾਲ ਸਰਹੱਦ 'ਤੇ ਵੱਧ ਰਹੇ ਤਣਾਅ ਦੇ ਮਾਹੌਲ ਵਿਚਾਲੇ ਰਖਿਆ ਮੰਤਰਾਲੇ ਨੇ ਫ਼ੌਜਾਂ ਦੀ ਜੰਗੀ ਸਮਰੱਥਾ ਵਧਾਉਣ ਲਈ 38900 ਕਰੋੜ ਰੁਪਏ ਦੀ ਲਾਗਤ ਨਾਲ ਕੁੱਝ ਲੜਾਕੂ ਜਹਾਜ਼ਾਂ, ਮਿਜ਼ਾਈਲ ਸਿਸਟਮ ਅਤੇ ਹੋਰ ਹਥਿਆਰਾਂ ਦੀ ਖ਼ਰੀਦ ਨੂੰ ਪ੍ਰਵਾਨਗੀ ਦਿਤੀ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ 21-ਮਿਗ 29 ਲੜਾਕੂ ਜਹਾਜ਼ ਰੂਸ ਤੋਂ ਜਦਕਿ 12 ਐਸਯੂ 30 ਐਮਕੇਆਈ ਜਹਾਜ਼ ਹਿੰਦੁਸਤਾਨ ਐਰੋਨਾਟਿਕਸ ਲਿਮਟਿਡ ਤੋਂ ਖ਼ਰੀਦੇ ਜਾਣਗੇ।
File Photo
ਮੰਤਰਾਲੇ ਨੇ ਮੌਜੂਦਾ 59 ਮਿਗ 29 ਜਹਾਜ਼ਾਂ ਨੂੰ ਉੱਨਤ ਬਣਾਉਣ ਦੀ ਵਖਰੀ ਤਜਵੀਜ਼ ਨੂੰ ਵੀ ਮਨਜ਼ੂਰੀ ਦਿਤੀ ਹੈ। ਰਖਿਆ ਮੰਤਰੀ ਰਾਜਨਾਥ ਸਿੰਘ ਦੀ ਅਗਵਾਈ ਵਿਚ ਰਖਿਆ ਖ਼ਰੀਦ ਪਰਿਸ਼ਦ ਦੀ ਬੈਠਕ ਵਿਚ ਇਹ ਫ਼ੈਸਲੇ ਕੀਤੇ ਗਏ। ਅਧਿਕਾਰੀਆਂ ਨੇ ਦਸਿਆ ਕਿ 21 ਮਿਗ ਲੜਾਕੂ ਜਹਾਜ਼ਾਂ ਅਤੇ ਮਿਗ-29 ਦੇ ਮੌਜੂਦਾ ਬੇੜੇ ਨੂੰ ਉੱਨਤ ਬਣਾਉਣ 'ਤੇ ਅਨੁਮਾਨਤ ਤੌਰ 'ਤੇ 7418 ਕਰੋੜ ਰੁਪਏ ਖ਼ਰਚ ਹੋਣਗੇ ਜਦਕਿ ਹਿੰਦੁਸਤਾਨ ਐਰੋਨਾਟਿਕਸ ਲਿਮਟਿਡ ਤੋਂ 12 ਨਵੇਂ ਐਸਯੂ-30 ਐਮਕੇਆਈ ਜਹਾਜ਼ਾਂ ਦੀ ਖ਼ਰੀਦ 'ਤੇ 10730 ਕਰੋੜ ਰੁਪਏ ਦੀ ਲਾਗਤ ਆਵੇਗੀ।
ਡੀਏਸੀ ਨੇ ਫ਼ੌਜ ਲਈ 1000 ਕਿਲੋਮੀਟਰ ਦੀ ਮਾਰ ਵਾਲੇ 'ਲੈਂਡ ਅਟੈਕ ਕਰੂਜ਼ ਮਿਜ਼ਾਈਲ ਸਿਸਟਮ' ਦੀ ਖ਼ਰੀਦ ਨੂੰ ਮਨਜ਼ੂਰੀ ਦਿਤੀ ਹੈ। ਅਧਿਕਾਰੀਆਂ ਨੇ ਦਸਿਆ ਕਿ ਇਸ ਰੂਪਰੇਖਾ ਅਤੇ ਵਿਕਾਸ ਤਜਵੀਜ਼ਾਂ ਦੀ ਲਾਗਤ 20400 ਕਰੋੜ ਰੁਪਏ ਹੈ। ਪਿਨਾਕਾ ਮਿਜ਼ਾਈਲ ਸਿਸਟਮ ਨਾਲ ਵੀ ਤਾਕਤ ਵਧੇਗੀ ਜਿਸ ਨਾਲ ਇਕ ਹਜ਼ਾਰ ਕਿਲੋਮੀਟਰ ਲੰਮੀ ਦੂਰੀ ਦੀ ਮਾਰ ਸਮਰੱਥਾ ਵਾਲੇ ਮਿਜ਼ਾਈਲ ਸਿਸਟਮ ਨਾਲ ਹਵਾਈ ਫ਼ੌਜ ਦੀ ਮਾਰ ਕਰਨ ਦੀ ਸਮਰੱਥਾ ਵਿਚ ਕਈ ਗੁਣਾਂ ਵਾਧਾ ਹੋਵੇਗਾ।
File Photo
ਅਧਿਕਾਰੀਆਂ ਮੁਤਾਬਕ ਹਥਿਆਰਬੰਦ ਮਿਜ਼ਾਈਲਾਂ ਨੂੰ ਬੇੜੇ ਵਿਚ ਸ਼ਾਮਲ ਕਰਨ ਨਾਲ ਫ਼ੋਰਸ ਦੀ ਤਾਕਤ ਵਿਚ ਹੋਰ ਵਾਧਾ ਹੋਵੇਗਾ ਜਿਸ ਨਾਲ ਭਾਰਤੀ ਹਵਾਈ ਫ਼ੌਜ ਅਤੇ ਜਲ ਫ਼ੌਜ ਦੀ ਮਾਰ ਸਮਰੱਥਾ ਵਿਚ ਜ਼ਬਰਦਸਤ ਵਾਧਾ ਹੋਵੇਗਾ। ਮੰਤਰਾਲੇ ਨੇ ਕਿਹਾ, 'ਦੇਸ਼ ਵਿਚ ਬਣੇ ਡਿਜ਼ਾਈਨ ਅਤੇ ਵਿਕਾਸ 'ਤੇ ਜ਼ੋਰ ਦਿਤਾ ਗਿਆ ਹੈ। ਇਸ ਮਨਜ਼ੂਰੀ ਵਿਚ ਭਾਰਤੀ ਉਦਯੋਗ ਤੋਂ 31130 ਕਰੋੜ ਰੁਪਏ ਦੀ ਖ਼ਰੀਦ ਵੀ ਸ਼ਾਮਲ ਹੈ। ਉਪਕਰਨ ਦਾ ਨਿਰਮਾਣ ਭਾਰਤ ਵਿਚ ਹੋਵੇਗਾ।' (ਏਜੰਸੀ)
File Photo
ਲੜਾਕੂ ਜਹਾਜ਼ਾਂ ਦਾ ਮੁਕਾਬਲਾ ਕਰ ਸਕੇਗੀ ਮਿਜ਼ਾਈਲ
ਅਧਿਕਾਰੀਆਂ ਨੇ ਦਸਿਆ ਕਿ ਮੰਤਰਾਲੇ ਨੇ ਬੀਵੀਆਰ ਮਿਜ਼ਾਈਲ ਸਿਸਟਮ ਦੀ ਖ਼ਰੀਦ ਨੂੰ ਵੀ ਮਨਜ਼ੂਰੀ ਦਿਤੀ ਹੈ। ਹਵਾ ਤੋਂ ਹਵਾ ਵਿਚ ਲੜਾਈ ਦੇ ਸਮਰੱਥ ਇਹ ਮਿਜ਼ਾਈਲ ਸਿਸਟਮ ਸੁਪਰਸੌਨਿਕ ਲੜਾਕੂ ਜਹਾਜ਼ਾਂ ਨਾਲ ਮੁਕਾਬਲਾ ਕਰ ਸਕਦੀ ਹੈ ਅਤੇ ਹਰ ਤਰ੍ਹਾਂ ਦੇ ਮੌਸਮ ਵਿਚ ਦਿਨ ਰਾਤ ਹਮੇਸ਼ ਕੰਮ ਕਰਨ ਦੇ ਸਮਰੱਥ ਹੋਵੇਗੀ। ਅਧਿਕਾਰੀਆਂ ਮੁਤਾਬਕ ਆਧੁਨਿਕ ਕਿਸਮ ਦੀ ਇਹ ਮਿਜ਼ਾਈਲ ਹੋਰ ਕਈ ਪੱਖਾਂ ਤੋਂ ਵੀ ਅਹਿਮ ਹੈ।
