9 ਲੋਕ ਵੀ ਕੀਤੇ ਗ੍ਰਿਫ਼ਤਾਰ
ਅਹਿਮਦਾਬਾਦ : ਗੁਜਰਾਤ ਵਿੱਚ ਇੱਕ ਹਫ਼ਤੇ ਵਿੱਚ 350 ਕਿਲੋ ਤੋਂ ਵੱਧ ਹੈਰੋਇਨ ਫੜੀ ਗਈ ਹੈ। ਇਸ ਦੀ ਬਾਜ਼ਾਰੀ ਕੀਮਤ 2 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦੱਸੀ ਗਈ ਹੈ। 28 ਅਪ੍ਰੈਲ ਨੂੰ ਹੀ ਜਾਂਚ ਏਜੰਸੀਆਂ ਨੇ 90 ਕਿਲੋ ਹੈਰੋਇਨ ਫੜੀ ਹੈ। ਇਸ ਨੂੰ 9,760 ਕਿਲੋ ਧਾਗੇ ਦੀ ਖੇਪ ਨਾਲ ਢੱਕ ਕੇ ਲਿਆਂਦਾ ਜਾ ਰਿਹਾ ਸੀ। ਇਹ ਹੈਰੋਇਨ ਗੁਜਰਾਤ ਦੇ ਪੀਪਾਵਾਵ ਬੰਦਰਗਾਹ ਤੋਂ ਫੜੀ ਗਈ ਹੈ।
PHOTO
ਗੁਜਰਾਤ ਪੁਲਿਸ ਦੇ ਡੀਜੀਪੀ ਆਸ਼ੀਸ਼ ਭਾਟੀਆ ਨੇ ਦੱਸਿਆ ਕਿ 5 ਮਹੀਨੇ ਪਹਿਲਾਂ ਈਰਾਨ ਤੋਂ ਧਾਗੇ ਵਾਲਾ ਇੱਕ ਕੰਟੇਨਰ ਪੀਪਾਵਾਵ ਬੰਦਰਗਾਹ 'ਤੇ ਆਇਆ ਸੀ। ਇਸ 'ਚ 4 ਸ਼ੱਕੀ ਬੈਗ ਮਿਲੇ, ਜਿਨ੍ਹਾਂ ਦਾ ਵਜ਼ਨ 395 ਕਿਲੋ ਸੀ। ਜਦੋਂ ਇਸ ਦੀ ਜਾਂਚ ਕੀਤੀ ਗਈ ਤਾਂ ਇਸ ਵਿੱਚ ਕਰੀਬ 90 ਕਿਲੋ ਹੈਰੋਇਨ ਬਰਾਮਦ ਹੋਈ। ਬਾਜ਼ਾਰ 'ਚ ਇਸ ਦੀ ਕੀਮਤ ਕਰੀਬ 450 ਕਰੋੜ ਰੁਪਏ ਹੈ।
PHOTO
ਡੀਜੀਪੀ ਭਾਟੀਆ ਨੇ ਦੱਸਿਆ ਕਿ ਡਰੱਗ ਮਾਫੀਆ ਨੇ ਜਾਂਚ ਅਧਿਕਾਰੀਆਂ ਨੂੰ ਚਕਮਾ ਦੇਣ ਲਈ ਅਨੋਖਾ ਤਰੀਕਾ ਅਪਣਾਇਆ ਹੈ। ਉਹਨਾਂ ਨੇ ਇਨ੍ਹਾਂ ਧਾਗਿਆਂ ਨੂੰ ਹੈਰੋਇਨ ਵਾਲੇ ਘੋਲ ਵਿਚ ਭਿਓ ਕੇ ਫਿਰ ਸੁਕਾ ਲਿਆ ਅਤੇ ਫਿਰ ਪੈਕ ਕਰ ਲਿਆ। ਹਾਲ ਹੀ ਵਿੱਚ ਗੁਜਰਾਤ ਵਿੱਚ ਹਜ਼ਾਰਾਂ ਕਿਲੋ ਨਸ਼ਾ ਫੜਿਆ ਗਿਆ ਹੈ। ਇਸ 'ਤੇ ਸਿਆਸਤ ਵੀ ਤੇਜ਼ ਹੋ ਗਈ ਹੈ। ਪੀਪਾਵਾਵ ਬੰਦਰਗਾਹ 'ਤੇ ਫੜੇ ਗਏ ਨਸ਼ਿਆਂ ਦੇ ਮਾਮਲੇ 'ਚ ਕਾਂਗਰਸ ਨੇ ਸਵਾਲ ਉਠਾਇਆ ਹੈ ਕਿ ਗੁਜਰਾਤ ਨਸ਼ਿਆਂ ਦਾ ਕੇਂਦਰ ਕਿਉਂ ਬਣ ਰਿਹਾ ਹੈ?
