ਵਾਅਦੇ ਮੁਤਾਬਕ ਬਹਾਲ ਨਹੀਂ ਹੋਈਆਂ ਸੇਵਾਵਾਂ
ਸ੍ਰੀਨਗਰ : ਜੰਮੂ ਕਸ਼ਮੀਰ 'ਚੋਂ ਧਾਰਾ 370 ਹਟਾਉਣ ਬਾਅਦ ਇੰਟਰਨੈੱਟ ਸੇਵਾਵਾਂ ਬੰਦ ਕਰ ਦਿਤੀਆਂ ਗਈਆਂ ਸਨ। ਹੁਣ ਵਾਦੀ 'ਚ ਸ਼ਾਂਤੀ ਪਰਤਣ ਬਾਅਦ ਸਰਕਾਰ ਵਲੋਂ ਇੰਟਰਨੈਂਟ ਸੇਵਾਵਾਂ ਮੁੜ ਬਹਾਲ ਕਰਨ ਦਾ ਵਾਅਦਾ ਕੀਤਾ ਸੀ। ਵਾਅਦੇ ਮੁਤਾਬਕ ਨਵੇਂ ਸਾਲ ਮੌਕੇ ਇੰਟਰਨੈਂਟ ਸੇਵਾਵਾਂ ਚਾਲੂ ਹੋਣ ਦੀ ਉਮੀਦ ਸੀ ਪਰ ਵਾਅਦੇ ਦੇ ਬਾਵਜੂਦ ਵੀ ਬੁੱਧਵਾਰ ਨੂੰ ਘਾਟੀ ਦੇ ਹਸਪਤਾਲਾਂ ਅੰਦਰ ਬ੍ਰਾਡਬੈਂਡ ਇੰਟਰਨੈੱਟ ਸੇਵਾਵਾਂ ਅਜੇ ਤਕ ਬਹਾਲ ਨਹੀਂ ਹੋ ਸਕੀਆਂ।
Photo
ਦੱਸ ਦਈਏ ਕਿ ਬੀਤੇ ਮੰਗਲਵਾਰ ਨੂੰ ਸਰਕਾਰੀ ਦੇ ਬੁਲਾਰੇ ਰੋਹਿਤ ਕਾਂਸਲ ਨੇ ਹਸਪਤਾਲਾਂ ਅੰਦਰ ਬ੍ਰਾਡਬੈਂਡ ਸੇਵਾ ਅਤੇ ਪੋਸਟਪੇਡ ਮੋਬਾਈਲ ਫੋਨਾਂ 'ਤੇ ਐਸਐਮਐਸ ਸੇਵਾ ਅੱਧੀ ਰਾਤ ਤੋਂ ਮੁੜ ਬਹਾਲ ਕਰਨ ਦਾ ਐਲਾਨ ਕੀਤਾ ਸੀ। ਵਾਅਦੇ ਮੁਤਾਬਕ ਐਸਐਮਐਸ ਸੇਵਾ ਤਾਂ ਕੁੱਝ ਹਦ ਤਕ ਬਹਾਲ ਹੋ ਗਈ ਹੈ ਪਰ ਇੰਟਰਨੈਂਟ ਅਜੇ ਤਕ ਦੁਬਾਰਾ ਸ਼ੁਰੂ ਨਹੀਂ ਹੋਈਆਂ। ਕਾਬਲੇਗੌਰ ਹੈ ਕਿ ਘਾਟੀ ਦੇ ਪ੍ਰਮੁੱਖ ਸਰਕਾਰੀ ਐਸਐਮਐਚਐਸ ਹਸਪਤਾਲ ਵਿਚ ਤਕਰੀਬਨ ਪੰਜ ਮਹੀਨਿਆਂ ਤੋਂ ਇੰਟਰਨੈਟ ਦੀ ਸਹੂਲਤ ਨਹੀਂ ਹੈ।
Photo
ਐਸਐਮਐਚਐਸ ਹਸਪਤਾਲ ਪ੍ਰਸ਼ਾਸਨ ਦੇ ਅਧਿਕਾਰੀ ਦਾ ਕਹਿਣਾ ਹੈ ਕਿ ਮੈਡੀਕਲ ਸੰਸਥਾ ਵਿਚ ਬੁੱਧਵਾਰ ਨੂੰ ਇੰਟਰਨੈਟ ਸੇਵਾ ਮੁੜ ਬਹਾਲ ਨਹੀਂ ਕੀਤੀ ਗਈ। ਉਨ੍ਹਾਂ ਕਿਹਾ ਕਿ ਇੰਟਰਨੈੱਟ ਕੰਮ ਨਹੀਂ ਕਰ ਰਿਹਾ ਹੈ। ਸੇਵਾਵਾਂ ਹਾਲੇ ਬਹਾਲ ਨਹੀਂ ਕੀਤੀਆਂ ਗਈਆਂ ਹਨ।
Photo
ਘਾਟੀ ਵਿਚਲੇ ਬੱਚਿਆਂ ਦੇ ਇਕਲੌਤੇ ਜੀਬੀ ਪੰਤ ਹਸਪਤਾਲ ਵਿਚ ਵੀ ਸੇਵਾਵਾਂ ਬਹਾਲ ਨਹੀ ਹੋ ਸਕੀਆਂ। ਹਸਪਤਾਲ ਦੇ ਮੈਡੀਕਲ ਸੁਪਰਡੈਂਟ ਕੰਵਲਜੀਤ ਸਿੰਘ ਨੇ ਕਿਹਾ ਕਿ ਇੰਟਰਨੈੱਟ ਹਾਲੇ ਕੰਮ ਨਹੀਂ ਕਰ ਰਿਹਾ। ਉਨ੍ਹਾਂ ਕਿਹਾ ਕਿ ਅੱਜ ਸੇਵਾਵਾਂ ਬਹਾਲ ਹੋਣ ਦੀ ਉਮੀਦ ਸੀ ਜੋ ਨਹੀਂ ਹੋਈਆਂ।
Photo
ਰੈਨਵਾਰੀ ਦੇ ਜਵਾਹਰ ਲਾਲ ਨਹਿਰੂ ਹਸਪਤਾਲ ਦੇ ਇਕ ਅਧਿਕਾਰੀ ਨੇ ਵੀ ਕਿਹਾ ਕਿ ਹਸਪਤਾਲ ਵਿਚ ਇੰਟਰਨੈਟ ਸੇਵਾ ਮੁੜ ਬਹਾਲ ਨਹੀਂ ਹੋਈ ਹੈ। ਸ਼ਹਿਰ ਦੇ ਡਲਗੇਟ ਇਲਾਕੇ ਵਿਚ ਛਾਤੀ ਰੋਗ ਹਸਪਤਾਲ ਦੀ ਵੀ ਇਹੋ ਸਥਿਤੀ ਹੈ।
