ਜਦੋਂ ਤੁਸੀਂ ਵਿਆਹ ਜਾਂ ਵਿਆਹ ਦੇ ਫੋਟੋਸ਼ੂਟ ਬਾਰੇ ਸੋਚਦੇ ਹੋ ਤਾਂ ਤੁਹਾਡੇ ਦਿਮਾਗ ਵਿਚ ਪਹਿਲਾ ਸਵਾਲ ਇਹ ਹੀ ਆਉਂਦਾ ਹੈ ਕਿ ਮੌਸਮ ਗਰਮ ਹੋਵੇ। ਕਹਿਣ ਦਾ ਭਾਵ ਹੈ ਬਰਫਬਾਰੀ ਨਾ ਹੋਵੇ ਪਰ ਕੈਨੇਡਾ ਦੇ ਸੂਬੇ ਨਿਊਫਾਊਡਲੈਂਡ 'ਚ ਜੋੜਿਆਂ 'ਚ ਕੁਝ ਵੱਖਰਾ ਹੀ ਦੇਖਣ ਨੂੰ ਮਿਲਿਆ, ਜਿੱਥੇ ਬਹੁਤ ਜ਼ਿਆਦਾ ਠੰਡ ਪੈ ਰਹੀ ਹੈ ਅਤੇ ਬਰਫਬਾਰੀ ਹੋ ਰਹੀ ਹੈ। ਅਲੈਕ ਸਟੈਡ ਜੋ ਕਿ ਵਿਆਹ ਵਾਲੇ ਜੋੜਿਆਂ ਦਾ ਫੋਟੋਸ਼ੂਟ ਕਰਦੀ ਹੈ, ਉਸ ਨੇ ਨਿਊਫਾਊਡਲੈਂਡ ਦੇ ਸ਼ਹਿਰ ਸੈਂਟ ਜੌਨਸ 'ਚ ਜੋੜਿਆਂ ਦੇ ਵਿਆਹ ਦੇ ਫੋਟੋਸ਼ੂਟ ਕੀਤੇ। 

ਅਲੈਕ ਦੇ ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਬਹੁਤ ਸਾਰੇ ਫਾਲੋਅਰਜ਼ ਹਨ। ਉਸ ਨੇ ਦੱਸਿਆ ਕਿ ਹਾਲ ਦੇ ਸਾਲਾਂ 'ਚ ਸਰਦੀਆਂ ਦੇ ਵਿਆਹ ਦੀ ਤਲਾਸ਼ ਕਰ ਰਹੇ ਜੋੜਿਆਂ ਦੀ ਗਿਣਤੀ 'ਚ ਵਾਧਾ ਦੇਖਿਆ ਗਿਆ। ਅਲੈਕ ਦਾ ਕਹਿਣਾ ਹੈ ਕਿ ਲੋਕ ਠੰਡ ਵਿਚ ਵਿਆਹਾਂ ਦੇ ਫੋਟੋਸ਼ੂਟ ਕਰਾਉਣਾ ਪਸੰਦ ਕਰਦੇ ਹਨ। ਕ੍ਰਿਸਮਸ ਅਤੇ ਨਵੇਂ ਸਾਲ ਤੋਂ ਪਹਿਲਾਂ ਲੋਕ ਦੂਜੀਆਂ ਥਾਵਾਂ 'ਤੇ ਜਾ ਕੇ ਘੁੰਮਣਾ ਵੀ ਪਸੰਦ ਕਰਦੇ ਹਨ। 

ਵਿਆਹ ਦਾ ਫੋਟੋਸ਼ੂਟ ਕਰਾਉਣ ਆਈਆਂ ਲਾੜੀਆਂ 'ਚੋਂ ਇਕ ਲਾੜੀ ਹਿਲੇਰੀ ਬਟਲਰ ਨੇ ਕਿਹਾ ਕਿ ਵਿਆਹ ਲਈ ਕ੍ਰਿਸਮਸ ਸੀਜ਼ਨ ਮੇਰੇ ਲਈ ਬਹੁਤ ਖਾਸ ਸਮਾਂ ਸੀ, ਜਦੋਂ ਬਹੁਤ ਸਾਰੇ ਲੋਕ ਘਰਾਂ ਤੋਂ ਬਾਹਰ ਛੁੱਟੀਆਂ ਮਨਾਉਣ ਜਾਂਦੇ ਹਨ। ਮੈਂ ਸੋਚਿਆ ਕਿ ਇਹ ਮੇਰੇ ਲਈ ਸੱਚ-ਮੁੱਚ ਫੋਟੋਸ਼ੂਟ ਦਾ ਸਮਾਂ ਹੈ। ਉਸ ਨੇ ਕਿਹਾ ਕਿ ਇਹ ਇਕ ਚਮਤਕਾਰ ਵਾਂਗ ਸੀ, ਜਿਸ ਦਿਨ ਅਸੀਂ ਵਿਆਹ ਕਰਵਾਇਆ, ਉਸ ਸਮੇਂ ਬਰਫ ਡਿੱਗ ਰਹੀ ਸੀ। ਬਰਫ ਦਾ ਡਿੱਗਣਾ ਬਹੁਤ ਹੀ ਖੂਸਬੂਰਤ ਸੀ। 

ਕੁਝ ਹੋਰ ਜੋੜਿਆਂ ਨੇ ਵੀ ਆਪਣੇ ਵਿਆਹ ਦਾ ਫੋਟੋਸ਼ੂਟ ਕਰਵਾਇਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇੰਨੀ ਠੰਡ ਵਿਚ ਵਿਆਹ ਕਰਾਉਣਾ ਕਿਸੇ ਚੁਣੌਤੀ ਤੋਂ ਘੱਟ ਨਹੀਂ ਸੀ। ਇੱਥੇ ਦੱਸ ਦੇਈਏ ਕਿ ਨਿਊਫਾਊਡਲੈਂਡ ਅਤੇ ਲੈਬਰਾਡੋਰ 'ਚ ਤਾਪਮਾਨ ਇਸ ਸਮੇਂ -4 ਡਿਗਰੀ ਸੈਲਸੀਅਸ ਹੈ। ਇੰਨੀ ਠੰਡ ਅਤੇ ਬਰਫਬਾਰੀ ਦਰਮਿਆਨ ਵੀ ਲਾੜੀਆਂ ਖੁਸ਼ ਨਜ਼ਰ ਆ ਰਹੀਆਂ ਹਨ।