ਲਾਸ ਏਂਜਲਸ, 10 ਜਨਵਰੀ : ਅਮਰੀਕਾ ਦੇ ਦਖਣੀ ਕੈਲੇਫ਼ੋਰਨੀਆ 'ਚ ਭਿਆਨਕ ਤੂਫ਼ਾਨ ਤੋਂ ਬਾਅਦ ਜ਼ਮੀਨ ਖਿਸਕਣ ਦੀ ਘਟਨਾ ਵਿਚ ਕਈ ਮਕਾਨ ਤਬਾਹ ਹੋ ਗਏ ਅਤੇ ਘੱਟੋ-ਘੱਟ 13 ਲੋਕਾਂ ਦੀ ਮੌਤ ਹੋ ਗਈ। ਇਸ ਤੋਂ ਇਲਾਵਾ 20 ਲੋਕ ਜ਼ਖ਼ਮੀ ਹੋ ਗਏ ਹਨ, ਜਿਨ੍ਹਾਂ 'ਚ ਚਾਰ ਦੀ ਹਾਲਤ ਗੰਭੀਰ ਹੈ। ਉਧਰ ਸਾਂਤਾ ਬਾਰਬਰਾ ਕਾਉਂਟੀ ਦੇ ਰੋਮੇਰੋ ਕੈਨੀਅਨ ਇਲਾਕੇ 'ਚ 300 ਲੋਕਾਂ ਦੇ ਫਸੇ ਹੋਣ ਦੀ ਸੰਭਾਵਨਾ ਹੈ। ਇਨ੍ਹਾਂ ਬਾਰੇ ਫਿਲਹਾਲ ਕੋਈ ਜਾਣਕਾਰੀ ਨਹੀਂ ਮਿਲੀ ਹੈ। ਸਥਾਨਕ ਮੀਡੀਆ ਅਨੁਸਾਰ ਮ੍ਰਿਤਕਾਂ ਦੀ ਗਿਣਤੀ ਵੱਧ ਸਕਦੀ ਹੈ।ਅਧਿਕਾਰੀਆਂ ਨੇ ਦਸਿਆ ਕਿ ਉੱਤਰ-ਪੱਛਮ ਲਾਸ ਏਂਜਲਸ ਦੇ ਮੋਂਟੇਸਿਟੋ ਸ਼ਹਿਰ 'ਚ ਬਚਾਅ ਕਾਰਜ ਦੌਰਾਨ ਮਿੱਟੀ ਅਤੇ ਮਲਬੇ 'ਚੋਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ। ਸੈਂਟਾ ਬਾਰਬਰਾ ਕਾਉਂਟੀ ਦੇ ਸ਼ੈਰਿਫ ਬਿਲ ਬ੍ਰਾਉਨ ਨੇ ਇਕ ਪੱਤਰਕਾਰ ਸੰਮੇਲਨ 'ਚ ਕਿਹਾ, ''ਸਾਨੂੰ ਇਹ ਦਸਦਿਆਂ ਦੁੱਖ ਹੋ ਰਿਹਾ ਹੈ ਕਿ ਘਟਨਾ 'ਚ ਹਾਲੇ ਤਕ 13 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋ ਚੁਕੀ ਹੈ। ਤੂਫ਼ਾਨ ਕਾਰਨ ਬੀਤੀ ਰਾਤ ਸਾਡੇ ਇਲਾਕੇ 'ਚ ਇਹ ਘਟਨਾ ਵਾਪਰੀ।''

ਬੀ.ਬੀ.ਸੀ. ਦੀ ਰੀਪੋਰਟ ਮੁਤਾਬਕ ਕੈਲੇਫ਼ੋਰਨੀਆ ਦੇ ਜੰਗਲਾਂ 'ਚ ਪਿਛਲੇ ਮਹੀਨੇ ਲੱਗੀ ਅੱਗ ਮਗਰੋਂ ਇਸ ਮੀਂਹ ਕਾਰਨ ਲਗਭਗ 9 ਇੰਚ ਤਕ ਚਿੱਕੜ ਫੈਲ ਗਿਆ। ਇਲਾਕੇ 'ਚ 48 ਕਿਲੋਮੀਟਰ ਦੇ ਸੜਕੀ ਰਸਤੇ ਨੂੰ ਬੰਦ ਕਰਨਾ ਪਿਆ ਹੈ। ਕੈਲੇਫ਼ੋਰਨੀਆ, ਸਾਂਤਾ ਬਾਰਬਰਾ ਤੋਂ ਇਲਾਵਾ ਆਸਪਾਸ ਦੇ ਇਲਾਕਿਆਂ 'ਚੋਂ ਹਜ਼ਾਰਾਂ ਫਸੇ ਹੋਏ ਲੋਕਾਂ ਨੂੰ ਬਚਾਇਆ ਗਿਆ ਹੈ। ਸਥਾਨਕ ਪ੍ਰਸ਼ਾਸਨ ਨੇ ਲਗਭਗ 30 ਹਜ਼ਾਰ ਲੋਕਾਂ ਨੂੰ ਅਪਣੇ ਘਰ ਛੱਡ ਕੇ ਸੁਰੱਖਿਅਤ ਥਾਵਾਂ 'ਤੇ ਜਾਣ ਲਈ ਕਿਹਾ ਹੈ। (ਪੀਟੀਆਈ)