ਨਸ਼ੇ ਦੀ ਬੁਰੀ ਆਦਤ ਕਾਰਨ ਖਲੀਲ ਨਾਂ ਦਾ ਵਿਅਕਤੀ ਆਪਣਾ ਘਰ ਗੁਆ ਬੈਠਾ ਸੀ ਪਰ ਅੱਜ ਉਹ ਕਰੋੜਾਂ ਦਾ ਮਾਲਕ ਹੈ। ਖਲੀਲ ਨੇ ਦੱਸਿਆ ਕਿ ਨਸ਼ਿਆਂ ਕਾਰਨ ਉਹ ਆਪਣਾ ਸਭ ਕੁੱਝ ਗੁਆ ਬੈਠਾ ਸੀ। ਇੱਥੋਂ ਤਕ ਕਿ ਉਸ ਕੋਲ ਰਹਿਣ ਲਈ ਘਰ ਵੀ ਨਹੀਂ ਸੀ ਤੇ ਉਹ ਸੜਕਾਂ 'ਤੇ ਆ ਗਿਆ ਸੀ।
ਖਲੀਲ 1990 'ਚ ਐਕਟਿੰਗ ਦਾ ਕਰੀਅਰ ਬਣਾਉਣ ਲਈ ਲਾਸ ਏਂਜਲਸ ਆਇਆ ਸੀ ਪਰ ਉਹ ਇਸ 'ਚ ਕਾਮਯਾਬ ਨਾ ਹੋ ਸਕਿਆ। ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਉਸ ਨੇ ਕਾਰਾਂ ਵੇਚਣ ਦਾ ਕੰਮ ਸ਼ੁਰੂ ਕੀਤਾ ਪਰ ਡਰਗਜ਼ ਦੀ ਆਦਤ ਲੱਗ ਜਾਣ ਕਾਰਨ ਉਸ ਦਾ ਕੰਮ ਖਰਾਬ ਹੋ ਗਿਆ। ਨਸ਼ੇ ਦੀ ਓਵਰਡੋਜ਼ ਕਾਰਨ ਉਹ ਜੇਲ 'ਚ ਵੀ ਗਿਆ। ਉਹ ਆਪਣੀ ਜ਼ਿੰਦਗੀ ਤੋਂ ਨਿਰਾਸ਼ ਹੋ ਗਿਆ ਸੀ।
ਉਸ ਦੇ ਇਕ ਦੋਸਤ ਨੇ ਉਸ ਨੂੰ ਨਸ਼ਿਆਂ ਦੀ ਦਲਦਲ 'ਚੋਂ ਕੱਢਣ ਲਈ ਉਸ ਦੀ ਮਦਦ ਕੀਤੀ ਅਤੇ ਉਸ ਨੂੰ ਜੂਸ ਅਤੇ ਸੁਪਰਫੂਡ ਦੀ ਨੌਕਰੀ ਦਿਵਾ ਦਿੱਤੀ। ਉੱਥੇ ਉਸ ਨੇ ਸਮੂਦੀ ਬਣਾਉਣੀ ਸਿੱਖੀ ਤੇ ਇਸੇ ਕੰਮ 'ਚ ਮਸ਼ਹੂਰ ਹੋ ਗਿਆ ਅਤੇ ਉਸ ਨੇ ਸਮੂਦੀ ਬਣਾਉਣ ਦਾ ਆਪਣਾ ਕਾਰੋਬਾਰ ਸ਼ੁਰੂ ਕੀਤਾ। ਉਹ ਆਪਣੀ ਪ੍ਰੇਮਿਕਾ ਨਾਲ ਰਹਿਣ ਲੱਗਾ ਤੇ ਉਸ ਨੇ ਜੂਏ 'ਚ ਪੈਸੇ ਜਿੱਤੇ।
32 ਲੱਖ ਰੁਪਏ ਨਾਲ ਉਸ ਨੇ ਆਪਣੀ ਪ੍ਰੇਮਿਕਾ ਨਾਲ ਜੂਸ ਬਾਰ ਖੋਲ੍ਹਿਆ। ਹੌਲੀ-ਹੌਲੀ ਉਹ ਇੰਨਾ ਕਾਮਯਾਬ ਹੋ ਗਿਆ ਕਿ ਇਸ ਦੀਆਂ 6 ਸ਼ਾਖਾਵਾਂ ਖੋਲ੍ਹੀਆਂ। ਹੁਣ ਉਸ ਨੇ ਇਕ ਕਿਤਾਬ ਲਿਖੀ 'ਆਈ ਫੁਰਗੈਟ ਟੂ ਡਾਈ' ਜਿਸ 'ਚ ਉਸ ਨੇ ਲਿਖਿਆ ਕਿ ਉਹ ਕਿਵੇਂ ਫਰਸ਼ ਤੋਂ ਅਰਸ਼ ਤਕ ਪੁੱਜਾ। ਲੋਕ ਉਸ ਦੀ ਜ਼ਿੰਦਗੀ ਤੋਂ ਬਹੁਤ ਪ੍ਰਭਾਵਿਤ ਹਨ।
