ਪਲੇਮਬਾਂਗ, 5 ਜਨਵਰੀ: ਇੰਡੋਨੇਸ਼ੀਆ ਦੇ ਸੁਮਾਤਰਾ ਟਾਪੂ 'ਤੇ ਯਾਤਰੀਆਂ ਨਾਲ ਭਰੀ ਇਕ ਕਿਸ਼ਤੀ ਦੇ ਡੁੱਬ ਜਾਣ ਨਾਲ ਘੱਟ ਤੋਂ ਘੱਟ 13 ਲੋਕਾਂ ਦੀ ਮੌਤ ਹੋ ਗਈ। ਇਸ ਘਟਨਾ ਤੋਂ ਦੋ ਦਿਨ ਪਹਿਲਾਂ ਵੀ 9 ਲੋਕਾਂ ਦੀ ਇਸੇ ਤਰ੍ਹਾਂ ਦੇ ਹਾਦਸੇ ਵਿਚ ਮੌਤ ਹਈ ਸੀ।ਦਖਣੀ ਸੁਮਾਤਰਾ ਦੇ ਕੋਸਟ ਗਾਰਡ ਦੇ ਰਾਬਿੰਸਨ ਸਿਰੇਗਰ ਨੇ ਦਸਿਆ ਕਿ ਬੁਧਵਾਰ ਨੂੰ ਖ਼ਰਾਬ ਮੌਸਮ ਵਿਚਕਾਰ ਮੂਸੀ ਨਦੀ ਵਿਚ 55 ਲੋਕਾਂ ਨੂੰ ਲਿਜਾ ਰਹੀ ਇਕ ਕਿਸ਼ਤੀ ਤੇਜ਼ ਲਹਿਰਾਂ ਦੀ ਚਪੇਟ ਵਿਚ ਆ ਕੇ ਡੁੱਬ ਗਈ। ਉਨ੍ਹਾਂ ਦਸਿਆ ਕਿ ਪੁਲਿਸ ਕਿਸ਼ਤੀ
ਦੇ ਕਪਤਾਨ ਦੀ ਭਾਲ ਕਰ ਰਹੀ ਹੈ ਜਿਸ ਦੇ ਲਾਪਤਾ ਹੋਣ ਦੀ ਖ਼ਬਰ ਹੈ। ਸਿਰੇਗਰ ਨੇ ਦਸਿਆ ਕਿ ਕੈਪਟਨ ਦੇ ਸਹਾਇਕ ਨੂੰ ਹਿਰਾਸਤ ਵਿਚ ਲੈ ਕੇ ਪਤਾ ਲਾਇਆ ਜਾ ਰਿਹਾ ਹੈ ਕਿ ਕਿਸ਼ਤੀ ਸਮੁੰਦਰ ਵਿਚ ਚੱਲਣ ਲਾਇਕ ਸੀ ਜਾਂ ਨਹੀਂ ਤੇ ਕਿਤੇ ਚਾਲਕ ਦਲ ਵਲੋਂ ਇਸ ਵਿਚ ਲਾਪ੍ਰਵਾਹੀ ਤਾਂ ਨਹੀਂ ਵਰਤੀ ਗਈ। ਘਟਨਾ ਵਾਲੀ ਥਾਂ ਤੋਂ ਕੁੱਝ ਦੂਰੀ 'ਤੇ ਤੱਟ ਤੋਂ ਲਾਸ਼ਾਂ ਬਰਾਮਦ ਹੋਈਆਂ ਹਨ। ਇਸ ਤੋਂ ਪਹਿਲਾਂ ਨਵੇਂ ਸਾਲ ਵਾਲੇ ਦਿਨ ਬੇਰਨੇਉ ਟਾਪੂ 'ਤੇ ਇਕ ਕਿਸ਼ਤੀ ਡੁੱਬ ਜਾਣ ਨਾਲ 9 ਲੋਕਾਂ ਦੀ ਮੌਤ ਹੋ ਗਈ ਸੀ। (ਪੀ.ਟੀ.ਆਈ)
