ਨਵੀਂ ਦਿੱਲੀ, 9 ਨਵੰਬਰ: ਸਰਕਾਰ ਨੇ ਕਿਸਾਨਾਂ ਨੂੰ ਵੱਡੀ ਰਾਹਤ ਦਿੰਦਿਆਂ ਕਣਕ ਦੀ ਸਸਤੀ ਆਯਾਤ ਨੂੰ ਰੋਕਣ ਲਈ ਇਸ ਦੀ ਆਯਾਤ ਡਿਊਟੀ ਦੁਗਣੀ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਦਰਅਸਲ, ਸਰਕਾਰ ਚਾਲੂ ਰਬੀ ਸੈਸ਼ਨ 'ਚ ਕਿਸਾਨਾਂ ਨੂੰ ਮੁੱਲ ਦੇ ਮਾਮਲੇ 'ਚ ਸਾਕਰਾਤਮਕ ਸੰਕੇਤ ਦੇਣਾ ਚਾਹੁੰਦੀ ਹੈ। ਇਸ ਲਈ ਆਯਾਤ ਡਿਊਟੀ ਦੁਗਣੀ ਕਰ ਕੇ 20 ਫ਼ੀ ਸਦੀ ਕਰ ਦਿਤੀ ਗਈ ਹੈ।
ਕੈਨੇਡਾ ਵਰਗੇ ਦੇਸ਼ ਤੋਂ ਸਸਤੇ ਆਯਾਤ 'ਤੇ ਰੋਕ ਲਗਾਉਣ ਲਈ ਮਟਰ 'ਤੇ 50 ਫ਼ੀ ਸਦੀ ਆਯਾਤ ਡਿਊਟੀ ਲਗਾਈ ਹੈ। ਕੇਂਦਰੀ ਉਤਪਾਦ ਅਤੇ ਕਸਟਮ ਡਿਊਟੀ ਬੋਰਡ (ਸੀ.ਬੀ.ਈ.ਸੀ.) ਨੇ ਇਕ ਸੂਚਨਾ ਜਾਰੀ ਕਰ ਕੇ ਮਟਰ 'ਤੇ ਕਸਟਮ ਡਿਊਟੀ ਨੂੰ ਜ਼ੀਰੋ ਤੋਂ ਵਧਾ ਕੇ 50 ਫ਼ੀ ਸਦੀ ਕਰਨ ਅਤੇ ਕਣਕ ਦੀ ਆਯਾਤ ਡਿਊਟੀ ਨੂੰ 10 ਫ਼ੀ ਸਦੀ ਤੋਂ ਵਧਾ ਕੇ 20 ਫ਼ੀ ਸਦੀ ਕਰਨ ਦੀ ਸਿਫ਼ਾਰਿਸ਼ ਕੀਤੀ ਹੈ।
ਫ਼ਸਲ ਸਾਲ 2016-17 (ਜੁਲਾਈ ਤੋਂ ਜੂਨ) 'ਚ ਨੌਂ ਕਰੋੜ 83.8 ਲੱਖ ਟਨ ਦੇ ਭਾਰੀ ਉਤਪਾਦ ਦੇ ਮੱਦੇਨਜ਼ਰ ਸਥਾਨਕ ਕੀਮਤਾਂ 'ਚ ਭਾਰੀ ਗਿਰਾਵਟ ਰੋਕਣ ਲਈ ਮਾਰਚ 'ਚ ਸਰਕਾਰ ਨੇ ਕਣਕ 'ਤੇ 10 ਫ਼ੀ ਸਦੀ ਦੀ ਆਯਾਤ ਡਿਊਟੀ ਲਗਾਈ ਸੀ। ਹੁਣ ਜਦੋਂ ਕਿਸਾਨਾਂ ਨੇ ਰਬੀ ਕਣਕ ਦੀ ਬੀਜਾਈ ਸ਼ੁਰੂ ਕੀਤੀ ਹੈ ਤਾਂ ਸਰਕਾਰ ਨੇ ਕਿਸਾਨਾਂ ਨੂੰ ਜ਼ਿਆਦਾ ਰਕਬੇ 'ਚ ਕਣਕ ਦੀ ਪੈਦਾਵਾਰ ਕਰਨ ਲਈ ਪ੍ਰੇਰਿਤ ਕਰਨ ਦੇ ਮਕਸਦ ਨਾਲ ਚੰਗਾ ਸੰਕੇਤ ਦੇਣਾ ਚਾਹੁੰਦੀ ਹੈ। (ਏਜੰਸੀ)
