ਮਹਿੰਗਾਈ ਨੂੰ ਕਾਬੂ ਕਰਨ ਲਈ ਸਰਕਾਰ ਨੇ ਚੁੱਕਿਆ ਵੱਡਾ ਕਦਮ
ਨਵੀਂ ਦਿੱਲੀ : ਸਰਕਾਰ ਨੇ ਖੰਡ ਦੀ ਬਰਾਮਦ 'ਤੇ ਪਾਬੰਦੀ ਅਕਤੂਬਰ 2023 ਤੱਕ ਵਧਾ ਦਿੱਤੀ ਹੈ। ਘਰੇਲੂ ਬਾਜ਼ਾਰ ਵਿੱਚ ਇਸ ਦੀ ਵਧਦੀ ਕੀਮਤ ਦੇ ਮੱਦੇਨਜ਼ਰ ਖੰਡ ਦੇ ਨਿਰਯਾਤ 'ਤੇ 1 ਜੂਨ 2022 ਤੋਂ 31 ਅਕਤੂਬਰ 2022 ਤੱਕ ਪਾਬੰਦੀ ਲਗਾਈ ਗਈ ਸੀ। ਕੀਮਤਾਂ ਵਿੱਚ ਇਹ ਵਾਧਾ ਖੰਡ ਦੀ ਰਿਕਾਰਡ ਬਰਾਮਦ ਤੋਂ ਬਾਅਦ ਹੋਇਆ ਹੈ। ਦੱਸ ਦੇਈਏ ਕਿ ਭਾਰਤ ਖੰਡ ਦਾ ਵਿਸ਼ਵ ਦਾ ਸਭ ਤੋਂ ਵੱਡਾ ਉਤਪਾਦਕ ਅਤੇ ਬ੍ਰਾਜ਼ੀਲ ਤੋਂ ਬਾਅਦ ਦੂਜਾ ਸਭ ਤੋਂ ਵੱਡਾ ਨਿਰਯਾਤਕਾਰ ਹੈ। ਬੰਗਲਾਦੇਸ਼, ਇੰਡੋਨੇਸ਼ੀਆ, ਮਲੇਸ਼ੀਆ ਅਤੇ ਦੁਬਈ ਭਾਰਤੀ ਖੰਡ ਦੇ ਸਭ ਤੋਂ ਵੱਡੇ ਖਰੀਦਦਾਰ ਹਨ।
ਪਿਛਲੇ ਸਾਲ ਦੇਸ਼ ਨੇ ਵੱਡੀ ਮਾਤਰਾ ਵਿੱਚ ਖੰਡ ਦਾ ਨਿਰਯਾਤ ਕੀਤਾ ਸੀ। ਪਿਛਲੇ ਸਾਲ 60 ਲੱਖ ਮੀਟਰਕ ਟਨ ਤੱਕ ਖੰਡ ਬਰਾਮਦ ਕਰਨ ਦਾ ਟੀਚਾ ਰੱਖਿਆ ਗਿਆ ਸੀ, ਪਰ ਅਸਲ ਵਿੱਚ 70 ਲੱਖ ਮੀਟਰਕ ਟਨ ਖੰਡ ਨਿਰਯਾਤ ਕੀਤੀ ਗਈ। ਇਸੇ ਤਰ੍ਹਾਂ ਇਸ ਸਾਲ ਵੀ ਸ਼ੂਗਰ ਮਿੱਲ ਤੋਂ 82 ਲੱਖ ਮੀਟਰਕ ਟਨ ਖੰਡ ਬਰਾਮਦ ਕੀਤੀ ਗਈ। ਇਸ ਸਾਲ ਖੰਡ ਦੀ ਬਰਾਮਦ ਹੁਣ ਤੱਕ ਦੀ ਸਭ ਤੋਂ ਵੱਧ ਮੰਨੀ ਜਾ ਰਹੀ ਹੈ।
ਭਾਰਤ ਦੇ ਖੰਡ ਦੇ ਨਿਰਯਾਤ ਨੂੰ ਸੀਮਤ ਕਰਨ ਦੀ ਸਰਕਾਰ ਦੀ ਯੋਜਨਾ ਬਹੁਤ ਸਾਵਧਾਨੀ ਵਾਲੀ ਜਾਪਦੀ ਹੈ। ਅਜਿਹਾ ਇਸ ਲਈ ਹੈ ਕਿਉਂਕਿ ਖੰਡ ਦੀ ਘਰੇਲੂ ਸਪਲਾਈ ਭਰਪੂਰ ਹੈ। ਇੰਡੀਅਨ ਸ਼ੂਗਰ ਮਿੱਲ ਐਸੋਸੀਏਸ਼ਨ ਦੇ ਅਨੁਸਾਰ, ਭਾਰਤ ਵਿੱਚ ਇਸ ਸੀਜ਼ਨ ਵਿੱਚ 35 ਮਿਲੀਅਨ ਟਨ ਉਤਪਾਦਨ ਅਤੇ 27 ਮਿਲੀਅਨ ਟਨ ਦੀ ਖਪਤ ਹੋਣ ਦੀ ਉਮੀਦ ਹੈ। ਪਿਛਲੇ ਸੀਜ਼ਨ ਦੇ ਕਰੀਬ 8.2 ਮਿਲੀਅਨ ਟਨ ਦੇ ਭੰਡਾਰ ਸਮੇਤ 16 ਮਿਲੀਅਨ ਦਾ ਸਰਪਲੱਸ ਹੈ।
