ਵਾਸ਼ਿੰਗਟਨ, 27 ਦਸੰਬਰ : ਜਿਹੜੇ ਲੋਕ ਡਾਇਬੀਟੀਜ਼ ਕਾਰਨ ਰੋਜ਼ ਲੱਗਣ ਵਾਲੇ ਦਰਦਨਾਕ ਟੀਕੇ ਅਤੇ ਸੂਈ ਦੀ ਚੋਭ ਤੋਂ ਤੰਗ ਆ ਚੁੱਕੇ ਹਨ, ਉਨ੍ਹਾਂ ਲਈ ਹੁਣ ਚੰਗੀ ਖ਼ਬਰ ਹੈ। ਵਿਗਿਆਨੀਆਂ ਨੇ ਇਕ ਅਜਿਹਾ ਸਕਿਨ ਪੈਚ ਵਿਕਸਿਤ ਕੀਤਾ ਹੈ, ਜੋ ਦਵਾਈਆਂ ਜ਼ਰੀਏ ਕਈ ਦਿਨਾਂ ਤੱਕ ਡਾਇਬੀਟੀਜ਼ ਰੋਗੀਆਂ ਵਿਚ ਖ਼ੂਨ ਦੀ ਸ਼ੂਗਰ ਦੇ ਪੱਧਰ ਨੂੰ ਕੰਟਰੋਲ ਕਰ ਸਕਦਾ ਹੈ। ਟਾਈਪ ਦੋ ਡਾਇਬੀਟੀਜ਼ ਨਾਲ ਪੀੜਤ ਲੱਖਾਂ ਲੋਕਾਂ ਲਈ ਇਹ ਪੈਚ ਖੂਨ ਵਿਚ ਸ਼ੂਗਰ ਜਾਂ ਗਲੂਕੋਜ਼ ਦੇ ਪੱਧਰ ਨੂੰ ਕੰਟਰੋਲ ਕਰਦਾ ਹੈ।ਭੋਜਨ ਤੋਂ ਪਹਿਲਾਂ ਸੂਈ ਨਾਲ ਖੂਨ ਕੱਢਣਾ ਅਤੇ ਇਨਸੁਲਿਨ ਦਾ ਟੀਕਾ ਲਗਾਉਣਾ ਅਸੁਵਿਧਾਜਨਕ ਹੋ ਸਕਦਾ ਹੈ ਪਰ ਡਾਇਬੀਟੀਜ਼ ਰੋਗੀਆਂ ਲਈ ਇਸ ਤਰ੍ਹਾਂ ਰੋਜ਼ਾਨਾ ਕਰਨਾ ਜ਼ਰੂਰੀ ਹੁੰਦਾ ਹੈ। 

ਅਮਰੀਕਾ ਵਿਚ ਨੈਸ਼ਨਲ ਇੰਸਟੀਚਿਊਟ ਆਫ਼ ਬਾਇਓਮੈਡੀਕਲ ਇਮੇਜਿੰਗ ਐਂਡ ਬਾਇਓ ਇੰਜੀਨੀਅਰਿੰਗ (ਐਨ. ਆਈ. ਬੀ. ਆਈ. ਬੀ.) ਦੇ ਖੋਜ ਕਰਤਾਵਾਂ ਨੇ ਖਣਿਜ ਯੋਗਿਕਾਂ ਦਾ ਜੈਵ ਰਸਾਇਣਿਕ ਫਾਰਮੂਲਾ ਖੋਜਿਆ ਹੈ, ਜੋ ਸਰੀਰ ਵਿਚ ਦੌਰਾ ਕਰਨ ਵਾਲੇ ਖ਼ੂਨ ਵਿਚ ਮਿਲ ਕੇ ਕਈ ਦਿਨਾਂ ਤਕ ਖ਼ੂਨ ਵਿਚ ਸ਼ੂਗਰ ਦੇ ਪੱਧਰ ਨੂੰ ਕੰਟਰੋਲ ਕਰਦਾ ਹੈ। ਚੂਹਿਆਂ 'ਤੇ ਕੀਤੇ ਗਏ ਇਸ ਅਧਿਐਨ ਵਿਚ ਖੋਜ ਕਰਤਾਵਾਂ ਨੇ ਪਾਇਆ ਕਿ ਇਹ ਪੈਚ ਘੁਲਣਸ਼ੀਲ ਮਾਈਕ੍ਰੋ ਨੀਡਲਸ ਨਾਲ
ਬਣਿਆ ਹੈ, ਜੋ ਖ਼ੂਨ ਵਿਚ ਖ਼ੁਦ ਹੀ ਗਲੂਕੋਜ਼ ਦੇ ਪੱਧਰ ਨੂੰ ਕੰਟਰੋਲ ਕਰਦਾ ਹੈ। (ਭਾਸ਼ਾ)