ਉਹਨਾਂ ਨੇ ਦਸਿਆ ਕਿ ਉਹਨਾਂ ਨੇ ਖੇਤੀਬਾੜੀ ਦੀ ਸਿਖਲਾਈ ਲਈ ਹੋਈ...
ਚੰਡੀਗੜ੍ਹ: ਅੱਜ ਦਾ ਕਿਸਾਨ ਅਪਣੀਆਂ ਵੱਖ-ਵੱਖ ਫ਼ਸਲਾਂ ਨਾਲ ਮੁਨਾਫ਼ਾ ਲੈਣ ਵਿਚ ਜੁਟਿਆ ਹੋਇਆ ਹੈ ਪਰ ਉੱਥੇ ਹੀ ਇਕ ਅਜਿਹੇ ਕਿਸਾਨ ਵੀ ਹਨ ਜਿਹਨਾਂ ਨੇ ਡੇਅਰੀ, ਮੱਛੀ ਪਾਲਣ ਤੋਂ ਬਾਅਦ ਹੁਣ ਮੱਖੀਆਂ ਪਾਲਣ ਦਾ ਕੰਮ ਸ਼ੁਰੂ ਕੀਤਾ ਹੈ। ਗੁਰਚਰਨ ਸਿੰਘ ਮਾਨ ਜੋ ਕਿ ਬਹੁਤ ਹੀ ਤਜ਼ੁਰਬੇਕਾਰ ਵਿਅਕਤੀ ਹਨ ਤੇ ਉਹਨਾਂ ਨੇ ਮਾਨ ਮੱਖੀ ਫਾਰਮ ਖੋਲ੍ਹਿਆ ਹੋਇਆ ਹੈ।
Bee Keeping
ਉਹਨਾਂ ਨੇ ਦਸਿਆ ਕਿ ਉਹਨਾਂ ਨੇ ਖੇਤੀਬਾੜੀ ਦੀ ਸਿਖਲਾਈ ਲਈ ਹੋਈ ਹੈ ਤੇ ਉਹਨਾਂ ਨੇ ਸੋਚਿਆ ਕਿ ਉਹ ਆਪ ਕੋਈ ਕਿੱਤਾ ਕਰਨ। ਇਸ ਲਈ ਉਹਨਾਂ ਨੇ ਬੀਏ ਤੋਂ ਬਾਅਦ ਡੇਅਰੀ, ਮੱਛੀ ਪਾਲਣ ਤੇ ਹੁਣ ਮੱਖੀ ਪਾਲਣ ਦਾ ਕੰਮ ਸ਼ੁਰੂ ਕੀਤਾ ਹੋਇਆ ਹੈ। ਇਸ ਤੋਂ ਇਲਾਵਾ ਉਹਨਾਂ ਨੇ ਰੁੱਖ ਲਗਾਉਣ ਦਾ ਕੰਮ ਵੀ ਕੀਤਾ ਹੈ। ਇਹਨਾਂ ਸਾਰਿਆਂ ਵਿਚੋਂ ਉਹਨਾਂ ਨੂੰ ਰੁੱਖ ਲਗਾਉਣੇ ਤੇ ਮੱਖੀਆਂ ਪਾਲਣ ਦਾ ਕੰਮ ਮੁਨਾਫ਼ੇ ਵਾਲਾ ਲੱਗਿਆ।
Bee Keeping
ਮੱਖੀ ਪਾਲਣ ਦਾ ਕੰਮ ਘਾਟੇ ਦਾ ਸੌਦਾ ਨਹੀਂ ਹੈ ਕਿਉਂ ਕਿ ਇਸ ਵਾਸਤੇ ਕੋਈ ਖੁਰਾਕ ਨਹੀਂ, ਨਲਕਾ, ਛੈੱਡ, ਕੋਈ ਥਾਂ ਨਹੀਂ ਸਗੋਂ ਮੁਫ਼ਤ ਵਿਚ ਹੀ ਪਾਲੀਆਂ ਜਾ ਸਕਦੀਆਂ ਹਨ। ਮੱਖੀਆਂ ਦੀ ਹਰ ਚੀਜ਼ ਵਿਕਦੀ ਹੈ ਤੇ ਇਸ ਦਾ ਇਸਤੇਮਾਲ ਦਵਾਈਆਂ ਵਿਚ ਵੀ ਕੀਤਾ ਜਾਂਦਾ ਹੈ। ਇਸ ਕੰਮ ਵਿਚ ਗਿਆਨ ਹੋਣਾ ਲਾਜ਼ਮੀ ਹੈ। ਉਹਨਾਂ ਨੇ 46 ਮੈਂਬਰਾਂ ਨਾਲ ਮੱਖੀਆਂ ਦਾ ਐਗਰੀਮੈਂਟ ਕੀਤਾ ਹੈ ਕਿ ਜੇ ਉਹਨਾਂ ਨੂੰ ਫਾਇਦਾ ਹੁੰਦਾ ਹੈ ਤਾਂ ਉਹਨਾਂ ਦਾ ਤੇ ਜੇ ਘਾਟਾ ਪੈਂਦਾ ਹੈ ਤਾਂ ਮਾਨ ਮੱਖੀ ਪਾਲਣ ਦਾ।
Bee Keeping
ਜੇ ਕੋਈ ਜ਼ਮੀਨ ਠੇਕੇ ਤੇ ਲੈਂਦਾ ਹੈ ਤਾਂ ਉਹ 3 ਲੱਖ ਰੁਪਏ ਲਗਾਉਂਦਾ ਹੈ ਪਰ ਜੇ ਉਹ 3 ਲੱਖ ਦੀ ਮੱਖੀ ਲਵੇਗਾ ਤਾਂ ਅਗਲੇ ਸਾਲ ਤਕ 3 ਲੱਖ ਉਸ ਨੂੰ ਵਾਪਸ ਕਰੇਗੀ। ਵਿਗਿਆਨੀਆਂ ਦਾ ਵੀ ਕਹਿਣਾ ਹੈ ਕਿ ਉਹ ਕੰਮ ਕਰੋ ਜਿਸ ਕਿੱਤੇ ਵਿਚ ਸਭ ਕੁੱਝ ਵਿਕਦਾ ਹੋਵੇ, ਜੇ ਮੱਖੀ ਦੇ ਸ਼ਹਿਦ ਦੀ ਗੱਲ ਕੀਤੀ ਜਾਵੇ ਤਾਂ ਇਹ 70 ਤੋਂ ਲੈ ਕੇ 100 ਤੱਕ ਵਿਕ ਜਾਂਦਾ ਹੈ, ਇਸ ਦੀ ਮੋਮ 250 ਰੁਪਏ ਕਿਲੋ ਵਿਕਦੀ ਹੈ, ਇਸ ਤੋਂ ਬਾਅਦ ਪੋਲਣ ਵੀ 250 ਤੋਂ 300 ਤੱਕ ਵਿਕ ਜਾਂਦਾ ਹੈ, ਇਸ ਵਾਰ 3 ਤੋਂ 6 ਕਿਲੋ ਡੱਬੇ ਵਿਚੋਂ ਨਿਕਲਿਆ ਹੈ।
Gurcharan Singh Maan
ਇਸ ਦੀ ਰੈਲਜੈਲੀ ਵੀ 1000 ਰੁਪਏ ਕਿਲੋ ਵਿਕਦੀ ਹੈ, ਇਸ ਨੂੰ ਮੱਖੀ ਅਪਣੇ ਸਿਰ ਵਿਚੋਂ ਪੈਦਾ ਕਰਦੀ ਹੈ ਤੇ ਲੋਕ ਇਸ ਨੂੰ ਦਿਮਾਗ਼ ਜਾਂ ਹੋਰਨਾਂ ਬਿਮਾਰੀਆਂ ਲਈ ਇਸਤੇਮਾਲ ਕਰਦੇ ਹਨ। ਜਿਵੇਂ ਸਰਕਾਰ ਵੱਲੋਂ ਕਿਹਾ ਗਿਆ ਹੈ ਕਿ ਉਹਨਾਂ ਨੂੰ ਲੈਬ ਲਗਾ ਕੇ ਦਿੱਤੀ ਜਾਵੇਗੀ ਤਾਂ ਇਕ ਤੋਲੇ ਦਾ ਰੇਟ 1 ਲੱਖ 20 ਹਜ਼ਾਰ ਹੈ ਮਤਲਬ ਕਿ 12 ਹਜ਼ਾਰ ਰੁਪਏ ਗ੍ਰਾਮ। 50 ਬਕਸੇ ਲੈਣ ਤੇ ਬਾਗਬਾਨੀ ਮਹਿਕਮਾ ਵੱਲੋਂ 80 ਹਜ਼ਾਰ ਦੀ ਸਬਸਿਡੀ ਮਿਲਦੀ ਹੈ।
Bee Keeping
ਮੱਖੀਆਂ ਦੀਆਂ ਕਿਸਮਾਂ ਵਿਚ ਤਿੰਨ ਤਰ੍ਹਾਂ ਦੀਆਂ ਮੱਖੀਆਂ ਹੁੰਦੀਆਂ ਹਨ, ਇਕ ਕਾਮਾ ਮੱਖੀ, ਨਿਖੱਟੂ ਮੱਖੀ ਤੇ ਇਕ ਰਾਣੀ ਮੱਖੀ। ਰਾਣੀ ਮੱਖੀ ਦੀ ਉਮਰ 4 ਸਾਲ ਹੁੰਦੀ ਹੈ ਤੇ ਕਾਮਾ ਮੱਖੀ ਦੀ ਉਮਰ 42 ਦਿਨ ਹੁੰਦੀ ਹੈ ਤੇ ਨਿਖੱਟੂ ਮੱਖੀ ਦੀ ਉਮਰ 2 ਤੋਂ 3 ਮਹੀਨੇ ਹੁੰਦੀ ਹੈ। ਗਰਮੀਆਂ ਦੇ ਤਿੰਨ ਮਹੀਨੇ ਮਈ, ਜੂਨ ਅਤੇ ਜੁਲਾਈ ਤੇ ਠੰਡ ਦੇ ਨਵੰਬਰ, ਦਸੰਬਰ ਅਤੇ ਜਨਵਰੀ ਵਿਚ ਇਹਨਾਂ ਨੂੰ ਹੋਰਨਾਂ ਥਾਵਾਂ ਤੇ ਲਿਜਾਣਾ ਪੈਂਦਾ ਹੈ।
ਉੱਥੋਂ ਫਿਰ ਇਹ ਫੁੱਲਾਂ ਤੋਂ ਰੱਸ ਚੂਸ ਲੈਂਦੀਆਂ ਹਨ। ਮੱਖੀਆਂ ਦੇ ਬਕਸੇ ਬਣਾਉਣ ਲਈ 500 ਤੋਂ 2000 ਤਕ ਖਰਚ ਆ ਜਾਂਦਾ ਹੈ। ਗੁਰਚਰਨ ਸਿੰਘ ਮਾਨ ਨੇ ਹੋਰਨਾਂ ਕਿਸਾਨਾਂ ਨੂੰ ਵੀ ਇਹੀ ਸਲਾਹ ਦਿੱਤੀ ਹੈ ਕਿ ਉਹ ਅਪਣੀ ਮਿਹਨਤ ਸਦਕਾ ਬਹੁਤ ਤਰੱਕੀ ਕਰ ਸਕਦੇ ਹਨ ਪਰ ਉਹਨਾਂ ਨੂੰ ਕਿੱਤੇ ਬਾਰੇ ਗਿਆਨ ਹੋਣਾ ਜ਼ਰੂਰੀ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
