ਪਹਿਲਾਂ ਬਣਾਈ ਸੀ ਨਕਲੀ ਪੁਲਿਸ ਵਾਲੇ ਬਣ ਕੇ ਮਾਰਨ ਦੀ ਯੋਜਨਾ
Sidhu Moose Wala Murder Case: ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਮਾਮਲੇ ਵਿਚ ਇਕ ਅਹਿਮ ਖੁਲਾਸਾ ਹੋਇਆ ਹੈ। ਦਰਅਸਲ ਮੁਲਜ਼ਮ ਕੇਸ਼ਵ ਪੁੱਤਰ ਲਾਲਚੰਦ ਵਾਸੀ ਆਵਾ ਬਸਤੀ ਬਠਿੰਡਾ ਨੇ ਪੁਲਿਸ ਪੁੱਛਗਿੱਛ ਦੌਰਾਨ ਦਸਿਆ ਕਿ ਸ਼ੁਭਦੀਪ ਸਿੰਘ ਉਰਫ਼ ਸਿੱਧ ਮੂਸੇਵਾਲਾ ਦੇ ਕਤਲ ਤੋਂ ਪਹਿਲਾਂ ਪ੍ਰਿਆਵਰਤ ਫ਼ੌਜੀ, ਦੀਪਕ ਮੁੰਡੀ ਸਮੇਤ ਬਾਕੀ ਸਾਰੇ ਮੁਲਜ਼ਮਾਂ ਨੇ ਏਕੇ 47 ਸਮੇਤ ਸਾਰੇ ਹਥਿਆਰਾਂ ਨੂੰ ਚਲਾ ਕੇ ਚੈੱਕ ਕੀਤਾ ਸੀ।
ਉਨ੍ਹਾਂ ਨੇ ਡੱਬਵਾਲੀ ਦੇ ਪਿੰਡ ਸਕਤਾ ਖੇੜਾ ਦੇ ਖੇਤਾਂ 'ਚ ਸੁੰਨਸਾਨ ਥਾਂ 'ਤੇ ਪਿਸਤੌਲ ਨਾਲ ਗੋਲੀਆਂ ਚਲਾ ਕੇ ਅਭਿਆਸ ਕੀਤਾ ਸੀ। ਮੁਲਜ਼ਮ ਪ੍ਰਿਆਵਰਤ ਫੌਜੀ ਅਤੇ ਦੀਪਕ ਮੁੰਡੀ ਨੇ ਗ੍ਰਨੇਡ ਲਾਂਚਰ ਦੀ ਵਰਤੋਂ ਕਰਕੇ ਜਾਂਚ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਜਦੋਂ ਗ੍ਰਨੇਡ ਕੰਮ ਨਾ ਆਇਆ ਤਾਂ ਉਨ੍ਹਾਂ ਨੇ ਇਸ ਨੂੰ ਪੈਕ ਕਰ ਕੇ ਰੱਖ ਲਿਆ। ਉਪਰੋਕਤ ਪੂਰਾ ਖੁਲਾਸਾ ਕੇਸ਼ਵ ਨੇ ਪੁਲਿਸ ਪੁੱਛਗਿੱਛ ਦੌਰਾਨ ਕੀਤਾ ਹੈ।
ਸੂਤਰਾਂ ਨੇ ਦਸਿਆ ਕਿ ਗਾਇਕ ਮੂਸੇਵਾਲਾ ਦੇ ਨਾਲ ਭਾਰੀ ਪੁਲਿਸ ਸੁਰੱਖਿਆ ਕਾਰਨ ਵਿਦੇਸ਼ ਬੈਠੇ ਗੈਂਗਸਟਰ ਗੋਲਡੀ ਬਰਾੜ ਨੇ ਕਤਲ ਲਈ ਗੈਂਗਸਟਰਾਂ ਨੂੰ ਵੱਡੀ ਮਾਤਰਾ 'ਚ ਪਿਸਤੌਲ ਅਤੇ ਏਕੇ 47 ਦਿਤੇ ਸਨ, ਇਸ ਦੇ ਨਾਲ ਹੀ ਉਸ ਨੇ ਯੋਜਨਾ ਬਣਾਈ ਸੀ ਕਿ ਮੂਸੇਵਾਲਾ ਨੂੰ ਮਾਰਨ ਲਈ ਗੈਂਗਸਟਰ ਜੱਗੂ ਭਗਵਾਨਪੁਰੀਆ ਦੇ ਸ਼ੂਟਰ ਮਨਪ੍ਰੀਤ ਸਿੰਘ ਮੰਨਾ ਅਤੇ ਜਗਰੂਪ ਰੂਪਾ ਅਤੇ ਤਿੰਨ ਹੋਰ ਨੌਜਵਾਨ ਪੁਲਿਸ ਦੀ ਵਰਦੀ ਪਾ ਕੇ ਫਰਜ਼ੀ ਪੁਲਿਸ ਵਾਲੇ ਬਣ ਕੇ ਉਸ ਦੇ ਘਰ ਜਾਣਗੇ।
ਤਾਜ਼ਾ ਅਪਡੇਟਸ ਲਈ ਸਾਡੇ Whatsapp Broadcast Channel ਨਾਲ ਜੁੜੋ।
ਇਸ ਦੇ ਲਈ ਗੈਂਗਸਟਰਾਂ ਨੇ ਪੁਲਿਸ ਦੀ ਵਰਦੀ ਵੀ ਖਰੀਦੀ ਸੀ ਪਰ ਪੁਲਿਸ ਦੀ ਵਰਦੀ ਫਿੱਟ ਨਹੀਂ ਆਈ ਅਤੇ ਦੋਸ਼ੀਆਂ ਕੋਲ ਵਰਦੀ ਦਾ ਅੱਧਾ ਸਮਾਨ ਵੀ ਨਹੀਂ ਸੀ। ਉਕਤ ਯੋਜਨਾ ਨੂੰ ਪੂਰਾ ਕਰਨ ਲਈ ਜਦੋਂ ਇਕ ਨੌਜਵਾਨ ਪੁਲਿਸ ਦੀ ਵਰਦੀ ਪਾ ਕੇ ਪੱਗ ਬੰਨ੍ਹ ਰਿਹਾ ਸੀ ਤਾਂ ਉਸ ਨੇ ਗੈਂਗਸਟਰ ਗੋਲਡੀ ਬਰਾੜ ਨਾਲ ਗੱਲ ਕੀਤੀ ਕਿ ਜਿਨ੍ਹਾਂ ਦੋ ਲੜਕੀਆਂ ਨੂੰ ਉਕਤ ਯੋਜਨਾ ਵਿਚ ਸ਼ਾਮਲ ਕਰਨਾ ਸੀ, ਉਹ ਇਥੇ ਨਹੀਂ ਹਨ। ਉਕਤ ਯੋਜਨਾ ਵਿਚ ਸ਼ਾਮਲ ਦੋ ਲੜਕੀਆਂ ਨੇ ਮੂਸੇਵਾਲਾ ਦੇ ਘਰ ਵਿਚ ਜਾਅਲੀ ਪੁਲਿਸ ਵਾਲਿਆਂ ਦੇ ਨਾਲ ਪੱਤਰਕਾਰ ਬਣ ਕੇ ਦਾਖਲ ਹੋਣਾ ਸੀ। ਸੂਤਰਾਂ ਨੇ ਦਸਿਆ ਕਿ ਜਦੋਂ ਪੁਲਿਸ ਦੀ ਵਰਦੀ ਦਾ ਸਮਾਨ ਪੂਰਾ ਨਹੀਂ ਹੋਇਆ ਅਤੇ ਦੋਵੇਂ ਲੜਕੀਆਂ ਨਹੀਂ ਮਿਲੀਆਂ ਤਾਂ ਗੋਲਡੀ ਬਰਾੜ ਵਲੋਂ ਉਕਤ ਯੋਜਨਾ ਨੂੰ ਰੱਦ ਕਰ ਦਿਤਾ ਗਿਆ।
ਸੂਤਰਾਂ ਨੇ ਦਸਿਆ ਕਿ ਜਦੋਂ ਮੂਸੇਵਾਲਾ ਦੀ ਪੁਲਿਸ ਸੁਰੱਖਿਆ ਹਟਾਈ ਗਈ ਸੀ ਤਾਂ ਗੈਂਗਸਟਰ ਗੋਲਡੀ ਬਰਾੜ ਨੇ ਮੁਲਜ਼ਮ ਕੇਸ਼ਵ ਨੂੰ ਫ਼ੋਨ ਕਰਕੇ ਕਿਹਾ ਸੀ ਕਿ ਹੁਣ ਮੂਸੇਵਾਲਾ ਕੋਲ ਪੁਲਿਸ ਸੁਰੱਖਿਆ ਨਹੀਂ ਹੈ, ਤੁਸੀਂ ਫਤਿਹਾਬਾਦ ਜਾ ਕੇ ਸਾਰੇ ਸਾਥੀਆਂ ਨੂੰ ਮਾਨਸਾ ਲੈ ਆਓ। ਇਸ ਤੋਂ ਬਾਅਦ ਕੇਸ਼ਵ ਬਾਈਕ 'ਤੇ ਫਤਿਹਾਬਾਦ ਗਿਆ ਅਤੇ ਅਪਣੇ ਸਾਰੇ ਸਾਥੀਆਂ ਨੂੰ ਅਪਣੇ ਨਾਲ ਮਾਨਸਾ ਲੈ ਆਇਆ। ਮੁਲਜ਼ਮ ਨੇ ਅਪਣਾ ਮੋਟਰਸਾਈਕਲ ਅੱਗੇ ਲਗਾ ਦਿਤਾ ਜਦਕਿ ਹੋਰ ਸਾਥੀ ਵਾਹਨਾਂ ਸਮੇਤ ਉਸ ਦਾ ਪਿੱਛਾ ਕਰ ਰਹੇ ਸਨ।
(For more Punjabi news apart from Sidhu moosewala murder case update, stay tuned to Rozana Spokesman)
