ਭਾਰਤ ਵਿਚ ਕੋਰੋਨਾ ਵਾਇਰਸ ਦੇ ਪੀੜਤਾਂ ਦੀ ਗਿਣਤੀ ਇਕ ਲੱਖ ਤੋਂ ਟੱਪ ਗਈ ਹੈ ਪਰ ਮੌਤਾਂ ਦੀ ਗਿਣਤੀ ਅਜੇ ਵੀ ਕਾਬੂ ਹੇਠ ਹੈ।
ਭਾਰਤ ਵਿਚ ਕੋਰੋਨਾ ਵਾਇਰਸ ਦੇ ਪੀੜਤਾਂ ਦੀ ਗਿਣਤੀ ਇਕ ਲੱਖ ਤੋਂ ਟੱਪ ਗਈ ਹੈ ਪਰ ਮੌਤਾਂ ਦੀ ਗਿਣਤੀ ਅਜੇ ਵੀ ਕਾਬੂ ਹੇਠ ਹੈ। ਹੁਣ ਇਹ ਅੰਕੜਾ ਦੁਗਣਾ, ਤਿਗਣਾ ਹੋਣੋਂ ਰੋਕਣ ਦੀ ਤਿਆਰੀ ਕਰਨੀ ਪਵੇਗੀ ਕਿਉਂਕਿ ਜਿੰਨੀ ਸਾਡੀ ਆਬਾਦੀ ਹੈ, ਲਾਜ਼ਮੀ ਹੈ ਕਿ ਕੋਰੋਨਾ ਦਾ ਅਸਰ ਵੀ ਓਨੀ ਵੱਡੀ ਆਬਾਦੀ ਅਨੁਸਾਰ ਹੀ ਨਜ਼ਰ ਆਵੇਗਾ।
Photo
ਲੱਖ ਕੋਸ਼ਿਸ਼ਾਂ ਦੇ ਬਾਵਜੂਦ ਹੁਣ ਜਾਪਦਾ ਨਹੀਂ ਕਿ ਇਹ ਰੁਕ ਸਕੇਗਾ। ਹੁਣ ਸਿਰਫ਼ ਇਲਾਜ ਵਲ ਧਿਆਨ ਦੇਣ ਦੀ ਜ਼ਰੂਰਤ ਹੈ ਤਾਕਿ ਮੌਤਾਂ ਦੀ ਗਿਣਤੀ ਹੱਦਾਂ ਨਾ ਪਾਰ ਕਰ ਸਕੇ। ਦੁਨੀਆਂ ਭਰ ਦੇ ਦੇਸ਼ਾਂ ਨੂੰ ਇਸ ਵੇਲੇ ਦੋ ਰਾਜ਼ ਪ੍ਰੇਸ਼ਾਨ ਕਰ ਰਹੇ ਹਨ। ਪਹਿਲਾ ਇਹ ਕਿ ਕੀ ਕੋਰੋਨਾ ਵਾਇਰਸ ਜਾਨਵਰਾਂ ਤੋਂ ਫੈਲਿਆ ਜਾਂ ਚੀਨ ਦੀ ਪ੍ਰਯੋਗਸ਼ਾਲਾ ਵਿਚ ਤਿਆਰ ਹੋਇਆ?
Photo
ਇਸ ਦਾ ਪਤਾ ਲਾਉਣ ਲਈ ਵਿਸ਼ਵ ਸਿਹਤ ਸੰਗਠਨ ਉਤੇ ਸਾਰੇ ਦੇਸ਼ਾਂ ਨੇ ਜ਼ੋਰ ਪਾਇਆ ਹੈ ਅਤੇ ਹੁਣ ਇਕ ਨਿਰਪੱਖ ਜਾਂਚ ਸਿੱਧ ਕਰ ਦੇਵੇਗੀ ਕਿ ਅਸਲ ਸੱਚ ਕੀ ਹੈ, ਕਿਉਂਕਿ ਡੋਨਾਲਡ ਟਰੰਪ ਵਲੋਂ ਚੀਨ ਵਿਰੁਧ ਇਲਜ਼ਾਮ ਲਾਏ ਗਏ ਹਨ, ਅਤੇ ਬਾਕੀ ਦੇਸ਼ਾਂ ਨੇ ਵੀ ਚੀਨ ਦੀ ਤਾਕਤ ਦੇ ਬਾਵਜੂਦ ਉਸ ਵਿਰੁਧ ਮੋਰਚਾ ਖੋਲਿ੍ਹਆ ਹੈ ਜਿਸ ਸਦਕਾ ਵਿਸ਼ਵ ਸਿਹਤ ਸੰਗਠਨ ਨੂੰ ਵੀ 100 ਦੇਸ਼ਾਂ ਦੀ ਮੰਗ ਅੱਗੇ ਝੁਕਣਾ ਪਿਆ।
Photo
ਦੂਜਾ ਵੱਡਾ ਰਾਜ਼ ਹੈ ਕੋਰੋਨਾ ਕਰ ਕੇ ਹੋ ਰਹੀਆਂ ਮੌਤਾਂ ਦਾ ਅਤੇ ਇਹ ਸਵਾਲ ਉਠ ਕੇ ਆ ਰਿਹਾ ਹੈ ਕਿ ਕੁੱਝ ਦੇਸ਼ਾਂ ਵਿਚ ਅਸਲ ਮੌਤਾਂ ਦੀ ਗਿਣਤੀ ਵੱਧ ਹੋਈ ਹੈ ਪਰ ਸਾਰੀਆਂ ਮੌਤਾਂ ਕੋਰੋਨਾ ਦੇ ਅੰਕੜਿਆਂ ਵਿਚ ਸ਼ਾਮਲ ਨਹੀਂ ਕੀਤੀਆਂ ਜਾ ਰਹੀਆਂ। 23 ਦੇਸ਼ਾਂ ਵਿਚ 2019 ਮਾਰਚ ਮਹੀਨੇ ਹੋਈਆਂ ਮੌਤਾਂ ਅਤੇ ਮਾਰਚ 2020 ਦੀਆਂ ਮੌਤਾਂ ਦੇ ਅੰਕੜੇ ਵਿਚ ਫ਼ਰਕ ਸਮਝ ਤੋਂ ਬਾਹਰ ਦੀ ਗੱਲ ਹੈ।
Photo
ਇੰਗਲੈਂਡ, ਇਟਲੀ, ਇਕੁਆਡੋ, ਸਪੇਨ, ਪੁਰਤਗਾਲ, ਨਿਊਯਾਰਕ ਵਰਗੀਆਂ ਥਾਵਾਂ ਵਿਚ ਪਿਛਲੇ ਸਾਲ ਦੇ ਮੁਕਾਬਲੇ ਵੱਧ ਮੌਤਾਂ ਦਾ ਭੇਤ ਸਮਝ ਨਹੀਂ ਆ ਰਿਹਾ। ਜਿਵੇਂ ਇੰਗਲੈਂਡ ਵਿਚ ਹਰ ਹਫ਼ਤੇ 2019 ਵਿਚ 10 ਹਜ਼ਾਰ ਮੌਤਾਂ ਹੁੰਦੀਆਂ ਸਨ ਪਰ ਇਸ ਸਾਲ ਮਾਰਚ ਵਿਚ ਤਕਰੀਬਨ 20 ਹਜ਼ਾਰ ਮੌਤਾਂ ਹੋਈਆਂ ਹਨ।
Photo
ਸਰਕਾਰੀ ਅੰਕੜਿਆਂ ਅਨੁਸਾਰ 3,17,000 ਮੌਤਾਂ ਹੋਈਆਂ ਹਨ ਪਰ ਜਦੋਂ ਤਕ ਇਹ ਅੰਕੜਾ ਸੱਚਾ ਸਾਬਤ ਨਹੀਂ ਹੋ ਜਾਂਦਾ, ਇਸ ਮਹਾਂਮਾਰੀ ਦਾ ਪੂਰਾ ਅਸਰ ਸਮਝ ਵਿਚ ਨਹੀਂ ਆਉਣ ਵਾਲਾ। ਦੂਜਾ ਭੇਤ ਇਹ ਹੈ ਕਿ ਦਖਣੀ ਏਸ਼ੀਆ ਵਿਚ ਮੌਤਾਂ ਵਿਚ ਕਮੀ ਰਹੀ ਹੈ। ਭਾਰਤ, ਚੀਨ, ਪਾਕਿਸਤਾਨ, ਬੰਗਲਾਦੇਸ਼ ਆਦਿ ਵਿਚ ਮੌਤਾਂ ਦੀ ਗਿਣਤੀ ਵੀ ਘੱਟ ਰਹੀ ਹੈ ਅਤੇ ਨਾਲ ਹੀ ਮੌਤਾਂ ਦੀ ਦਰ ਵੀ ਘੱਟ ਰਹੀ ਹੈ।
Photo
ਮੁੰਬਈ ਵਿਚ 2019 ਦੇ ਮੁਕਾਬਲੇ ਇਸ ਸਾਲ ਘੱਟ ਮੌਤਾਂ ਹੋਈਆਂ ਅਤੇ ਕੋਰੋਨਾ ਤੋਂ ਵੀ ਪੀੜਤ ਘੱਟ ਹੀ ਮਰੇ। ਜਿਥੇ ਗ਼ਰੀਬ ਅਤੇ ਵੱਧ ਆਬਾਦੀ ਕਰ ਕੇ ਇਨ੍ਹਾਂ ਦੇਸ਼ਾਂ ਵਿਚ ਅਸਰ ਜ਼ਿਆਦਾ ਹੋਣਾ ਸੀ, ਉਹ ਘੱਟ ਹੋ ਰਿਹਾ ਹੈ। ਇਸ ਗੁੰਝਲ ਪਿੱਛੇ ਜਾਂ ਤਾਂ ਘੱਟ ਟੈਸਟ ਇਕ ਕਾਰਨ ਹੋ ਸਕਦਾ ਹੈ ਪਰ ਮੌਤਾਂ ਦੀ ਦਰ ਫਿਰ ਹੋਰ ਵੀ ਘੱਟ ਹੋਵੇਗੀ।
Photo
ਇਨ੍ਹਾਂ ਦੇਸ਼ਾਂ ਵਿਚ ਇਹ ਜ਼ਰੂਰ ਹੋ ਸਕਦਾ ਹੈ ਕਿ ਮੌਤ ਦਾ ਕਾਰਨ ਲੁਕਾਇਆ ਜਾਂਦਾ ਹੋਵੇ ਕਿਉਂਕਿ ਕੋਰੋਨਾ ਇਕ ਸਮਾਜਕ ਬਲਾ ਮੰਨੀ ਜਾਂਦੀ ਹੈ। ਪਰ ਫਿਰ ਵੀ ਯੂਰੋਪ, ਅਮਰੀਕਾ ਦੇ ਮੁਕਾਬਲੇ ਦਖਣੀ ਏਸ਼ੀਆ ਵਿਚ ਕੋਰੋਨਾ ਦਾ ਅਸਰ ਬਹੁਤ ਘੱਟ ਰਿਹਾ। ਮੌਤ ਦੇ ਅੰਕੜਿਆਂ ਵਿਚ ਨਾ ਸਿਰਫ਼ ਕੋਰੋਨਾ ਬਲਕਿ ਕੋਰੋਨਾ ਨਾਲ ਸਬੰਧਤ ਗ਼ਰੀਬੀ, ਭੁੱਖਮਰੀ ਦੀਆਂ ਮੌਤਾਂ ਦੀ ਗਿਣਤੀ ਵੀ ਜ਼ਰੂਰੀ ਹੈ।
Photo
ਇਹ ਵੀ ਸਾਹਮਣੇ ਲਿਆਉਣਾ ਪਵੇਗਾ ਕਿ ਸਰਕਾਰਾਂ ਦੀ ਨੀਤ ਅਤੇ ਨੀਤੀਆਂ ਨੇ ਕਿਸ ਤਰ੍ਹਾਂ ਇਸ ਮਹਾਂਮਾਰੀ ਦੇ ਅਸਰ ਨੂੰ ਘਟਾਉਣ ਅਤੇ ਵਧਾਉਣ ਦਾ ਕੰਮ ਕੀਤਾ ਹੈ। ਪਹਿਲੇ ਰਾਜ਼ ਨੂੰ ਖੋਲ੍ਹਣ ਲਈ ਕੰਮ ਸ਼ੁਰੂ ਹੋ ਚੁੱਕਾ ਹੈ ਕਿਉਂਕਿ ਇਸ ਨੂੰ ਸਰਕਾਰਾਂ ਖੋਲ੍ਹਣਾ ਚਾਹੁੰਦੀਆਂ ਹਨ, ਪਰ ਦੂਜੇ ਰਾਜ਼ ਤੋਂ ਪਰਦਾ ਹਟਾਉਣ ਵਿਚ ਸਰਕਾਰਾਂ ਕਿਉਂਕਿ ਆਪ ਜਨਤਾ ਸਾਹਮਣੇ ਨੰਗੀਆਂ ਹੋਣਗੀਆਂ, ਇਸ ਤੇ ਕੰਮ ਕਰਨ ਦੀ ਪਹਿਲ ਘੱਟ ਹੀ ਕੋਈ ਸਰਕਾਰ ਕਰੇਗੀ। ਸਰਕਾਰਾਂ ਵੀ ਕਹਿਣਗੀਆਂ ਕਿ ਲੋਕ ਉਲਝੇ ਹੋਏ ਹਨ ਅਪਣੀ ਜਾਨ, ਰੋਜ਼ੀ-ਰੋਟੀ ਬਚਾਉਣ ਵਿਚ, ਇਨ੍ਹਾਂ ਨੂੰ ਉਲਝਾਈ ਰੱਖੋ। ਪਰ ਇਸ ਮਹਾਂਮਾਰੀ ਦੀ ਸਚਾਈ ਸਿਰਫ਼ ਸਰਕਾਰਾਂ ਵਾਸਤੇ ਨਹੀਂ ਬਲਕਿ ਧਰਤੀ ਵਾਸਤੇ ਵੀ ਜ਼ਰੂਰੀ ਹੈ। -ਨਿਮਰਤ ਕੌਰ
