ਅਮਿਤਾਭ ਬੱਚਨ ਅਤੇ ਉਸ ਦੇ ਪ੍ਰਵਾਰ ਨੂੰ ਕੋਰੋਨਾ ਹੋਇਆ ਤਾਂ ਪੂਰਾ ਦੇਸ਼ ਇਕ ਸਦਮੇ ਵਿਚ ਚਲਾ ਗਿਆ।
ਅਮਿਤਾਭ ਬੱਚਨ ਅਤੇ ਉਸ ਦੇ ਪ੍ਰਵਾਰ ਨੂੰ ਕੋਰੋਨਾ ਹੋਇਆ ਤਾਂ ਪੂਰਾ ਦੇਸ਼ ਇਕ ਸਦਮੇ ਵਿਚ ਚਲਾ ਗਿਆ। ਅਮਿਤਾਭ ਦੀ ਸਿਹਤਯਾਬੀ ਲਈ ਲੋਕ ਅਪਣੇ ਘਰਾਂ ਵਿਚ ਪਾਠ-ਪੂਜਾ ਅਤੇ ਹਵਨ ਕਰਵਾ ਰਹੇ ਹਨ। ਅਮਿਤਾਭ ਪਿਛੇ ਲੋਕ ਕਮਲੇ ਹੋਏ ਪਏ ਹਨ। ਟੀ.ਵੀ. ਚੈਨਲਾਂ ਦੀਆਂ ਖ਼ਬਰਾਂ ਦੀਆਂ ਸੁਰਖ਼ੀਆਂ ਆ ਰਹੀਆਂ ਹਨ ਕਿ 'ਅਮਿਤਾਭ ਪਿਸ਼ਾਬ ਕਰਨ ਆਪ ਚਲ ਕੇ ਗਏ'।
Amitabh Bachchan
ਕਈਆਂ ਨੂੰ ਇਤਿਹਾਸ ਦੇ ਪੰਨਿਆਂ ਵਿਚ ਅਮਿਤਾਭ ਅਤੇ ਰੇਖਾ ਦਾ ਰਿਸ਼ਤਾ ਨਜ਼ਰ ਆਇਆ ਪਰ ਕਿਸੇ ਨੂੰ ਇਹ ਨਾ ਯਾਦ ਆਇਆ ਕਿ ਇਸੇ ਅਮਿਤਾਭ ਬੱਚਨ ਨੇ ਨਵੰਬਰ 1984 ਵਿਚ ਦੂਰਦਰਸ਼ਨ 'ਤੇ ਰਾਜੀਵ ਗਾਂਧੀ ਵਲੋਂ ਚਾਲੂ ਕੀਤੇ ਗਏ ਸਿੱਖ ਕਤਲੇਆਮ ਨੂੰ ਇਹ ਨਾਹਰਾ ਮਾਰ ਕੇ ਸਰਾਹਿਆ ਸੀ, ''ਖ਼ੂਨ ਕਾ ਬਦਲਾ ਖ਼ੂਨ ਸੇ ਲੇਂਗੇ।'' ਖ਼ੈਰ, ਉਹ ਤਾਂ ਅੱਜ ਕਿਸੇ ਨੂੰ ਵੀ ਯਾਦ ਨਹੀਂ ਰਿਹਾ।
Rajiv Gandhi
ਅਮਿਤਾਭ ਦੀਆਂ ਫ਼ਿਲਮਾਂ ਪੰਜਾਬ ਵਿਚ ਸਿੱਖਾਂ ਵਲੋਂ ਵੀ ਅਤੇ ਪੂਰੇ ਭਾਰਤ ਵਲੋਂ ਵੀ ਵੇਖੀਆਂ ਜਾਂਦੀਆਂ ਹਨ। ਉਸ ਦੀ ਕਦਰ ਇਸ ਤਰ੍ਹਾਂ ਕੀਤੀ ਜਾਂਦੀ ਹੈ ਜਿਵੇਂ ਇਸ ਤੋਂ ਵਧੀਆ ਕਲਾਕਾਰ ਸ਼ਾਇਦ ਕਦੇ ਕੋਈ ਹੋਇਆ ਹੀ ਨਹੀਂ। ਇਹ ਤਾਂ ਰਵੀ ਸਿੰਘ ਨੇ ਸਿੱਖਾਂ ਨੂੰ ਯਾਦ ਕਰਵਾਇਆ ਤਾਂ ਕਈਆਂ ਨੂੰ ਅਪਣੇ ਜ਼ਖ਼ਮਾਂ ਨੂੰ ਹੋਰ ਡੂੰਘਾ ਕਰਨ ਵਾਲੇ ਅਮਿਤਾਭ ਦੇ ਇਤਿਹਾਸ ਦੀ ਯਾਦ ਆਈ।
Amitabh Bachchan
ਅਮਿਤਾਭ ਬੱਚਨ ਨੂੰ ਅੱਜ ਵੀ ਕੋਈ ਬਦ-ਦੁਆ ਨਹੀਂ ਦੇ ਸਕਦੇ, ਨਾ ਦੇਣੀ ਬਣਦੀ ਹੀ ਹੈ ਪਰ ਕਿਸੇ ਇਨਸਾਨ ਦੀ ਸਿਫ਼ਤ ਕਰਨ ਤੋਂ ਪਹਿਲਾਂ ਕੀ ਉਸ ਦੀ 'ਖ਼ੂਨ ਕਾ ਬਦਲਾ ਖ਼ੂਨ' ਵਾਲੀ ਜ਼ਹਿਨੀਅਤ 'ਤੇ ਵੀ ਸਵਾਲ ਨਹੀਂ ਕੀਤਾ ਜਾ ਸਕਦਾ, ਖ਼ਾਸ ਕਰ ਕੇ ਜੇ ਉਹ ਅਪਣੇ ਆਪ ਨੂੰ ਇਕ ਕਲਾਕਾਰ ਵੀ ਅਖਵਾਉਂਦਾ ਹੈ?
ਅਮਿਤਾਭ ਦੀ ਕਲਾਕਾਰੀ 'ਤੇ ਮਾਣ ਕਰਨ ਵਾਲੇ ਪੂਰੇ ਭਾਰਤ ਨੂੰ ਪੁੱਛਣ ਵਾਲਾ ਇਕ ਹੀ ਸਵਾਲ ਹੈ ਕਿ ਜੇਕਰ ਕੋਈ ਕਲਾਕਾਰ ਕਿਸੇ ਕੌਮ ਦੇ ਨਿਰਦੋਸ਼ਾਂ ਨੂੰ ਜ਼ਿੰਦਾ ਸਾੜ ਦੇਣਾ ਠੀਕ ਸਮਝਦਾ ਹੈ ਤਾਂ ਕੀ ਉਹ ਇਕ ਸੱਚਾ ਸੁੱਚਾ ਕਲਾਕਾਰ ਹੋ ਸਕਦਾ ਹੈ?
Amitabh Bachchan
ਠੀਕ ਹੋਣਾ ਤਾਂ ਦੂਰ ਦੀ ਗੱਲ ਹੈ, ਜੇ ਉਹ ਹੋ ਰਹੇ ਕਤਲੇਆਮ ਨੂੰ ਵੇਖ ਕੇ ਵੀ ਭੀੜਾਂ ਨੂੰ ਉਕਸਾਉਣ ਵਾਲੀ ਆਵਾਜ਼ ਬਣਦਾ ਹੈ ਤਾਂ ਕੀ ਉਹ ਇਨਸਾਨ ਵੀ ਅਖਵਾ ਸਕਦੈ? ਅਸੀ ਸਿਆਸਤਦਾਨਾਂ ਤੋਂ ਮਾਫ਼ੀ, ਨਰਮੀ ਅਤੇ ਹਮਦਰਦੀ ਦੀ ਉਮੀਦ ਨਹੀਂ ਰਖਦੇ ਪਰ ਇਕ ਸੱਚੇ ਸੁੱਚੇ ਕਲਾਕਾਰ ਦੇ ਦਾਮਨ 'ਤੇ ਖ਼ੂਨ ਦੇ ਦਾਗ਼ ਵੇਖ ਕੇ ਚੁੱਪ ਵੀ ਨਹੀਂ ਰਹਿ ਸਕਦੇ।
Amrita pritam
ਅੰਮ੍ਰਿਤਾ ਪ੍ਰੀਤਮ ਦੀ ਇਕ ਕਵਿਤਾ ਵਿਚ ਵਾਰਿਸ ਸ਼ਾਹ ਨੂੰ ਵਾਜਾਂ ਮਾਰ ਕੇ ਫ਼ਰਿਆਦ ਕੀਤੀ ਗਈ ਸੀ ਕਿ ਧੀਆਂ ਦੇ ਸੁਹਾਗ ਲੁੱਟੇ ਜਾਣ ਵਿਰੁਧ ਇਕ ਵਾਰ ਫਿਰ ਕਲਮ ਚੁੱਕੇ। ਪਰ ਅੰਮ੍ਰਿਤਾ ਨੇ ਕਦੇ ਕਿਸੇ ਕਤਲੇਆਮ ਦੇ ਹੱਕ ਵਿਚ ਤਾਂ ਨਾਹਰਾ ਬੁਲੰਦ ਨਹੀਂ ਸੀ ਕੀਤਾ। ਨਾ ਹੀ ਅਜਿਹਾ ਸ਼ਿਵ ਬਟਾਲਵੀ ਨੇ ਕੀਤਾ, ਨਾ ਇਕਬਾਲ ਨੇ, ਨਾ ਕਿਸੇ ਐਸੇ ਕਲਾਕਾਰ ਨੇ ਕੀਤਾ ਜਿਸ ਨੇ ਲੋਕਾਂ ਦੇ ਦੇ ਦਿਲਾਂ ਤੇ ਕਦੇ ਰਾਜ ਕੀਤਾ।
Sidhu Moose Wala
ਪਰ ਅਮਿਤਾਭ ਵਰਗੇ ਕਲਾਕਾਰ ਬਹੁਤ ਹਨ ਜੋ ਹਮਦਰਦੀ ਕਿਸੇ ਨਾਲ ਨਹੀਂ ਰਖਦੇ ਪਰ ਉਹ ਅਪਣੀ ਕਲਾਕਾਰੀ ਕਾਰਨ ਭੀੜਾਂ ਦੇ ਹੀਰੋ ਬਣੇ ਹੋਏ ਹਨ।
ਸਾਡੇ ਪੰਜਾਬ ਵਿਚ ਐਸੇ ਕਈ ਗੀਤਕਾਰ ਹਨ ਜੋ ਅੱਜ ਬੰਦੂਕਾਂ ਤੇ ਹੋਰ ਹਥਿਆਰਾਂ ਵਾਲੇ ਗੀਤ ਗਾਉਂਦੇ ਹਨ ਅਤੇ ਪੈਸੇ ਕਮਾਉਂਦੇ ਹਨ ਪਰ ਉਹ ਸਮਾਜ ਦੇ ਅਸਲੀ ਹਮਦਰਦ ਨਹੀਂ ਹਨ ਕਿਉਂਕਿ ਉਹ ਜਾਣਦੇ ਹਨ ਕਿ ਉਨ੍ਹਾਂ ਦੇ ਗੀਤਾਂ ਨਾਲ ਨੌਜਵਾਨ ਗੁਮਰਾਹ ਹੋ ਕੇ ਗ਼ਲਤ ਰਸਤੇ ਪੈ ਸਕਦੇ ਹਨ ਪਰ ਉਹ ਸਿਰਫ਼ ਅਪਣੀ ਚੜ੍ਹਤ ਵੇਖਦੇ ਹਨ।
File Photo
ਸਿੱਧੂ ਮੂਸੇਵਾਲਾ ਇਕ ਹੋਣਹਾਰ ਨੌਜਵਾਨ ਹੈ, ਜਿਸ ਦੇ ਦਿਲ ਵਿਚ ਖੋਟ ਨਹੀਂ ਪਰ ਉਹ ਅੱਜ ਅਪਣੇ ਗੀਤਾਂ ਵਿਚ ਨੌਜਵਾਨਾਂ ਲਈ ਹਮਦਰਦੀ ਨਹੀਂ ਵਿਖਾ ਰਿਹਾ। ਸਿੱਧੂ ਮੂਸੇਵਾਲੇ ਦਾ ਗੀਤ ਬੰਬੀਹਾ ਅਤੇ ਹੁਣ ਨਵਾਂ ਗੀਤ ਸਮਾਜ ਦੇ ਸਿਸਟਮ ਨੂੰ ਨੰਗਾ ਕਰਦਾ ਹੈ। ਥਾਣਿਆਂ ਅੰਦਰ ਅਤੇ ਬਾਹਰ ਸਿੱਧੂ ਮੂਸੇਵਾਲੇ ਨੂੰ ਸਲੂਟ ਵਜਦਾ ਹੈ ਅਤੇ ਉਸ ਉਤੇ ਪਰਚੇ ਸਿਰਫ਼ ਵਿਖਾਵੇ ਵਾਸਤੇ ਹੁੰਦੇ ਹਨ।
U.A.P.A. Law
ਸਿੱਧੂ ਮੂਸੇਵਾਲਾ ਵਰਗੇ ਹੱਥ ਵਿਚ ਬੰਦੂਕ ਰੱਖਣ ਨੂੰ ਅਪਣੀ ਸ਼ਾਨ ਮੰਨਦੇ ਹਨ ਅਤੇ ਸੰਜੇ ਦੱਤ ਵਾਂਗ ਪਰਚਾ ਹੋਣ ਨੂੰ ਵੀ ਅਪਣੀ ਸ਼ਾਨ ਸਮਝਦੇ ਹਨ ਪਰ ਜਦ ਆਏ ਦਿਨ ਸਿੱਖ ਨੌਜਵਾਨ ਯੂ.ਏ.ਪੀ.ਏ. ਤਹਿਤ ਜੇਲ੍ਹਾਂ ਵਿਚ ਗ਼ਾਇਬ ਹੋ ਜਾਂਦੇ ਹਨ, ਕੀ ਉਹ ਇਸ ਵਿਰੁਧ ਆਵਾਜ਼ ਉੱਚੀ ਕਰਨ ਪ੍ਰਤੀ ਅਪਣੀ ਜ਼ਿੰਮੇਵਾਰੀ ਵੀ ਸਮਝਦੇ ਹਨ?
Amitabh Bachchan
ਅਮਿਤਾਭ ਨੇ ਖੁੱਲ੍ਹ ਕੇ ਸਿੱਖ ਕਤਲੇਆਮ ਨੂੰ ਹੱਲਾਸ਼ੇਰੀ ਦਿਤੀ ਪਰ ਸਿੱਧੂ ਮੂਸੇਵਾਲਾ ਅਪਣੀ ਨਾਸਮਝੀ ਕਾਰਨ ਨੌਜਵਾਨਾਂ ਦੇ ਭਟਕਣ ਦਾ ਕਾਰਨ ਬਣ ਰਿਹਾ ਹੈ, ਫਿਰ ਵੀ ਇਨ੍ਹਾਂ ਦੋਵੇਂ ਕਲਾਕਾਰਾਂ ਪਿਛੇ ਲੋਕ ਕਮਲੇ ਹੋਏ ਫਿਰਦੇ ਹਨ। ਪਰ ਕੀ ਇਤਿਹਾਸ ਵੀ ਇਨ੍ਹਾਂ ਨੂੰ ਦੇਵ ਆਨੰਦ, ਮੁਹੰਮਦ ਰਫ਼ੀ, ਲੱਤਾ, ਰਾਜੇਸ਼ ਖੰਨਾ ਅਤੇ ਸ਼ਿਵ ਬਟਾਲਵੀ ਵਰਗੇ ਕਲਾਕਾਰਾਂ ਵਾਲਾ ਮਾਣ ਦੇ ਸਕੇਗਾ? -ਨਿਮਰਤ ਕੌਰ
