ਹੁਣ ਰਾਸ਼ਟਰੀ ਸੋਚ ਵਿਰੁਧ ਖੇਤਰੀ ਸੋਚ ਬਲਵਾਨ ਹੋ ਰਹੀ ਹੈ ਤੇ ਇਹੀ ਆਗੂ ਹੁਣ ਕਾਂਗਰਸ ਛੱਡ ਕੇ ਜਾ ਰਹੇ ਹਨ।
ਸਾਬਕਾ ਕੇਂਦਰੀ ਮੰਤਰੀ ਤੇ ਰਾਹੁਲ ਗਾਂਧੀ (Rahul Gandhi) ਦੇ ਕਰੀਬੀ ਜਤਿਨ ਪ੍ਰਸਾਦ (Jitin Prasada), ਜਦ ਕਾਂਗਰਸ (Congress) ਛੱਡ ਭਾਜਪਾ (BJP) ਵਿਚ ਸ਼ਾਮਲ ਹੋਏ ਤਾਂ ਉਨ੍ਹਾਂ ਆਖਿਆ ਕਿ ਹੁਣ ਦੇਸ਼ ਵਿਚ ਇਕੋ ਹੀ ਰਾਸ਼ਟਰੀ ਪਾਰਟੀ ਰਹਿ ਗਈ ਹੈ। ਜਤਿਨ ਪ੍ਰਸਾਦ ਨੂੰ ਬੰਗਾਲ ਵਿਚ ਕਾਂਗਰਸ ਚੋਣ ਪ੍ਰਚਾਰ ਦੀ ਜ਼ਿੰਮੇਵਾਰੀ ਦਿਤੀ ਗਈ ਸੀ ਤੇ ਬੰਗਾਲ ਦੀਆਂ ਚੋਣਾਂ ਵਿਚ ਕਾਂਗਰਸ ਬੁਰੀ ਤਰ੍ਹਾਂ ਚਿਤ ਹੋ ਗਈ ਸੀ। ਜਤਿਨ ਪ੍ਰਸਾਦ ਉਨ੍ਹਾਂ 23 ‘ਬਾਗ਼ੀ’ ਆਗੂਆਂ ਵਿਚੋਂ ਇਕ ਸਨ ਜਿਨ੍ਹਾਂ ਨੇ ਕਪਿਲ ਸਿੱਬਲ ਤੇ ਗ਼ੁਲਾਮ ਨਬੀ ਆਜ਼ਾਦ ਆਦਿ ਨਾਲ ਮਿਲ ਕੇ ਕਾਂਗਰਸ ਦੇ ਅੰਦਰੋਂ ਬਦਲਾਅ ਤੇ ਲੋਕਤੰਤਰ ਲਿਆਉਣ ਦਾ ਯਤਨ ਕੀਤਾ ਸੀ।
Jitin Prasada
ਉਸ ਨੇ ਕਾਂਗਰਸ ਕਿਉਂ ਛੱਡੀ, ਇਸ ਨੂੰ ਸਮਝਣ ਦੇ ਦੋ ਨਜ਼ਰੀਏ ਹੋ ਸਕਦੇ ਹਨ। ਜਾਂ ਤਾਂ ਉਹ ਜੋਤੀ ਰਾਜੇ ਸਿੰਦੀਆ ਵਾਂਗ ਇਕ ਨੌਜਵਾਨ ਆਗੂ ਹੈ ਜੋ ਅਪਣੀ ਮਾਂ ਪਾਰਟੀ ਨੂੰ ਅਪਣੇ ਸਿਆਸੀ ਫ਼ਾਇਦੇ ਵਾਸਤੇ ਛੱਡ ਗਿਆ ਹੈ ਤੇ ਜਾਂ ਉਹ ਇਕ ਸਿਆਸਤਦਾਨ ਹੈ ਜੋ ਰਾਹੁਲ ਗਾਂਧੀ ਦੇ ਕਰੀਬ ਹੋਣ ਕਾਰਨ ਅਜਿਹਾ ਕੁੱਝ ਜਾਣਦਾ ਹੈ ਜੋ ਉਸ ਨੂੰ ਪਾਰਟੀ ਛੱਡਣ ਵਾਸਤੇ ਮਜਬੂਰ ਕਰਦਾ ਹੈ।
Rahul Gandhi
ਕਾਂਗਰਸ ਦੇ ਅੰਦਰ ਰਾਸ਼ਟਰ ਪੱਧਰ ਤੇ ਜੋ ਕੁੱਝ ਅੱਜ ਚਲ ਰਿਹਾ ਹੈ, ਉਹੀ ਕੁੱਝ ਹੁਣ ਪੰਜਾਬ (Punjab) ਵਿਚ ਵੀ ਚਲ ਰਿਹਾ ਹੈ ਜਿਥੇ ਹੁਣ ਕਾਂਗਰਸੀ ਆਗੂ ਨਿਰਾਸ਼ ਹੋ ਰਹੇ ਹਨ। ਜਿਨ੍ਹਾਂ ਕੋਲ ਅਜੇ ਸਿਆਸਤ ਵਿਚ ਰਹਿਣ ਦਾ ਸਮਾਂ ਹੈ, ਉਨ੍ਹਾਂ ਵਿਚੋਂ ਕਈਆਂ ਨੂੰ ਜਾਪਦਾ ਹੈ ਕਿ ਜਿਸ ਤਰ੍ਹਾਂ ਪੰਜਾਬ ਕਾਂਗਰਸ (Punjab Congress) ਚਲ ਰਹੀ ਹੈ, ਉਹ ਪੁਰਾਣੀ ਕਾਂਗਰਸੀ ਸੋਚ ਹੈ ਜੋ ਅਪਣੇ ਵਾਅਦੇ ਪੰਜ ਸਾਲ ਦੇ ਅੰਦਰ ਪੂਰੇ ਕਰਨ ਵਿਚ ਵਿਸ਼ਵਾਸ ਨਹੀਂ ਕਰਦੀ।
Punjab Congress
ਜੋ ਬਗ਼ਾਵਤ ਕਾਂਗਰਸ ਵਿਚ ਹੋਈ ਹੈ, ਉਹ ਵੀ ਇਸ ਰਵਾਇਤੀ ਪਹੁੰਚ ਵਿਰੁਧ ਬਗ਼ਾਵਤ ਹੈ। ਜਿਸ ਤਰ੍ਹਾਂ ਦਿੱਲੀ ਵਿਚ ਬਾਗ਼ੀਆਂ ਦੀਆਂ ਗੱਲਾਂ ਸੁਣ ਕੇ ਹੱਲ ਕੱਢੇ ਜਾ ਰਹੇ ਹਨ, ਸਾਫ਼ ਹੈ ਕਿ ਅੱਜ ਵੀ ਸੋਨੀਆ ਗਾਂਧੀ (Sonia Gandhi) ਦਾ ਹੀ ਰਾਜ ਚਲ ਰਿਹਾ ਹੈ। ਦੇਸ਼ ਵਿਚ ਤੇ ਪੰਜਾਬ ਵਿਚ ਨੌਜਵਾਨ ਕਾਂਗਰਸੀਆਂ ਦੀ ਨਵੀਂ ਰਾਜਨੀਤੀ, ਪੁਰਾਣੇ ਕਾਂਗਰਸੀਆਂ ਦੇ ਰਵਾਇਤੀ ਸਿਸਟਮ ਸਾਹਮਣੇ ਹਾਰ ਰਹੀ ਹੈ।
Sonia Gandhi
ਹੁਣ ਜਿਸ ਤਰ੍ਹਾਂ ਪ੍ਰਗਟ ਸਿੰਘ (Pargat Singh) ਵਲੋਂ ਮੁੱਖ ਮੰਤਰੀ ਵਿਰੁਧ ਬਗ਼ਾਵਤ ਹੋ ਰਹੀ ਹੈ, ਇਹ ਗੱਲ ਸਾਫ਼ ਹੈ ਕਿ ਉਹ ਵੀ ਕਾਂਗਰਸ ਤੋਂ ਨਿਰਾਸ਼ ਹੋ ਕੇ ਤੀਜੇ ਧੜੇ ਵਲ ਜਾ ਰਹੇ ਹਨ। ਕਿਉਂਕਿ ਨਵਜੋਤ ਸਿੰਘ ਸਿੱਧੂ (Navjot Sidhu) ਵਲੋਂ ਬਗ਼ਾਵਤ ਦੇ ਬਾਵਜੂਦ ਕਿਉਂਕਿ ਕਾਂਗਰਸ ਵਿਚ ਰਹਿਣ ਦਾ ਫ਼ੈਸਲਾ ਲੈ ਲਿਆ ਗਿਆ ਹੈ, ਤੀਜੇ ਧੜੇ ਦੇ ਬਚਾਅ ਦਾ ਜ਼ਿੰਮਾ ਹਾਕੀ ਕਪਤਾਨ ਪ੍ਰਗਟ ਸਿੰਘ ਦੇ ਮੋਢਿਆਂ ਤੇ ਪੈ ਸਕਦਾ ਹੈ। ਕਈ ਅੰਦਰੂਨੀ ਸਰਵੇਖਣ ਵੀ ਇਸ ਬਗ਼ਾਵਤ ਨੂੰ ਸਮਰਥਨ ਦੇ ਰਹੇ ਹਨ ਤੇ ਦਸ ਰਹੇ ਹਨ ਕਿ ਦੋਵੇਂ ਰਵਾਇਤੀ ਪਾਰਟੀਆਂ ਜੇ ਅੱਜ ਦੇ ਦਿਨ ਲੋਕਾਂ ਵਿਚ ਜਾਣਗੀਆਂ ਤਾਂ ਦੋਹਾਂ ਨੂੰ ਹੀ ਲੋਕਾਂ ਦੀ ਵਿਰੋਧਤਾ ਦਾ ਸਾਹਮਣਾ ਕਰਨ ਪਵੇਗਾ।
Pargat Singh
ਕੁਲ ਮਿਲਾ ਕੇ ਪੰਜਾਬ ਅੱਜ 2017 ਵਾਲੇ ਸਮੇਂ ਵਿਚ ਆ ਖੜਾ ਹੋਇਆ ਹੈ ਜਿਥੇ ਮੁੱਦੇ ਤਾਂ ਉਹੀ ਪਹਿਲਾਂ ਵਾਲੇ ਹੀ ਹਨ ਪਰ ਰਵਾਇਤੀ ਪਾਰਟੀਆਂ ਤੋਂ ਇਸ ਵਾਰ ਉਮੀਦ ਪੂਰੀ ਤਰ੍ਹਾਂ ਖ਼ਤਮ ਹੋ ਗਈ ਹੈ। ਭਾਵੇਂ ਇਹ ਕਾਂਗਰਸ ਲਈ ਖ਼ਾਤਮੇ ਦੇ ਸਪੱਸ਼ਟ ਸੰਕੇਤ ਹਨ, ਇਹ ਖੇਤਰੀ ਪੱਧਰ ਤੇ ਕਾਂਗਰਸ ਦਾ ਦੇਸ਼ ਨੂੰ ਇਕ ਨਵਾਂ ਤੋਹਫ਼ਾ ਜਾਪਦਾ ਹੈ।
Jyotirayditya Sindia
ਹੁਣ ਰਾਸ਼ਟਰੀ ਸੋਚ ਵਿਰੁਧ ਖੇਤਰੀ ਸੋਚ ਬਲਵਾਨ ਹੋ ਰਹੀ ਹੈ ਤੇ ਇਹੀ ਆਗੂ ਹੁਣ ਕਾਂਗਰਸ ਛੱਡ ਕੇ ਜਾ ਰਹੇ ਹਨ। ਕਾਂਗਰਸ ਹਾਈ ਕਮਾਂਡ ਯੁਵਾ ਆਗੂਆਂ ਦੀ ਰਾਜਨੀਤੀ ਦੇ ਚੱਕਰ ਨੂੰ ਸਮਝਣ ਵਿਚ ਬਿਲਕੁਲ ਨਾਕਾਮਯਾਬ ਹੋ ਗਿਆ ਹੈ ਤੇ ਇਸ ਦਾ ਅਸਰ ਹੁਣ ਆਉਣ ਵਾਲੇ ਸਮੇਂ ਵਿਚ ਪੰਜਾਬ ਵਿਚ ਵੀ ਵੇਖਣ ਨੂੰ ਮਿਲ ਸਕਦਾ ਹੈ। ਜੋਤੀਰਾਜ ਸਿੰਧੀਆ, ਜਤਿਨ ਤੇ ਹੋਰਨਾਂ ਵਾਂਗ ਯੂਥ ਬ੍ਰਿਗੇਡ ਤਾਂ ਹੁਣ ਕਾਂਗਰਸ ਛੱਡ ਜਾਵੇਗਾ ਪਰ ਕਾਂਗਰਸ ਵਿਚ ਜੰਮੇ ਪਲੇ ਕਪਿਲ ਸਿੱਬਲ, ਸੁਖਜਿੰਦਰ ਰੰਧਾਵਾ ਵਰਗੇ ਸਿਆਸਤਦਾਨਾਂ ਦਾ ਕੀ ਬਣੇਗਾ? ਪਾਰਟੀ ਨਾਲ ਪੁਰਾਣੀ ਵਫ਼ਾਦਾਰੀ ਉਨ੍ਹਾਂ ਦੇ ਸਿਆਸੀ ਭਵਿੱਖ ਨੂੰ ਲੈ ਕੇ ਇਕ ਵੱਡਾ ਸਵਾਲ ਛੱਡ ਜਾਵੇਗੀ।
-ਨਿਮਰਤ ਕੌਰ
