ਕਿਹਾ, ਨਾ 26/11 ਭੁੱਲੇ ਹਾਂ, ਨਾ 7/10 ਭੁੱਲਾਂਗੇ
ਯੇਰੂਸ਼ਲਮ: ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਬੁੱਧਵਾਰ ਨੂੰ ਦੋ ਦਿਨਾਂ ਦੇ ਸਰਕਾਰੀ ਦੌਰੇ ਲਈ ਇਜ਼ਰਾਈਲ ਪਹੁੰਚੇ। ਪ੍ਰਧਾਨ ਮੰਤਰੀ ਮੋਦੀ ਬੇਨ ਗੁਰੀਅਨ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਉਤਰੇ, ਜਿੱਥੇ ਉਨ੍ਹਾਂ ਦਾ ਸਵਾਗਤ ਬੈਂਜਾਮਿਨ ਨੇਤਨਯਾਹੂ ਅਤੇ ਉਨ੍ਹਾਂ ਦੀ ਪਤਨੀ ਸਾਰਾ ਨੇ ਕੀਤਾ। ਇਜ਼ਰਾਇਲੀ ਸੰਸਦ ਨੇਸੈੱਟ ਨੂੰ ਸੰਬੋਧਨ ਕਰਨ ਵਾਲੇ ਨਰਿੰਦਰ ਮੋਦੀ ਪਹਿਲੇ ਭਾਰਤੀ ਪ੍ਰਧਾਨ ਮੰਤਰੀ ਹਨ। ਉਨ੍ਹਾਂ ਨੇ ਭਾਰਤ-ਇਜ਼ਰਾਈਲ ਸਬੰਧਾਂ ਬਾਰੇ ਕਈ ਮਹੱਤਵਪੂਰਨ ਨੁਕਤੇ ਉਠਾਏ। ਮੋਦੀ ਬੁੱਧਵਾਰ ਨੂੰ ਤੇਲ ਅਵੀਵ ਪਹੁੰਚੇ ਅਤੇ ਹਵਾਈ ਅੱਡੇ ’ਤੇ ਇਜ਼ਰਾਇਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦੁਆਰਾ ਉਨ੍ਹਾਂ ਦਾ ਨਿੱਘਾ ਸਵਾਗਤ ਕੀਤਾ ਗਿਆ। ਅਪਣੇ ਸੰਬੋਧਨ ਵਿਚ ਮੋਦੀ ਨੇ ਕਿਹਾ, ‘‘26/11 ਦਾ ਅੱਤਵਾਦੀ ਹਮਲਾ ਭਾਰਤ ਵਿਚ ਹੋਇਆ ਸੀ, ਜਿਸ ਵਿਚ ਇਜ਼ਰਾਈਲੀ ਨਾਗਰਿਕ ਵੀ ਮਾਰਿਆ ਗਿਆ ਸੀ। ਅਸੀਂ ਨਾ ਤਾਂ 26/11 ਦੇ ਅਤਿਵਾਦੀ ਹਮਲੇ ਨੂੰ ਭੁੱਲੇ ਹਾਂ ਅਤੇ ਨਾ ਹੀ ਅਸੀਂ 7/10 ਦੇ ਹਮਲਿਆਂ ਨੂੰ ਭੁੱਲਾਂਗੇ। ਭਾਰਤ ਸ਼ਾਂਤੀ ਵੱਲ ਹਰ ਕਦਮ ਦਾ ਸਮਰਥਨ ਕਰਦਾ ਹੈ।’’ ਮੋਦੀ ਨੇ ਕਿਹਾ, ‘‘ਕੋਈ ਵੀ ਕਾਰਨ ਨਾਗਰਿਕਾਂ ਦੀ ਹੱਤਿਆ ਨੂੰ ਜਾਇਜ਼ ਨਹੀਂ ਠਹਿਰਾ ਸਕਦਾ। ਕੁੱਝ ਵੀ ਅਤਿਵਾਦ ਨੂੰ ਜਾਇਜ਼ ਨਹੀਂ ਠਹਿਰਾ ਸਕਦਾ। ਭਾਰਤ ਨੇ ਵੀ ਲੰਬੇ ਸਮੇਂ ਤੋਂ ਅਤਿਵਾਦ ਦਾ ਦਰਦ ਝੱਲਿਆ ਹੈ। ਤੁਹਾਡੇ ਵਾਂਗ, ਸਾਡੀ ਵੀ ਅਤਿਵਾਦ ਪ੍ਰਤੀ ਜ਼ੀਰੋ-ਟੌਲਰੈਂਸ ਨੀਤੀ ਹੈ, ਜਿਸ ਵਿਚ ਕੋਈ ਦੋਹਰਾ ਮਾਪਦੰਡ ਨਹੀਂ ਹੈ।’’ ਉਨ੍ਹਾਂ ਕਿਹਾ, ‘‘ਇਸ ਮਹਾਨ ਸਦਨ ਦੇ ਸਾਹਮਣੇ ਖੜ੍ਹਾ ਹੋਣਾ ਮੇਰੇ ਲਈ ਸਨਮਾਨ ਵਾਲੀ ਗੱਲ ਹੈ। ਮੈਂ ਭਾਰਤ ਦੇ ਪ੍ਰਧਾਨ ਮੰਤਰੀ ਅਤੇ ਪ੍ਰਾਚੀਨ ਸਭਿਅਤਾ ਦੇ ਪ੍ਰਤੀਨਿਧ ਵਜੋਂ, ਦੂਜੀ ਸਭਿਅਤਾ ਨੂੰ ਸੰਬੋਧਨ ਕਰਦੇ ਹੋਏ ਅਜਿਹਾ ਕਰ ਰਿਹਾ ਹਾਂ। ਮੈਂ ਅਪਣੇ ਨਾਲ 1.4 ਅਰਬ ਭਾਰਤੀਆਂ ਦੀਆਂ ਸ਼ੁਭਕਾਮਨਾਵਾਂ ਅਤੇ ਦੋਸਤੀ, ਸਤਿਕਾਰ ਅਤੇ ਭਾਈਵਾਲੀ ਦਾ ਸੰਦੇਸ਼ ਲੈ ਕੇ ਆਇਆ ਹਾਂ।’’ ਸੰਸਦ ਵਿਚ, ਪ੍ਰਧਾਨ ਮੰਤਰੀ ਮੋਦੀ ਨੇ ਪਹਿਲੇ ਵਿਸ਼ਵ ਯੁੱਧ ਨੂੰ ਯਾਦ ਕਰਦਿਆਂ ਕਿਹਾ, ‘‘ਭਾਰਤ ਦਾ ਇਸ ਧਰਤੀ ਨਾਲ ਰਿਸ਼ਤਾ ਖੂਨ ਅਤੇ ਕੁਰਬਾਨੀ ਦਾ ਵੀ ਜੁੜਿਆ ਹੋਇਆ ਹੈ। ਪਹਿਲੇ ਵਿਸ਼ਵ ਯੁੱਧ ਦੌਰਾਨ, ਇਸ ਪੂਰੇ ਖੇਤਰ ਵਿਚ 4,000 ਤੋਂ ਵੱਧ ਭਾਰਤੀ ਸੈਨਿਕਾਂ ਨੇ ਅਪਣੀਆਂ ਜਾਨਾਂ ਦਿਤੀਆਂ।’’ ਉਨ੍ਹਾਂ ਨੇ ਜੋਧਪੁਰ ਲੈਂਸਰਜ਼ ਦੇ ਬ੍ਰਿਟਿਸ਼ ਭਾਰਤੀ ਫ਼ੌਜ ਦੇ ਅਧਿਕਾਰੀ ਮੇਜਰ ਠਾਕੁਰ ਦਲਪਤ ਸਿੰਘ ਦੀ ਬਹਾਦਰੀ ਦਾ ਵੀ ਜ਼ਿਕਰ ਕੀਤਾ। ਪ੍ਰਧਾਨ ਮੰਤਰੀ ਨੇ ਕਿਹਾ, ‘‘ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਦੁਆਰਾ ਪ੍ਰਵਾਨਤ ਗਾਜ਼ਾ ਸ਼ਾਂਤੀ ਪਹਿਲਕਦਮੀ, ਅੱਗੇ ਵਧਣ ਦਾ ਰਸਤਾ ਪੇਸ਼ ਕਰਦੀ ਹੈ। ਭਾਰਤ ਨੇ ਇਸ ਪਹਿਲਕਦਮੀ ਲਈ ਅਪਣਾ ਦ੍ਰਿੜ ਸਮਰਥਨ ਪ੍ਰਗਟ ਕੀਤਾ ਹੈ। ਸਾਡਾ ਮੰਨਣਾ ਹੈ ਕਿ ਇਹ ਖੇਤਰ ਦੇ ਸਾਰੇ ਲੋਕਾਂ ਲਈ ਨਿਆਂਪੂਰਨ ਅਤੇ ਸਥਾਈ ਸ਼ਾਂਤੀ ਦਾ ਵਾਅਦਾ ਰੱਖਦਾ ਹੈ, ਜਿਸ ਵਿਚ ਫਲਸਤੀਨੀ ਮੁੱਦੇ ਦਾ ਹੱਲ ਵੀ ਸ਼ਾਮਲ ਹੈ। ਸ਼ਾਂਤੀ ਦਾ ਰਸਤਾ ਹਮੇਸ਼ਾ ਆਸਾਨ ਨਹੀਂ ਹੁੰਦਾ, ਪਰ ਭਾਰਤ ਖੇਤਰ ਵਿਚ ਗੱਲਬਾਤ, ਸ਼ਾਂਤੀ ਅਤੇ ਸਥਿਰਤਾ ਦਾ ਸਮਰਥਨ ਕਰਨ ਵਿਚ ਤੁਹਾਡੇ ਅਤੇ ਦੁਨੀਆ ਦੇ ਨਾਲ ਖੜ੍ਹਾ ਹੈ।’’
ਇਹ ਮੋਦੀ ਦੀ ਜੱਫ਼ੀ ਹੈ : ਨੇਤਨਯਾਹੂ
ਬੈਂਜਾਮਿਨ ਨੇਤਨਯਾਹੂ ਨੇ ਭਾਰਤ ਦੀ ਬਹੁਤ ਸ਼ਲਾਘਾ ਕੀਤੀ। ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਨੇ ਕਿਹਾ, ‘‘ਮੈਂ ਅੱਜ ਇੱਥੇ ਮੋਦੀ ਦੀ ਮੌਜੂਦਗੀ ਤੋਂ ਬਹੁਤ ਖੁਸ਼ ਹਾਂ। ਮੈਂ ਤੁਹਾਨੂੰ ਇੱਥੇ ਪਾ ਕੇ ਕਦੇ ਵੀ ਇੰਨਾ ਖੁਸ਼ ਨਹੀਂ ਹੋਇਆ ਜਿੰਨਾ ਮੈਂ ਇਜ਼ਰਾਈਲ ਦੇ ਇਕ ਮਹਾਨ ਦੋਸਤ ਅਤੇ ਵਿਸ਼ਵ ਮੰਚ ’ਤੇ ਇਕ ਮਹਾਨ ਨੇਤਾ ਵਜੋਂ ਹਾਂ। ਮੇਰੇ ਪਿਆਰੇ ਦੋਸਤ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਤੁਹਾਡੇ ਵਿਸ਼ੇਸ਼ ਵਫ਼ਦ ਦਾ ਯਰੂਸ਼ਲਮ ਵਿਚ ਸਵਾਗਤ ਹੈ।’ ਮੋਦੀ ਦੋਸਤ ਨਹੀਂ, ਪਰ ਮੇਰਾ ਭਰਾ ਹੈ।’’ ਬੈਂਜਾਮਿਨ ਨੇਤਨਯਾਹੂ ਨੇ ਕਿਹਾ, ‘‘ਅੱਜ, ਜਿਵੇਂ ਹੀ ਤੁਸੀਂ ਹਵਾਈ ਅੱਡੇ ’ਤੇ ਪੌੜੀਆਂ ਤੋਂ ਹੇਠਾਂ ਆਏ, ਅਸੀਂ ਇਕ ਦੂਜੇ ਨੂੰ ਜੱਫੀ ਪਾਈ। ਪ੍ਰਧਾਨ ਮੰਤਰੀ ਮੋਦੀ ਦੀ ਜੱਫੀ ਕੁਝ ਖਾਸ ਹੈ। ਇਸ ਨੂੰ ਮੋਦੀ ਜੱਫੀ ਕਿਹਾ ਜਾਂਦਾ ਹੈ। ਇਹ ਪੂਰੀ ਦੁਨੀਆ ਵਿਚ ਮਸ਼ਹੂਰ ਹੈ।’’
