Frank Caprio Death News: ਕੈਂਸਰ ਕਾਰਨ 88 ਸਾਲ ਦੀ ਉਮਰ ਵਿਚ ਲਏ ਆਖ਼ਰੀ ਸਾਹ
Frank Caprio Death News in punjabi : ਵਿਸ਼ਵ ਪ੍ਰਸਿੱਧ ਜੱਜ ਫ੍ਰੈਂਕ ਕੈਪਰੀਓ ਦਾ ਦਿਹਾਂਤ ਹੋ ਗਿਆ ਹੈ। ਪੈਨਕ੍ਰੀਆਟਿਕ ਕੈਂਸਰ ਨਾਲ ਲੰਬੀ ਲੜਾਈ ਤੋਂ ਬਾਅਦ, ਜੱਜ ਫ੍ਰੈਂਕ ਕੈਪਰੀਓ ਨੇ 88 ਸਾਲ ਦੀ ਉਮਰ ਵਿੱਚ ਆਖ਼ਰੀ ਸਾਹ ਲਏ। ਦਸੰਬਰ 2023 ਵਿੱਚ ਉਨ੍ਹਾਂ ਨੂੰ ਪੈਨਕ੍ਰੀਆਟਿਕ ਕੈਂਸਰ ਦਾ ਪਤਾ ਲੱਗਿਆ ਅਤੇ ਉਨ੍ਹਾਂ ਨੇ ਮਈ 2024 ਵਿੱਚ ਕੀਮੋਥੈਰੇਪੀ ਅਤੇ ਰੇਡੀਏਸ਼ਨ ਕੋਰਸ ਪੂਰਾ ਕੀਤਾ, ਪਰ ਉਮਰ ਨਾਲ ਸਬੰਧਤ ਸਮੱਸਿਆਵਾਂ ਕਾਰਨ, ਉਹ ਠੀਕ ਨਹੀਂ ਹੋ ਸਕੇ ਅਤੇ ਉਨ੍ਹਾਂ ਦਾ ਦਿਹਾਂਤ ਹੋ ਗਿਆ। ਉਨ੍ਹਾਂ ਦੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਇੱਕ ਪੋਸਟ ਲਿਖ ਕੇ ਦੁਨੀਆ ਨੂੰ ਉਨ੍ਹਾਂ ਦੀ ਮੌਤ ਬਾਰੇ ਸੂਚਿਤ ਕੀਤਾ ਗਿਆ।
ਜਿੱਥੇ ਪੂਰਾ ਅਮਰੀਕਾ ਫਰੈਂਕ ਕੈਪਰੀਓ ਦੀ ਮੌਤ 'ਤੇ ਸੋਗ ਮਨਾ ਰਿਹਾ ਹੈ, ਉੱਥੇ ਹੀ ਦੁਨੀਆ ਭਰ ਤੋਂ ਸ਼ੋਕ ਸੰਦੇਸ਼ ਆ ਰਹੇ ਹਨ। ਫਰੈਂਕ ਕੈਪਰੀਓ ਅਦਾਲਤ ਵਿੱਚ ਆਪਣੇ ਹਾਸੇ-ਮਜ਼ਾਕ ਵਾਲੇ ਸੁਭਾਅ, ਹਲਕੀਆਂ-ਫੁਲਕੀਆਂ ਸੁਣਵਾਈਆਂ, ਹਮਦਰਦੀ ਅਤੇ ਮਨੁੱਖੀ ਰਵੱਈਏ ਨਾਲ ਲਏ ਗਏ ਫ਼ੈਸਲਿਆਂ ਲਈ ਜਾਣੇ ਜਾਂਦੇ ਸਨ।
ਨਿਆਂ ਦੀ ਦੁਨੀਆ ਵਿੱਚ ਉਨ੍ਹਾਂ ਦੇ ਯੋਗਦਾਨ ਨੂੰ "ਕੱਚ ਇਨ ਪ੍ਰੋਵੀਡੈਂਸ" ਨਾਮਕ ਇੱਕ ਸ਼ੋਅ ਰਾਹੀਂ ਦਰਸਾਇਆ ਗਿਆ ਸੀ। ਜੱਜ ਕੈਪਰੀਓ ਨੇ ਸਭ ਤੋਂ ਦਿਆਲੂ ਜੱਜ ਹੋਣ ਅਤੇ ਪੀੜਤ ਨੂੰ ਨਿਆਂ ਦੇਣ ਦੇ ਆਪਣੇ ਵਿਲੱਖਣ ਅੰਦਾਜ਼ ਲਈ ਦੁਨੀਆ ਭਰ ਵਿੱਚ ਪ੍ਰਸਿੱਧੀ ਪ੍ਰਾਪਤ ਕੀਤੀ।
ਪਿਛਲੇ ਕਈ ਸਾਲਾਂ ਤੋਂ, ਅਦਾਲਤ ਦੇ ਕਮਰੇ ਵਿੱਚ ਕੇਸਾਂ ਦੀ ਸੁਣਵਾਈ ਦੌਰਾਨ ਉਨ੍ਹਾਂ ਦੇ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਏ ਸਨ, ਜਿਸ ਵਿੱਚ ਉਹ ਆਮ ਲੋਕਾਂ ਨਾਲ ਹਮਦਰਦੀ ਭਰੇ ਢੰਗ ਨਾਲ ਗੱਲਬਾਤ ਕਰਦੇ ਅਤੇ ਸੰਵੇਦਨਸ਼ੀਲ ਫ਼ੈਸਲੇ ਦਿੰਦੇ ਦਿਖਾਈ ਦੇ ਰਹੇ ਸਨ। ਲੋਕ ਉਨ੍ਹਾਂ ਨੂੰ ਯਾਦ ਕਰ ਰਹੇ ਹਨ ਅਤੇ ਸ਼ੋਕ ਸੰਦੇਸ਼ ਲਿਖ ਰਹੇ ਹਨ।
ਉਨ੍ਹਾਂ ਦੀ ਮੌਤ ਤੋਂ ਬਾਅਦ, ਅਮਰੀਕਾ ਦੇ ਰ੍ਹੋਡ ਆਈਲੈਂਡ ਵਿੱਚ ਸਾਰੀਆਂ ਸਰਕਾਰੀ ਇਮਾਰਤਾਂ 'ਤੇ ਝੰਡੇ ਅੱਧੇ ਝੁਕਾ ਦਿੱਤੇ ਗਏ ਹਨ। ਉਨ੍ਹਾਂ ਦੇ ਸਨਮਾਨ ਵਿੱਚ, ਅਮਰੀਕਾ ਵਿੱਚ ਪ੍ਰੋਵੀਡੈਂਸ ਮਿਉਂਸਪਲ ਕੋਰਟਰੂਮ ਨੂੰ 'ਦ ਚੀਫ਼ ਜੱਜ ਫਰੈਂਕ ਕੈਪਰੀਓ ਕੋਰਟਰੂਮ' ਦਾ ਨਾਮ ਦਿੱਤਾ ਗਿਆ ਹੈ। ਫ੍ਰੈਂਕ ਕੈਪਰੀਓ ਅਮਰੀਕਾ ਵਿੱਚ ਪ੍ਰੋਵੀਡੈਂਸ ਮਿਊਂਸੀਪਲ ਕੋਰਟ ਦੇ ਜੱਜ ਸਨ ਅਤੇ ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਦੇ 38 ਸਾਲ ਅਮਰੀਕੀ ਕਾਨੂੰਨ ਪ੍ਰਣਾਲੀ ਨੂੰ ਦਿੱਤੇ। ਉਹ 1985 ਤੋਂ 2023 ਤੱਕ ਅਮਰੀਕੀ ਨਿਆਂਪਾਲਿਕਾ ਦਾ ਹਿੱਸਾ ਰਹੇ।
ਉਨ੍ਹਾਂ ਨੂੰ 'ਦੁਨੀਆ ਦੇ ਸਭ ਤੋਂ ਦਿਆਲੂ ਜੱਜ' ਦਾ ਖ਼ਿਤਾਬ ਮਿਲਿਆ ਹੈ। ਉਨ੍ਹਾਂ ਦਾ ਜਨਮ ਪ੍ਰੋਵੀਡੈਂਸ, ਰ੍ਹੋਡ ਆਈਲੈਂਡ ਵਿੱਚ ਹੋਇਆ ਸੀ। ਉਨ੍ਹਾਂ ਦਾ ਪਰਿਵਾਰ ਮੂਲ ਰੂਪ ਵਿੱਚ ਇਟਲੀ ਤੋਂ ਸੀ। ਉਨ੍ਹਾਂ ਦੇ ਪਿਤਾ ਦਾ ਨਾਮ ਐਂਟੋਨੀਓ ਕੈਪਰੀਓ ਸੀ, ਜੋ ਫਲ ਅਤੇ ਦੁੱਧ ਵੇਚਦੇ ਸਨ। ਉਨ੍ਹਾਂ ਦੀ ਮਾਂ ਦਾ ਨਾਮ ਫਿਲਾਮੇਨਾ ਕੈਪਰੀਓ ਸੀ। ਸਕੂਲ ਦੀ ਪੜ੍ਹਾਈ ਦੌਰਾਨ, ਉਨ੍ਹਾਂ ਨੂੰ ਕੁਸ਼ਤੀ ਦਾ ਸ਼ੌਕ ਸੀ। 1953 ਵਿੱਚ, ਉਹ ਸਟੇਟ ਕੁਸ਼ਤੀ ਚੈਂਪੀਅਨ ਬਣੇ। 1958 ਵਿੱਚ ਗ੍ਰੈਜੂਏਸ਼ਨ ਤੋਂ ਬਾਅਦ, ਉਨ੍ਹਾਂ ਨੇ ਬੋਸਟਨ ਲਾਅ ਯੂਨੀਵਰਸਿਟੀ ਤੋਂ ਡਿਗਰੀ ਪ੍ਰਾਪਤ ਕੀਤੀ। ਦਿਨ ਵੇਲੇ ਉਹ ਭਾਂਡੇ ਧੋਂਦੇ, ਜੁੱਤੀਆਂ ਪਾਲਿਸ਼ ਕਰਦੇ ਅਤੇ ਅਖ਼ਬਾਰ ਵੰਡ ਕੇ ਪੈਸੇ ਕਮਾਉਂਦੇ ਸਨ ਅਤੇ ਰਾਤ ਨੂੰ ਪੜ੍ਹਾਈ ਕਰਦੇ ਸਨ।
(For more news apart from “Frank Caprio Death News in punjabi ” stay tuned to Rozana Spokesman.)
