ਰਖਿਆ ਮੰਤਰੀ ਬੋਲੇ, ਮਤਲਬ ਨਿਕਲਣ 'ਤੇ ਟਾਇਲਟ ਪੇਪਰ ਵਾਂਗ ਸੁਟਿਆ
ਇਸਲਾਮਾਬਾਦ: ਪਾਕਿਸਤਾਨ ਦੇ ਰੱਖਿਆ ਮੰਤਰੀ ਖਵਾਜਾ ਆਸਿਫ ਨੇ ਅਮਰੀਕਾ ਨੂੰ ਲੈ ਕੇ ਸੰਸਦ ਵਿਚ ਵੱਡਾ ਅਤੇ ਵਿਵਾਦਿਤ ਬਿਆਨ ਦਿਤਾ ਹੈ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਨੇ ਅਫਗਾਨ ਯੁੱਧਾਂ ਦੌਰਾਨ ਪਾਕਿਸਤਾਨ ਦਾ ਇਸਤੇਮਾਲ ਟਾਇਲੇਟ ਪੇਪਰ ਵਾਂਗ ਕੀਤਾ ਅਤੇ ਜਦੋਂ ਕੰਮ ਖਤਮ ਹੋ ਗਿਆ ਤਾਂ ਉਸ ਨੂੰ ਸੁੱਟ ਦਿਤਾ। ਉਨ੍ਹਾਂ ਦੇ ਇਸ ਬਿਆਨ ਨਾਲ ਪਾਕਿਸਤਾਨ ਦੀ ਸਿਆਸਤ ਅਤੇ ਕੌਮਾਂਤਰੀ ਪੱਧਰ ਤੇ ਹਲਚਲ ਮਚ ਗਈ ਹੈ।
ਖਵਾਜਾ ਆਸਿਫ ਨੇ ਕਿਹਾ ਕਿ ਪਾਕਿਸਤਾਨ ਨੇ ਅਫਗਾਨਿਸਤਾਨ ਵਿਚ ਹੋਏ ਦੋਵੇਂ ਵੱਡੀਆਂ ਜੰਗਾਂ ਵਿਚ ਹਿੱਸਾ ਲਿਆ, ਪਰ ਇਹ ਫੈਸਲਾ ਦੇਸ਼ ਦੇ ਹਿੱਤ ਵਿਚ ਨਹੀਂ ਸੀ । ਉਨ੍ਹਾਂ ਮੰਨਿਆ ਕਿ ਪਾਕਿਸਤਾਨ ਨੇ ਦੂਜਿਆਂ ਦੀ ਲੜਾਈ ਅਪਣੇ ਸਿਰ ਲੈ ਲਈ, ਜਿਸ ਦੀ ਭਾਰੀ ਕੀਮਤ ਅੱਜ ਵੀ ਦੇਸ਼ ਚੁੱਕ ਰਿਹਾ ਹੈ। ਰੱਖਿਆ ਮੰਤਰੀ ਨੇ ਕਿਹਾ ਕਿ ਪਾਕਿਸਤਾਨ ਦੇ ਹਜ਼ਾਰਾਂ ਲੋਕ ਮਾਰੇ ਗਏ, ਅਰਥਵਿਵਸਥਾ ਕਮਜ਼ੋਰ ਹੋਈ ਅਤੇ ਅਤਿਵਾਦ ਦੇਸ਼ ਦੇ ਅੰਦਰ ਤਕ ਫੈਲ ਗਿਆ।
ਉਨ੍ਹਾਂ ਸਾਫ਼ ਸ਼ਬਦਾਂ ਵਿਚ ਕਿਹਾ ਕਿ 1980 ਦੇ ਦਹਾਕੇ ਵਿਚ ਸੋਵੀਅਤ ਸੰਘ ਵਿਰੁਧ ਅਤੇ ਫਿਰ 2001 ਤੋਂ ਬਾਅਦ ਅਮਰੀਕਾ ਨਾਲ ਮਿਲ ਕੇ ਅਫਗਾਨ ਜੰਗ ਲੜਨਾ ਪਾਕਿਸਤਾਨ ਦੀ ਵੱਡੀ ਭੁੱਲ ਸੀ। ਉਨ੍ਹਾਂ ਕਿਹਾ ਕਿ ਉਸ ਸਮੇਂ ਪਾਕਿਸਤਾਨ ਨੂੰ ਜਿਹਾਦ ਦੇ ਨਾਂ ਤੇ ਅੱਗੇ ਵਧਾਇਆ ਗਿਆ ਅਤੇ ਆਮ ਲੋਕਾਂ ਨੂੰ ਲੜਾਈ ਵਿਚ ਝੋਕ ਦਿਤਾ ਗਿਆ। ਖਵਾਜਾ ਆਸਿਫ ਨੇ ਪਾਕਿਸਤਾਨ ਦੇ ਸਾਬਕਾ ਫੌਜੀ ਸੱਤਾਧਾਰੀ ਜਨਰਲ ਜ਼ਿਆ-ਉਲ-ਹੱਕ ਅਤੇ ਜਨਰਲ ਪਰਵੇਜ਼ ਮੁਸ਼ਰੱਫ ਦੀਆਂ ਨੀਤੀਆਂ ਤੇ ਵੀ ਸਵਾਲ ਉਠਾਏ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਫੈਸਲਿਆਂ ਕਾਰਨ ਪਾਕਿਸਤਾਨ ਵਿਦੇਸ਼ੀ ਤਾਕਤਾਂ ਦਾ ਮੋਹਰਾ ਬਣ ਗਿਆ ਅਤੇ ਦੇਸ਼ ਦੀ ਹਾਲਤ ਹੋਰ ਵਿਗੜਦੀ ਚਲੀ ਗਈ। ਉਨ੍ਹਾਂ ਇਹ ਵੀ ਕਿਹਾ ਕਿ ਅਮਰੀਕਾ ਨੇ ਹਮੇਸ਼ਾ ਅਪਣੇ ਫਾਇਦੇ ਲਈ ਪਾਕਿਸਤਾਨ ਦਾ ਇਸਤੇਮਾਲ ਕੀਤਾ, ਪਰ ਜਦੋਂ ਪਾਕਿਸਤਾਨ ਨੂੰ ਲੋੜ ਪਈ ਤਾਂ ਅਮਰੀਕਾ ਨੇ ਮੂੰਹ ਮੋੜ ਲਿਆ। ਖਵਾਜਾ ਆਸਿਫ ਦਾ ਕਹਿਣਾ ਹੈ ਕਿ ਹੁਣ ਪਾਕਿਸਤਾਨ ਨੂੰ ਅਪਣੀਆਂ ਗਲਤੀਆਂ ਤੋਂ ਸਬਕ ਲੈਣਾ ਚਾਹੀਦਾ ਹੈ ਅਤੇ ਭਵਿੱਖ ਵਿਚ ਕਿਸੇ ਹੋਰ ਦੀ ਲੜਾਈ ਦਾ ਹਿੱਸਾ ਨਹੀਂ ਬਣਨਾ ਚਾਹੀਦਾ। (ਏਜੰਸੀ)
