ਆਈਸੀਸੀ ਦੇ ਬੁਲਾਰੇ ਨੇ ਨਿਊਜ਼ ਏਜੰਸੀ ਪੀਟੀਆਈ ਨੂੰ ਦੱਸਿਆ ਕਿ ''ਜ਼ੈਨਬ ਨੂੰ ਡਿਪੋਰਟ ਨਹੀਂ ਕੀਤਾ ਗਿਆ ਹੈ, ਉਹ ਨਿੱਜੀ ਕਾਰਨਾਂ ਕਰ ਕੇ ਵਾਪਸ ਚਲੀ ਗਈ ਹੈ।''
ਇਸਲਾਮਾਬਾਦ - ਵਨਡੇ ਵਿਸ਼ਵ ਕੱਪ ਦਾ 11ਵਾਂ ਐਡੀਸ਼ਨ ਭਾਰਤ ਵਿਚ 5 ਅਕਤੂਬਰ ਨੂੰ ਸ਼ੁਰੂ ਹੋਇਆ ਸੀ। ਪਾਕਿਸਤਾਨ ਕ੍ਰਿਕਟ ਟੀਮ ਤੋਂ ਇਲਾਵਾ ਉੱਥੋਂ ਦੇ ਮਾਹਿਰ, ਪ੍ਰਸ਼ੰਸਕ ਅਤੇ ਐਂਕਰ ਵੀ ਟੂਰਨਾਮੈਂਟ ਲਈ ਭਾਰਤ ਆਏ ਹਨ। ਬਾਬਰ ਆਜ਼ਮ ਦੀ ਕਪਤਾਨੀ 'ਚ ਪਾਕਿਸਤਾਨੀ ਟੀਮ ਨੇ ਜਿੱਤ ਨਾਲ ਸ਼ੁਰੂਆਤ ਕੀਤੀ ਹੈ। ਉਸ ਨੇ ਆਪਣੇ ਪਹਿਲੇ ਮੈਚ ਵਿਚ ਨੀਦਰਲੈਂਡ ਨੂੰ ਹਰਾਇਆ ਹੈ। ਪਾਕਿਸਤਾਨ ਨੇ ਮੰਗਲਵਾਰ (10 ਅਕਤੂਬਰ) ਨੂੰ ਹੈਦਰਾਬਾਦ ਵਿਚ ਸ੍ਰੀਲੰਕਾ ਖ਼ਿਲਾਫ਼ ਦੂਜਾ ਮੈਚ ਖੇਡਣਾ ਹੈ। ਇਸ ਦੌਰਾਨ ਇੱਕ ਵੱਡਾ ਵਿਵਾਦ ਸਾਹਮਣੇ ਆਇਆ ਹੈ।
ਪਾਕਿਸਤਾਨ ਦੇ ਨਿਊਜ਼ ਚੈਨਲ ਸਮਾ ਟੀਵੀ ਨੇ ਖਬਰ ਦਿੱਤੀ ਸੀ ਕਿ ਪਾਕਿਸਤਾਨ ਦੀ ਮਸ਼ਹੂਰ ਐਂਕਰ ਜ਼ੈਨਬ ਅੱਬਾਸ ਨੂੰ ਵਿਸ਼ਵ ਕੱਪ ਤੋਂ ਹਟਾ ਦਿੱਤਾ ਗਿਆ ਹੈ ਅਤੇ ਉਸ ਨੂੰ ਭਾਰਤ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ। ਜ਼ੈਨਬ ਨੂੰ ਦੁਬਈ ਲਿਜਾਇਆ ਗਿਆ ਹੈ ਪਰ ਹੁਣ ਇਸ ਮਾਮਲੇ 'ਚ ਨਵੀਂ ਜਾਣਕਾਰੀ ਸਾਹਮਣੇ ਆਈ ਹੈ। ਕੌਮਾਂਤਰੀ ਕ੍ਰਿਕਟ ਕੌਂਸਲ (ਆਈਸੀਸੀ) ਨੇ ਹਾਲਾਂਕਿ ਦਾਅਵਾ ਕੀਤਾ ਹੈ ਕਿ ਜ਼ੈਨਬ ਨੇ ਨਿੱਜੀ ਕਾਰਨਾਂ ਕਰ ਕੇ ਭਾਰਤ ਛੱਡਿਆ ਹੈ।
ਆਈਸੀਸੀ ਦੇ ਬੁਲਾਰੇ ਨੇ ਨਿਊਜ਼ ਏਜੰਸੀ ਪੀਟੀਆਈ ਨੂੰ ਦੱਸਿਆ ਕਿ ''ਜ਼ੈਨਬ ਨੂੰ ਡਿਪੋਰਟ ਨਹੀਂ ਕੀਤਾ ਗਿਆ ਹੈ, ਉਹ ਨਿੱਜੀ ਕਾਰਨਾਂ ਕਰ ਕੇ ਵਾਪਸ ਚਲੀ ਗਈ ਹੈ।'' ਜ਼ੈਨਬ ਪਿਛਲੇ ਹਫ਼ਤੇ ਹੈਦਰਾਬਾਦ ਪਹੁੰਚੀ ਸੀ। ਹੈਦਰਾਬਾਦ ਤੋਂ ਉਸ ਨੂੰ ਉਨ੍ਹਾਂ ਸ਼ਹਿਰਾਂ ਦੀ ਯਾਤਰਾ ਕਰਨੀ ਪਈ ਜਿੱਥੇ ਪਾਕਿਸਤਾਨ ਨੇ ਖੇਡਣਾ ਸੀ, ਜਿਸ ਵਿਚ ਬੈਂਗਲੁਰੂ, ਚੇਨਈ ਅਤੇ ਅਹਿਮਦਾਬਾਦ ਸ਼ਾਮਲ ਹਨ।
ਸਮਾ ਟੀਵੀ ਨੇ ਦੱਸਿਆ ਸੀ ਕਿ ਜ਼ੈਨਬ ਨੇ ਆਪਣੇ ਟਵੀਟ ਵਿਚ ਭਾਰਤ ਦਾ ਅਪਮਾਨ ਕੀਤਾ ਹੈ। ਇਸ ਤੋਂ ਇਲਾਵਾ ਉਸ ਨੇ ਹਿੰਦੂ ਦੇਵੀ-ਦੇਵਤਿਆਂ ਦਾ ਅਪਮਾਨ ਵੀ ਕੀਤਾ। ਇਸ ਕਾਰਨ ਉਸ ਨੂੰ ਵਿਸ਼ਵ ਕੱਪ ਤੋਂ ਹਟਣਾ ਪਿਆ। ਜ਼ੈਨਬ ਨੂੰ ਆਈਸੀਸੀ ਦੀ ਪ੍ਰਸਾਰਣ ਟੀਮ ਵਿਚ ਸ਼ਾਮਲ ਕੀਤਾ ਗਿਆ ਸੀ। ਪਾਕਿਸਤਾਨ ਦੇ ਪਹਿਲੇ ਮੈਚ ਦੌਰਾਨ ਉਸ ਨੂੰ ਸਟੇਡੀਅਮ 'ਚ ਦੇਖਿਆ ਗਿਆ ਸੀ। ਇੱਥੋਂ ਤੱਕ ਕਿ ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ (ਆਈਸੀਸੀ) ਵੀ ਇਸ ਮਾਮਲੇ ਨੂੰ ਲੈ ਕੇ ਕੁਝ ਨਹੀਂ ਕਰ ਸਕੇਗੀ, ਕਿਉਂਕਿ ਇਹ ਦੇਸ਼ਾਂ ਵਿਚਾਲੇ ਵਿਵਾਦ ਹੈ। ਹੁਣ ICC ਅਧਿਕਾਰੀ ਨੇ ਇਸ ਪੂਰੇ ਮਾਮਲੇ ਦੀ ਸੱਚਾਈ ਦੱਸ ਦਿੱਤੀ ਹੈ।
ਜ਼ੈਨਬ ਲੰਬੇ ਸਮੇਂ ਤੋਂ ਕ੍ਰਿਕਟ ਦੀ ਐਂਕਰਿੰਗ ਕਰ ਰਹੀ ਹੈ ਅਤੇ ਕਈ ਵੱਡੇ ਟੂਰਨਾਮੈਂਟਾਂ 'ਚ ਨਜ਼ਰ ਆ ਚੁੱਕੀ ਹੈ। ਉਹ ਇੱਕ ਬੱਚੇ ਦੀ ਮਾਂ ਹੈ, ਪਰ ਕ੍ਰਿਕਟ ਨੂੰ ਬਹੁਤ ਸਮਰਪਿਤ ਹੈ। ਕ੍ਰਿਕੇਟ ਐਂਕਰ ਹੋਣ ਤੋਂ ਇਲਾਵਾ ਜ਼ੈਨਬ ਮੇਕਅੱਪ ਆਰਟਿਸਟ ਵੀ ਰਹਿ ਚੁੱਕੀ ਹੈ। ਉਨ੍ਹਾਂ ਦੇ ਪਿਤਾ ਨਾਸਿਰ ਅੱਬਾਸ ਕ੍ਰਿਕਟਰ ਰਹੇ ਹਨ। ਪਾਕਿਸਤਾਨ ਸਮੇਤ ਕਈ ਦੇਸ਼ਾਂ 'ਚ ਜ਼ੈਨਬ ਦੇ ਪ੍ਰਸ਼ੰਸਕ ਹਨ।
