ਹਾਦਸੇ ਤੋਂ ਬਾਅਦ 200 ਪਰਿਵਾਰ ਹੋਏ ਬੇਘਰ
ਇਸਲਾਮਾਬਾਦ : ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ 'ਚ ਭੂਚਾਲ ਨੇ ਬਹੁਤ ਤਬਾਹੀ ਮਚਾਈ ਹੈ। ਖੁਜਦਾਰ ਜ਼ਿਲ੍ਹੇ ਵਿੱਚ 5.2 ਤੀਬਰਤਾ ਦੇ ਭੂਚਾਲ ਤੋਂ ਬਾਅਦ ਘੱਟੋ-ਘੱਟ 80 ਘਰ ਢਹਿ-ਢੇਰੀ ਹੋ ਗਏ, ਜਿਸ ਨਾਲ 200 ਤੋਂ ਵੱਧ ਪਰਿਵਾਰ ਬੇਘਰ ਹੋ ਗਏ ਹਨ। ਮੌਸਮ ਵਿਭਾਗ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਭੂਚਾਲ ਦਾ ਕੇਂਦਰ ਔਰੰਗੀ ਨੇੜੇ ਸੀ। ਸ਼ੁੱਕਰਵਾਰ ਸਵੇਰੇ 11.55 ਵਜੇ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਅਧਿਕਾਰੀਆਂ ਨੇ ਦੱਸਿਆ ਕਿ ਭੂਚਾਲ ਦੇ ਝਟਕੇ ਅੱਧੇ ਮਿੰਟ ਤੱਕ ਮਹਿਸੂਸ ਕੀਤੇ ਗਏ। ਭੂਚਾਲ ਦੇ ਝਟਕਿਆਂ ਤੋਂ ਬਾਅਦ ਲੋਕ ਘਰਾਂ ਤੋਂ ਬਾਹਰ ਆ ਗਏ। ਵੱਡੇ ਝਟਕਿਆਂ ਤੋਂ ਬਾਅਦ ਥੋੜ੍ਹੇ-ਥੋੜ੍ਹੇ ਸਮੇਂ 'ਚ ਇਲਾਕੇ 'ਚ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।
Earthquake
ਖੁਜਦਾਰ ਦੇ ਡਿਪਟੀ ਕਮਿਸ਼ਨਰ, ਸੇਵਾਮੁਕਤ ਮੇਜਰ ਇਲਿਆਸ ਕਿਬਜ਼ਈ ਨੇ ਦੱਸਿਆ, "ਭੂਚਾਲ ਨਾਲ ਔਰਨਾਜ਼ੀ ਦਾ ਇੱਕ ਵੱਡਾ ਖੇਤਰ ਪ੍ਰਭਾਵਿਤ ਹੋਇਆ ਹੈ। ਭੂਚਾਲ ਕਾਰਨ 80 ਤੋਂ ਵੱਧ ਘਰ ਢਹਿ-ਢੇਰੀ ਹੋ ਗਏ, ਜਦਕਿ 260 ਦੇ ਕਰੀਬ ਘਰਾਂ 'ਚ ਵੱਡੀਆਂ ਤਰੇੜਾਂ ਆ ਗਈਆਂ। ਬਹੁਤੇ ਘਰ ਕੱਚੇ ਹੀ ਬਣੇ ਹੋਏ ਸਨ। ਵਾਧ ਤਹਿਸੀਲ ਦੇ ਨਾਲ, ਜਾਮਰੀ, ਬਾਰੰਗ ਅਤੇ ਨਚਕਨ ਸੋਨਾਰੋ ਲਾਠੀ ਪਿੰਡਾਂ ਨੂੰ ਵੀ ਭੂਚਾਲ ਨਾਲ ਨੁਕਸਾਨ ਪਹੁੰਚਿਆ ਹੈ।
earthquake shakes balochistan
ਕਿਬਜ਼ਈ ਨੇ ਅੱਗੇ ਕਿਹਾ ਕਿ ਖੁਸ਼ਕਿਸਮਤੀ ਨਾਲ ਭੂਚਾਲ ਕਾਰਨ ਕਿਸੇ ਦੀ ਮੌਤ ਨਹੀਂ ਹੋਈ ਕਿਉਂਕਿ ਜ਼ਿਆਦਾਤਰ ਲੋਕ ਕੰਮ ਲਈ ਆਪਣੇ ਘਰਾਂ ਤੋਂ ਬਾਹਰ ਸਨ ਅਤੇ ਘਰ ਵਿੱਚ ਮੌਜੂਦ ਲੋਕ ਤੁਰੰਤ ਬਾਹਰ ਭੱਜ ਗਏ। ਉਨ੍ਹਾਂ ਕਿਹਾ ਕਿ 200 ਤੋਂ ਵੱਧ ਪਰਿਵਾਰ ਬੇਘਰ ਹੋ ਗਏ ਹਨ। ਭੂਚਾਲ ਦੀ ਸੂਚਨਾ ਮਿਲਣ ਤੋਂ ਤੁਰੰਤ ਬਾਅਦ ਭੂਚਾਲ ਤੋਂ ਪ੍ਰਭਾਵਿਤ ਲੋਕਾਂ ਲਈ ਟੈਂਟ, ਚਾਦਰਾਂ, ਖਾਣ-ਪੀਣ ਦੀਆਂ ਚੀਜ਼ਾਂ ਅਤੇ ਪੀਣ ਵਾਲੇ ਪਾਣੀ ਸਮੇਤ ਰਾਹਤ ਸਮੱਗਰੀ ਭੇਜੀ ਗਈ।
Earthquake
ਹਾਲਾਂਕਿ, ਉਨ੍ਹਾਂ ਕਿਹਾ ਕਿ ਬਚਾਅ ਅਤੇ ਰਾਹਤ ਟੀਮਾਂ ਨੂੰ ਪ੍ਰਭਾਵਿਤ ਪਿੰਡਾਂ ਤੱਕ ਪਹੁੰਚਣ ਵਿੱਚ ਮੁਸ਼ਕਲ ਆ ਰਹੀ ਹੈ ਕਿਉਂਕਿ ਇਹ ਪਿੰਡ ਪਹਾੜੀ ਖੇਤਰਾਂ ਵਿੱਚ ਸਥਿਤ ਹਨ। ਉਨ੍ਹਾਂ ਦੱਸਿਆ ਕਿ ਅਸੀਂ ਦਵਾਈਆਂ ਦੇ ਨਾਲ ਸਿਹਤ ਟੀਮਾਂ ਭੇਜ ਦਿੱਤੀਆਂ ਹਨ। ਪ੍ਰਭਾਵਿਤ ਪਰਿਵਾਰਾਂ ਨੂੰ ਐਮਰਜੈਂਸੀ ਪਨਾਹ ਦੇਣ ਲਈ ਵੀ ਯਤਨ ਜਾਰੀ ਹਨ।
