ਕਰਤਾਰਪੁਰ ਕੋਰੀਡੋਰ ਆਰਟ ਗੈਲਰੀ ਵਿਚ ਮਹਾਨ ਸਿੱਖ ਜਰਨੈਲ ਦਾ ਸਥਾਪਤ ਕੀਤਾ ਗਿਆ ਬੁੱਤ
ਲਾਹੌਰ: ਪਾਕਿਸਤਾਨ ਨੇ ਕਰਤਾਰਪੁਰ ਕੋਰੀਡੋਰ ਆਰਟ ਗੈਲਰੀ ਵਿਚ ਮਹਾਨ ਸਿੱਖ ਜਰਨੈਲ ਹਰੀ ਸਿੰਘ ਨਲੂਆ ਦਾ ਬੁੱਤ ਲਗਾਉਣ ਦੀ ਇਜਾਜ਼ਤ ਦੇ ਦਿਤੀ ਹੈ। ਇਹ ਬੁੱਤ 1 ਫ਼ਰਵਰੀ 2026 ਨੂੰ ਸਥਾਪਿਤ ਕੀਤਾ ਗਿਆ, ਜਿਸ ਨੂੰ ਸਿੱਖ ਇਤਿਹਾਸ ਦੀ ਵੱਡੀ ਪਛਾਣ ਵਜੋਂ ਵੇਖਿਆ ਜਾ ਰਿਹਾ ਹੈ।
ਹਰੀ ਸਿੰਘ ਨਲੂਆ ਮਹਾਰਾਜਾ ਰਣਜੀਤ ਸਿੰਘ ਦੇ ਸੱਭ ਤੋਂ ਭਰੋਸੇਮੰਦ ਜਰਨੈਲਾਂ ’ਚੋਂ ਇਕ ਸਨ। ਉਨ੍ਹਾਂ ਨੇ ਉੱਤਰੀ-ਪਛਮੀ ਸਰਹੱਦਾਂ ਨੂੰ ਸੁਰੱਖਿਅਤ ਕੀਤਾ ਅਤੇ ਅਫ਼ਗਾਨ ਹਮਲਿਆਂ ਨੂੰ ਰੋਕਿਆ। ਉਹ ਕਸ਼ਮੀਰ, ਪੇਸ਼ਾਵਰ ਅਤੇ ਹਜ਼ਾਰਾ ਦੇ ਗਵਰਨਰ ਰਹੇ ਅਤੇ ਸਿੱਖ ਰਾਜ ਦੀ ਸੀਮਾ ਖੈਬਰ ਪਾਸ ਤਕ ਵਧਾਈ।
ਇਸ ਤੋਂ ਪਹਿਲਾਂ 2022 ਵਿਚ ਪਾਕਿਸਤਾਨ ਦੇ ਹਰੀਪੁਰ ਜ਼ਿਲ੍ਹੇ ਵਿਚ ਨਲਵਾ ਦੀ 8 ਫੁੱਟ ਉੱਚੀ ਮੂਰਤੀ ਧਾਰਮਕ ਵਿਰੋਧ ਕਾਰਨ ਹਟਾ ਦਿਤੀ ਗਈ ਸੀ, ਜਿਸ ਨਾਲ ਸਿੱਖ ਸੰਸਥਾਵਾਂ ਨੇ ਤਿੱਖਾ ਵਿਰੋਧ ਕੀਤਾ ਸੀ। ਹੁਣ ਕਰਤਾਰਪੁਰ ਵਿਚ ਨਵੀਂ ਮੂਰਤੀ ਦੀ ਸਥਾਪਨਾ ਨੂੰ ਦੁਨੀਆਂ ਭਰ ਦੀਆਂ ਸਿੱਖ ਸੰਸਥਾਵਾਂ ਵਲੋਂ ਸੁਆਗਤ ਮਿਲ ਰਿਹਾ ਹੈ।
ਇਸ ਪ੍ਰਾਜੈਕਟ ਦੀ ਅਗਵਾਈ ਗੁਰਿੰਦਰ ਪਾਲ ਸਿੰਘ ਜੋਸਨ (ਸਿੱਖਸ ਇਨ ਅਮਰੀਕਾ ਦੇ ਸੰਸਥਾਪਕ) ਨੇ ਕੀਤੀ, ਜਦਕਿ ਮੂਰਤੀ ਨੂੰ ਜਗਦੀਪ ਸਿੰਘ ਬਿਲਿੰਗ ਨੇ ਤਿਆਰ ਕੀਤਾ। ਪ੍ਰਾਜੈਕਟ ਦੇ ਚੇਅਰਮੈਨ ਕੁਲਵੰਤ ਸਿੰਘ ਦਿਓਲ ਸਨ। ਇਹ ਕਦਮ ਪਾਕਿਸਤਾਨ ਵਲੋਂ ਸਿੱਖ ਵਿਰਾਸਤ ਦੀ ਇੱਜ਼ਤ ਕਰਨ ਵਲ ਇਕ ਮਹੱਤਵਪੂਰਨ ਸੰਕੇਤ ਮੰਨਿਆ ਜਾ ਰਿਹਾ ਹੈ।
