‘‘ਮੈਂ ਕਿਸ ਤਰ੍ਹਾਂ ਦੱਸਾਂ ਕਿ ਅਸੀਂ ਮਿੱਤਰ ਦੇਸ਼ਾਂ ਤੋਂ ਕਰਜ਼ ਲੈਣ ਲਈ ਕਿਸ ਤਰ੍ਹਾਂ ਮਿੰਨਤ ਕੀਤੀ? ਮਿੱਤਰ ਦੇਸ਼ਾਂ ਨੇ ਸਾਨੂੰ ਨਿਰਾਸ਼ ਨਹੀਂ ਕੀਤਾ''
ਇਸਲਾਮਾਬਾਦ : ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ਼ ਨੇ ‘ਮਿੱਤਰ ਦੇਸ਼ਾਂ’ ਤੋਂ ਵਿੱਤੀ ਮਦਦ ਮੰਗਣ ’ਚ ਅਪਮਾਨਜਨਕ ਸਥਿਤੀ ਦਾ ਜ਼ਿਕਰ ਕਰਦਿਆਂ ਇਸ ਗੱਲ ਨੂੰ ਖੁੱਲ੍ਹ ਕੇ ਮੰਨਿਆ ਕਿ ਵਿਦੇਸ਼ੀ ਕਰਜ਼ ਲੈਣ ਦੀ ਮਜਬੂਰੀ ’ਚ ਪਾਕਿਸਤਾਨ ਨੂੰ ਅਪਣਾ ਸਿਰ ਝੁਕਾਉਣਾ ਪਿਆ ਹੈ ਅਤੇ ‘ਆਤਮਸਨਮਾਨ ਦੀ ਕੀਮਤ ’ਤੇ’ ਸਮਝੌਤਾ ਕਰਨਾ ਪਿਆ।
ਇਸਲਾਮਾਬਾਦ ਦੇਸ਼ ਦੇ ਮਸ਼ਹੂਰ ਵਪਾਰੀਆਂ ਅਤੇ ਨਿਰਯਾਤਕਾਂ ਦੇ ਮਾਣ ’ਚ ਰੱਖੇ ਇਕ ਸਮਾਰੋਹ ਨੂੰ ਸੰਬੋਧਨ ਕਰਦਿਆਂ ਸ਼ਰੀਫ਼ ਨੇ ਉਸ ਮੁਸ਼ਕਲ ਦੌਰ ਨੂੰ ਯਾਦ ਕੀਤਾ ਜਦੋਂ ਪਾਕਿਸਤਾਨ ਨੂੰ ਦਿਵਾਲੀਆਪਨ ਦੇ ਡਰ ਦਾ ਸਾਹਮਣਾ ਕਰਨਾ ਪੈਂਦਾ ਸੀ ਅਤੇ ਕੁਝ ਲੋਕ ਇਸ (ਪਾਕਿਸਤਾਨ ਨੂੰ) ਤਕਨੀਕੀ ਰੂਪ ’ਚ ਅਸਫ਼ਲ ਹੋਣ ਦੇ ਕੰਢੇ ਦਸ ਰਹੇ ਸਨ।
ਉਨ੍ਹਾਂ ਕਿਹਾ, ‘‘ਜਦੋਂ ਅਸੀਂ ਅਹੁਦਾ ਸੰਭਾਲਿਆ, ਤਾਂ ਆਰਥਕ ਸਥਿਤੀ ਬਹੁਤ ਨਾਜ਼ੁਕ ਸੀ ਅਤੇ ਆਮ ਆਦਮੀ ਨੂੰ ਗੰਭੀਰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ।’’ ਪ੍ਰਧਾਨ ਮੰਤਰੀ ਨੇ 2023 ’ਚ ਪੈਰਿਸ ’ਚ ਕੌਮਾਂਤਰੀ ਮੁਦਰਾ ਕੋਸ਼ (ਆਈ.ਐਮ.ਐਫ਼. ਦੇ ਪ੍ਰਬੰਧ ਨਿਰਦੇਸ਼ਕ ਨਾਲ ਅਪਣੀ ਮੁਲਾਕਾਤ ਦਾ ਜ਼ਿਕਰ ਕੀਤਾ ਜਿਸ ਤੋਂ ਬਾਅਦ ਕੌਮਾਂਤਰੀ ਕਰਜ਼ਦਾਤਾ ਨੇ ਇਕ ਆਰਥਕ ਪ੍ਰੋਗਰਾਮ ਨੂੰ ਮਨਜ਼ੂਰੀ ਦਿਤੀ ਜਿਸ ਨਾਲ ਦੇਸ਼ ਦੇ ਨੇਤਾਵਾਂ ਤੋਂ ਅਰਬਾਂ ਡਾਲਰ ਦੇ ਕਰਜ਼ ਮੰਗਣ ਲਈ ਮੁਲਾਕਾਤ ਕੀਤੀ।
ਉਨ੍ਹਾਂ ਕਿਹਾ, ‘‘ਮੈਂ ਕਿਸ ਤਰ੍ਹਾਂ ਦੱਸਾਂ ਕਿ ਅਸੀਂ ਮਿੱਤਰ ਦੇਸ਼ਾਂ ਤੋਂ ਕਰਜ਼ ਲੈਣ ਲਈ ਕਿਸ ਤਰ੍ਹਾਂ ਮਿੰਨਤ ਕੀਤੀ? ਮਿੱਤਰ ਦੇਸ਼ਾਂ ਨੇ ਸਾਨੂੰ ਨਿਰਾਸ਼ ਨਹੀਂ ਕੀਤਾ। ਪਰ ਜੋ ਕਰਜ਼ ਮੰਗਣ ਜਾਂਦਾ ਹੈ, ਉਸ ਦਾ ਸਿਰ ਝੁਕਿਆ ਰਹਿੰਦਾ ਹੈ।’’ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕਰਜ਼ ਨਾਲ ਫ਼ਰਜ਼ ਵੀ ਪੈਦਾ ਹੁੰਦੇ ਹਨ ਜਿਨ੍ਹਾਂ ਨੂੰ ਪੂਰਾ ਕਰਨਾ ਹੁੰਦਾ ਹੈ। (ਏਜੰਸੀ)
