ਹੋਟਲ ਵਪਾਰੀ ਦੀ ਸ਼ਿਕਾਇਤ ਉਤੇ ਅਤੇ ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ ਮਾਮਲਾ ਦਰਜ
ਨੋਇਡਾ : ਉੱਤਰ ਪ੍ਰਦੇਸ਼ ਦੇ ਨੋਇਡਾ-ਸੈਕਟਰ 49 ’ਚ ਪੰਜਾਬ ਨੈਸ਼ਨਲ ਬੈਂਕ (ਪੀ.ਐਨ.ਬੀ.) ਦੇ ਪੰਜ ਅਧਿਕਾਰੀਆਂ ਵਿਰੁਧ 60 ਕਰੋੜ ਰੁਪਏ ਦੀ ਜਾਇਦਾਦ ਨੂੰ ਹੜੱਪਣ ਦੀ ਕਥਿਤ ਤੌਰ ’ਤੇ ਸਾਜ਼ਸ਼ ਰਚਣ ਲਈ ਮੁਕਦਮਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਦਸਿਆ ਕਿ ਇਕ ਹੋਟਲ ਵਪਾਰੀ ਦੀ ਅਪੀਲ ’ਤੇ ਅਦਾਲਤ ਦੇ ਹੁਕਮ ਮਗਰੋਂ ਇਹ ਮੁਕਦਮਾ ਦਰਜ ਕੀਤਾ ਗਿਆ।
ਥਾਣਾ ਇੰਚਾਰਜ ਸੁਨੀਲ ਕੁਮਾਰ ਭਾਰਦਵਾਜ ਨੇ ਕਿਹਾ ਕਿ ਸਨਿਚਰਵਾਰ ਰਾਤ ਨੂੰ ਨੋਇਡਾ ਸੈਕਟ+ 47 ਵਾਸੀ ਹੋਟਲ ਕਾਰੋਬਾਰੀ ਅਨਿਲ ਬੱਬਰ (66) ਦੀ ਸ਼ਿਕਾਇਤ ’ਤੇ ਬੈਂਕ ਦੇ ਖੇਤਰੀ ਮੁਖੀ ਰਵਿੰਦਰ ਕੁਮਾਰ ਪਾਂਡੇ, ਖੇਤਰੀ ਪ੍ਰਬੰਧਕ ਪਿ੍ਰਆ ਰੰਜਨ, ਬ੍ਰਾਂਚ ਪ੍ਰਬੰਧਕ ਨਰਿੰਦਰ ਬਿਸ਼ਟ, ਜ਼ੋਨਲ ਹੈੱਡ ਐਸ.ਐਨ. ਦੂਬੇ ਅਤੇ ਐਮ.ਸੀ.ਸੀ. ਹੈੱਡ ਮਨੀਸ਼ ਕਸ਼ਪ ਵਿਰੁਧ ਧੋਖਾਧੜੀ ਅਤੇ ਸਾਜ਼ਸ਼ ਰਚਣ ਦੀਆਂ ਧਾਰਾਵਾਂ ਹੇਠ ਕੇਸ ਦਰਜ ਕੀਤਾ ਗਿਆ। ਸ਼ਿਕਾਇਤਕਰਤਾ ਨੇ ਦੋਸ਼ ਲਾਇਆ ਕਿ ਅਧਿਕਾਰੀ ‘ਸਰਫੇਸੀ ਐਕਟ’ ਦੇ ਨਾਂ ’ਤੇ 60 ਕਰੋੜ ਰੁਪਏ ਦਾ ਉਸ ਦਾ ਹੋਟਲ ਕਿਸੇ ਚਹੇਤੇ ਦੇ ਨਾਂ ਉਤੇ ਸਿਰਫ਼ 20 ਕਰੋੜ ਰੁਪਏ ’ਚ ਨਿਲਾਮ ਕਰਨ ਦੀ ਤਿਆਰੀ ਕਰ ਰਹੇ ਹਨ।
