Kanpur Lamborghini News
ਅਦਾਲਤ ਨੇ ਕਾਰ ਦੀ ਰਿਹਾਈ ਉਤੇ ਸਖ਼ਤ ਸ਼ਰਤਾਂ ਲਗਾਈਆਂ
ਕਾਨਪੁਰ : ਕਾਨਪੁਰ ਵਿਚ 7 ਫ਼ਰਵਰੀ ਨੂੰ ਵਾਪਰੇ ਲਗਜ਼ਰੀ ਕਾਰ ਹਾਦਸੇ ਨਾਲ ਜੁੜੀ ਲੈਂਬਰਗਿਨੀ ਰੇਵੁਐਲਟੋ ਕਾਰ ਨੂੰ ਅਦਾਲਤ ਦੇ ਹੁਕਮ ਉਤੇ 8.30 ਕਰੋੜ ਰੁਪਏ ਦੇ ਸੁਰੱਖਿਆ ਬਾਂਡ ਉਤੇ ਰਿਹਾਅ ਕਰ ਦਿਤਾ ਗਿਆ ਹੈ। ਇਸ ਕਾਰ ਨੇ ਵੀ.ਆਈ.ਪੀ. ਰੋਡ ਉਤੇ ਤੇਜ਼ ਰਫ਼ਤਾਰ ਨਾਲ ਟੱਕਰ ਮਾਰੀ ਸੀ, ਜਿਸ ਕਾਰਨ ਛੇ ਲੋਕ ਜ਼ਖ਼ਮੀ ਹੋਏ ਸਨ।
ਕਾਰ ਦੇ ਮਾਲਕ ਸ਼ਿਵਮ ਮਿਸ਼ਰਾ, ਜੋ ਕਿ ਤਮਾਕੂ ਵਪਾਰੀ ਕੇ.ਕੇ. ਮਿਸ਼ਰਾ ਦਾ ਪੁੱਤਰ ਹੈ, ਨੂੰ 12 ਫ਼ਰਵਰੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਪਰ ਉਹ ਕੁੱਝ ਘੰਟਿਆਂ ਵਿਚ ਹੀ ਜ਼ਮਾਨਤ ਉਤੇ ਬਾਹਰ ਆ ਗਿਆ। ਅਦਾਲਤ ਨੇ ਕਾਰ ਦੀ ਰਿਹਾਈ ਉਤੇ ਸਖ਼ਤ ਸ਼ਰਤਾਂ ਲਗਾਈਆਂ ਹਨ ਕਿ ਕਾਰ ਨਾ ਵੇਚੀ ਜਾ ਸਕਦੀ ਹੈ, ਨਾ ਹੀ ਇਸ ਦਾ ਰੰਗ ਜਾਂ ਇੰਜਣ ਨੰਬਰ ਬਦਲਿਆ ਜਾ ਸਕਦਾ ਹੈ।
ਪੁਲਿਸ ਨੇ ਕਾਰ ਨੂੰ ਅੱਧੀ ਰਾਤ ਤੋਂ ਬਾਅਦ ਟ੍ਰੇਲਰ ਰਾਹੀਂ ਥਾਣੇ ਤੋਂ ਬਾਹਰ ਕਢਿਆ ਤਾਂ ਜੋ ਟ੍ਰੈਫ਼ਿਕ ਜਾਮ ਨਾ ਹੋਵੇ। ਹਾਦਸੇ ਵਿਚ ਗੰਭੀਰ ਜ਼ਖ਼ਮੀ ਈ-ਰਿਕਸ਼ਾ ਚਾਲਕ ਸਮੇਤ ਹੋਰ ਪੀੜਤਾਂ ਨੇ ਨਿਆਂ ਦੀ ਮੰਗ ਕੀਤੀ ਹੈ। (ਪੀ.ਟੀ.ਆਈ.)
