ਮੁੰਬਈ, 3 ਮਾਰਚ: ਭਾਰਤੀ ਕ੍ਰਿਕਟ ਟੀਮ ਦੇ ਕੋਚ ਰਵੀ ਸ਼ਾਸਤਰੀ ਨੇ ਇਕ ਇੰਟਰਵਿਊ 'ਚ ਕਿਹਾ ਕਿ ਇਕ ਦਿਨਾਂ ਕ੍ਰਿਕਟ ਦੇ ਇਤਿਹਾਸ 'ਚ ਮਹਿੰਦਰ ਸਿੰਘ ਧੋਨੀ ਨੂੰ ਮਹਾਨਤਮ ਕ੍ਰਿਕਟਰਾਂ 'ਚ ਗਿਣਿਆ ਜਾਵੇਗਾ। ਧੋਨੀ ਨੂੰ ਬੈਸਟ ਫ਼ਿਨਿਸ਼ਰ ਦਸਦਿਆ ਸ਼ਾਸਤਰੀ ਨੇ ਕਿਹਾ ਕਿ ਉਸ ਤੋਂ ਬੇਹਤਰ ਫ਼ਿਨਿਸ਼ਰ ਦੁਨੀਆ 'ਚ ਸ਼ਾਇਦ ਹੀ ਕੋਈ ਹੋਵੇਗਾ।
ਦੱਖਣੀ ਅਫ਼ਰੀਕਾ ਦੌਰੇ 'ਚ ਇਕ ਦਿਨਾਂ ਅਤੇ ਟੀ20 ਮੈਚਾਂ 'ਚ ਜਿਸ ਤਰ੍ਹਾਂ ਦੀ ਖੇਡ ਦਾ ਧੋਨੀ ਨੇ ਪ੍ਰਦਰਸ਼ਨ ਕੀਤਾ ਹੈ, ਉਸ ਤੋਂ ਆਲੋਚਕਾਂ ਦੇ ਮੂੰਹ ਬੰਦ ਹੋ ਗਏ ਹਨ। ਧੋਨੀ ਨੇ ਇਸ ਲੜੀ 'ਚ ਨਾ ਸਿਰਫ਼ ਬੱਲੇ ਨਾਲ, ਸਗੋਂ ਵਿਕਟ ਪਿਛੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਸ਼ਾਸਤਰੀ ਨੇ ਧੋਨੀ ਦੇ ਤਜ਼ਰਬੇ ਦੀ ਗੱਲ ਕਰਦਿਆਂ ਕਿਹਾ ਕਿ ਉਸ ਕੋਲ ਜੋ ਤਜ਼ਰਬਾ ਹੈ, ਉਸ ਦਾ ਕੋਈ ਬਦਲ ਨਹੀਂ ਹੈ। ਇਹ ਤਜ਼ਰਬਾ ਬਾਜ਼ਾਰ 'ਚ ਖ਼ਰੀਦਿਆ ਜਾਂ ਵੇਚਿਆ ਨਹੀਂ ਜਾ ਸਕਦਾ ਹੈ। ਉਸ ਨੇ ਅਪਦੀ ਫਿਟਨੈਸ 'ਤੇ ਵੀ ਪੂਰਾ ਧਿਆਨ ਦਿਤਾ ਹੈ। ਡੈੱਥ ਓਵਰਾਂ 'ਚ ਉਸ ਵਾਂਗ ਬੱਲੇਬਾਜ਼ੀ ਕਰਨ ਵਾਲਾ ਸ਼ਾਇਦ ਹੀ ਕੋਈ ਦੇਖਣ ਨੂੰ ਮਿਲਦਾ ਹੈ। (ਏਜੰਸੀ)
